अमेरिकेत शिक्षणासाठी ८२ हजार विद्यार्थ्यांना व्हिसा

म. टा. प्रतिनिधी, पुणे

अमेरिकेत शिक्षणासाठी जाणाऱ्या भारतीय विद्यार्थ्यांच्या संख्येत वाढ झाली असून, यंदा अमेरिकेच्या दूतावास कार्यालयाने ८२ हजारांपेक्षा अधिक विद्यार्थ्यांना विद्यार्थी (स्टुडंट) व्हिसा दिला आहे. आतापर्यंतची ही सर्वाधिक संख्या असून, अमेरिकेने इतर कोणत्याही देशातील विद्यार्थ्यांपेक्षा भारतीय विद्यार्थ्यांना शिक्षणासाठी प्राधान्य दिले आहे.

उच्च शिक्षणासाठी पात्र विद्यार्थ्यांना त्यांच्या अभ्यासक्रमाला लवकर प्रवेश मिळावा, यासाठी नवी दिल्लीतील दूतावास आणि चेन्नई, हैदराबाद, कोलकाता, मुंबई अशा चार वाणिज्य दूतावासांनी मे ते ऑगस्ट या कालावधीत विद्यार्थी व्हिसा अर्जांची प्रक्रिया राबविली. त्यानुसार आतापर्यंत सर्वाधिक ८२ हजारांपेक्षा अधिक विद्यार्थ्यांना व्हिसा देण्यात आला आहे. कोव्हिड काळात अनेक विद्यार्थ्यांना व्हिसा मिळवण्यात अडचणी आल्या, तर अनेकांनी कोव्हिडचा प्रादुर्भाव कमी झाल्यानंतर, उच्च शिक्षणासाठी जाण्याचा निर्णय घेतला. रशिया, युक्रेनमध्ये वैद्यकीय अभ्यासक्रमांसाठी प्रवेश घेणारे विद्यार्थीही अमेरिकेत शिक्षण घेण्यासाठी प्राधान्य देत असल्याचे समोर आले आहे. त्यामुळे यंदा व्हिसा घेणाऱ्या विद्यार्थ्यांच्या संख्येत वाढ होण्याची शक्यता आहे.

करोना महामारी असल्याने व्हिसा देण्यात अडचणी आल्या. मात्र, त्यातही अनेक विद्यार्थी व्हिसा मिळवू शकले आणि त्यांच्या विद्यापीठांमध्ये शिक्षणासाठी पोहोचू शकले. यंदा उन्हाळ्यात ८२ हजारांपेक्षा अधिक विद्यार्थ्यांना विद्यार्थी व्हिसा देण्यात आले असून, गेल्या वर्षीपेक्षा हे प्रमाण अधिक आहे. भारतीय विद्यार्थ्यांची अमेरिकेत उच्च शिक्षण घेण्यासाठी सर्वाधिक पसंती आहे, हे अधोरेखित होत आहे.

‘या विद्यार्थ्यांच्या माध्यमातून दोन्ही देशांमधील संबंध वाढविण्यास हातभार लागतो. आंतरराष्‍ट्रीय भागीदारी कायम ठेवण्‍यासाठी आणि वाढवण्‍यासाठी हे विद्यार्थी आयुष्यभर संबंध निर्माण करतात. वर्तमान आणि भविष्यातील जागतिक आव्हानांना तोंड देण्यासाठी एकत्रितपणे काम करतात,’ असे ‘यूएस मिशन इन इंडिया’च्या प्रमुख पॅट्रिशिया लॅसिना यांनी सांगितले.

परराज्यात शिक्षण घेणाऱ्या ‘ओबीसीं’ची शिष्यवृत्ती बंद
भारतीय विद्यार्थ्यांना उच्च दर्जाचे शिक्षण घेण्यास मदत करण्याची आमची भूमिका असून, त्याचा आम्हाला आनंद असल्याचे दूतावास कौन्सुलर व्य़वहार मंत्री डॉन हेफ्लिन यांनी सांगितले.

अमेरिकेत २० टक्के भारतीय विद्यार्थी
अमेरिकेत शिकणाऱ्या सर्व आंतरराष्ट्रीय विद्यार्थ्यांपैकी जवळपास २० टक्के भारतीय विद्यार्थ्यांचा समावेश आहे. ओपन डोअर अहवालानुसार २०२०-२१ या शैक्षणिक वर्षात अमेरिकेत शिक्षणासाठी एक लाख ६७ हजार ५८२ विद्यार्थी होते. अमेरिकेत शिक्षण घेण्यासाठी इच्छुक असणाऱ्या विद्यार्थ्यांनी ‘एज्युकेशन यूएसए इंडिया’ हे अॅप डाउनलोड करावे. या अॅपद्वारे अमेरिकेतील विविध विद्यापीठे आणि महाविद्यालयांमध्ये प्रवेश घेण्याच्या अर्ज प्रक्रियेची माहिती मिळते. अमेरिकेत उच्च शिक्षण घेण्याचे नियोजन करणाऱ्या विद्यार्थ्यांसाठी ही सर्वांत सोपी सुविधा आहे, असे सांगण्यात आले आहे.

NCERT Survey: ‘अभ्यास, परीक्षा आणि निकाल हे विद्यार्थ्यांच्या चिंतेचे सर्वात मोठे कारण’
Foreign Scholarships:परदेशी शिष्यवृत्ती घेण्यात नागपूर आघाडीवर