YCMU Curriculum: साडेतीन लाखांवर विद्यार्थ्यांचे शिक्षण अर्धवट

म. टा. प्रतिनिधी, नाशिक

गेल्या २२ वर्षांत यशवंतराव चव्हाण महराष्ट्र मुक्त विद्यापीठामध्ये विविध शिक्षणक्रमांना प्रवेश घेऊनही, शिक्षणक्रम पूर्ण न करता अर्धवट सोडलेल्या विद्यार्थ्यांची संख्या साडे तीन लाखांवर असल्याची माहिती समोर आली आहे. मुक्त विद्यापीठामार्फत या विद्यार्थ्यांना शिक्षण पूर्ण करण्याची पुन्हा एकदा संधी दिली जाणार असल्याची माहिती विद्यापीठाचे कुलसचिव डॉ. प्रकाश देशमुख यांनी दिली.

अनेक कारणांमुळे शिक्षणाच्या मुख्य प्रवाहातून बाहेर पडलेल्यांना दूरस्थ पद्धतीने शिक्षण घेण्याची संधी मुक्त विद्यापीठामार्फत उपलब्ध करून दिली जाते. पारंपरिक विद्यापीठांच्या तुलनेत शिक्षणक्रम पूर्ण करण्यासाठी जवळपास दुप्पट कालावधी या विद्यार्थ्यांना मिळतो. पारंपरिक विद्यापीठांमध्ये राबविला जाणारा तीन वर्षांचा पदवी अभ्यासक्रम पूर्ण करण्यासाठी मुक्त विद्यापीठामार्फत ७ वर्षांचा कालवधी दिला जातो. तरीही अनेक कारणांमुळे सन २००० पासून गेल्या २२ वर्षांमध्ये साडे तीन लाखांपेक्षा अधिक विद्यार्थी हा अभ्यासक्रम पूर्ण करू शकलेले नसल्याची माहिती समोर आली आहे.

विद्यापीठामार्फत गेल्या काही दिवसांत ही माहिती शोधून काढण्यात आली असून, संबंधित विद्यार्थ्यांना पुन्हा एकदा संधी देण्याचा निर्णय मुक्त विद्यापीठामार्फत घेण्यात आला आहे. यासाठी विद्यार्थ्यांशी पत्राद्वारे संपर्क साधला जाणार आहे. शिक्षण पूर्ण करण्यासाठी त्यांना पुन्हा विद्यापीठाकडे नव्याने नोंदणी करता येणार आहे. विद्यापीठाच्या अधिकृत वेबसाइटवर याबाबतची सविस्तर माहिती लवकरच प्रसिद्ध केली जाणार आहे.

Foreign Scholarships:परदेशी शिष्यवृत्ती घेण्यात नागपूर आघाडीवर
परराज्यात शिक्षण घेणाऱ्या ‘ओबीसीं’ची शिष्यवृत्ती बंद
तीन लाख प्रवेश निश्चित
मुक्त विद्यापीठामार्फत राज्यभरात पदवी, पदविका, पदव्युत्तर पदवी, प्रमाणपत्र अभ्यासक्रम राबविले जातात. या सर्व अभ्यासक्रमांना दरवर्षी प्रवेश घेणाऱ्या विद्यार्थ्यांची संख्या जवळपास सहा ते साडे सहा लाख असते. करोना काळात या प्रवेश संख्येवर परिणाम झाल्यामुळे हे प्रवेश पाच ते साडेपाच लाखांवर आले होते. सद्यस्थितीत शैक्षणिक वर्ष २०२२-२३ साठी सुरू असलेल्या प्रवेश प्रक्रियेत तीन लाख प्रवेश पूर्ण झाले असून, १५ सप्टेंबरपर्यंत नियमित, तर ३० सप्टेंबरपर्यंत विलंब शुल्कासह हे प्रवेश सुरू राहणार आहेत.

NEET UG परीक्षेचा निकाल पाहण्याची ‘ही’ घ्या थेट लिंक