PhD च्या विद्यार्थ्यांना मुलाखत-परीक्षांसाठी ऑनलाइन, ऑफलाइन असे दोन्ही पर्याय

म. टा. प्रतिनिधी, पुणे

सावित्रीबाई फुले पुणे विद्यापीठात पीएचडी व एम. फील करणाऱ्या विद्यार्थ्यांना त्यांची तोंडी मुलाखत-परीक्षांसाठी ऑनलाइन व ऑफलाइन असे दोन्ही पर्याय उपलब्ध असणार आहेत. परीक्षा कशी घ्यावी, याबाबतचा निर्णय संबंधित मार्गदर्शकांवर व संशोधन केंद्र प्रमुखांवर सोपवण्यात आला असून, मार्गदर्शकांना दोन्ही पर्याय असतील, असे विद्यापीठ प्रशासनाने स्पष्ट केले आहे.

विद्यापीठाच्या विद्या परिषदेच्या बैठकीत हा निर्णय घेण्यात आला आहे. करोनामुळे दोन वर्षे ऑनलाइन परीक्षा घेतल्या जात होत्या. या काळात पीएचडीच्या तोंडी परीक्षा व मुलाखतीही गुगल, स्काइप, मायक्रोसॉफ्ट टेक्नॉलॉजीच्या विविध अॅपमार्फत घेतल्या जात होत्या. करोनाचा प्रादुर्भाव कमी झाल्यानंतर या परीक्षा पुन्हा प्रत्यक्ष पद्धतीने घेतल्या जाऊ लागल्या. पुढील काही दिवसांमध्ये या परीक्षा होणार आहेत. त्या ऑफलाइन व ऑनलाइन अशा दोन्ही पद्धतीने घेण्याची विनंती काही प्राध्यापक आणि विद्यार्थ्यांनी विद्यापीठ प्रशासनाकडे दिली होती. त्याप्रमाणे विद्यापीठाने दोन्ही पर्याय खुले ठेवले असून, त्याचा निर्णय मात्र मार्गदर्शकांवर सोपवला आहे. मार्गदर्शक व संशोधन केंद्र प्रमुख ऑफलाइन पद्धतीने परीक्षा घेण्यावर ठाम असतील, तर विद्यार्थ्यांना प्रत्यक्ष उपस्थित राहून तोंडी परीक्षा द्यावीच लागेल, असेही विद्यापीठाने स्पष्ट केले आहे.

परीक्षा ऑफलाइन घ्यावी की ऑनलाइन, यावरून संशोधन केंद्रप्रमुख आणि मार्गदर्शक यांच्यामध्ये एकमत न झाल्यास संबंधित निर्णय त्या-त्या विभागाचे अधिष्ठाता घेतील, असेही विद्यापीठाने स्पष्ट केले आहे. परीक्षेबाबत एकमताने झालेला निर्णय विद्यार्थ्यांना मान्य करावा लागणार असून, मार्गदर्शक अथवा संशोधनप्रमुख सांगतील त्याच पद्धतीने परीक्षा देणे बंधनकारक असणार आहे. करोनाच्या काळात पीएचडीच्या तोंडी परीक्षा ऑनलाइन पद्धतीने कोणत्याही अडथळ्यांशिवाय पार पडल्या होत्या. यामुळे हा पर्याय उत्तम असल्यानेच दोन्ही पद्धतीने परीक्षा घेण्यासाठी मान्यता दिली असल्याचे विद्यापीठाकडून स्पष्ट करण्यात आले आहे.

Job Guarantee: १०० टक्के जॉब गॅरंटी, ‘या’ शाखांमध्ये घ्या प्रवेश
विद्यापीठ अनुदान आयोगाचे धोरण
पीएचडी, एम.फील सह पदव्युत्तर शिक्षण घेणाऱ्या विद्यार्थ्यांच्या तोंडी परीक्षा ऑनलाइन आणि ऑफलाइन, अशा दोन्ही पद्धतीने घेतल्या जाव्यात, असे धोरण विद्यापीठ अनुदान आयोगाने (युजीसी) तयार केले आहे. विद्यार्थ्यांना या परीक्षा देताना दोन्ही पद्धतींचा वापर करता यावा, यासाठी आयोगाकडून सर्व विद्यापीठांना सूचना देण्यात आल्या आहेत. या धोरणाची अंमलबजावणी सावित्रीबाई फुले पुणे विद्यापीठात करण्याचा निर्णय घेण्यात आला असल्याचे, विद्यापीठ प्रशासनाने स्पष्ट केले आहे.

यूजीसीने तयार केलेल्या धोरणाची अंमलबजावणी करण्याचा निर्णय आम्ही घेतला आहे. त्याप्रमाणे मार्गदर्शक, संशोधन केंद्र प्रमुख यांच्या निर्णयानुसार विद्यार्थ्याना तोंडी व लेखी परीक्षा ऑनलाइन किंवा ऑफलाइन पद्धतीने देण्याचे पर्याय उपलब्ध होतील. परीक्षा कशी घ्यावी, याचा अंतिम निर्णय सर्वस्वी संशोधन केंद्र प्रमुख आणि मार्गदर्शकांवर असेल अशी प्रतिक्रिया सावित्रीबाई फुले, पुणे विद्यापीठाचे प्र-कुलगुरू डॉ. प्रा. संजीव सोनवणे यांनी दिली.

ऑनलाइन शिक्षणाला पारंपरिक पदवीचे कोंदण, निर्णयामुळे होणारे फायदे जाणून घ्या
Distance आणि Online पदवींना नियमित मान्यता, यूजीसीच्या निर्णयाने लाखो विद्यार्थ्यांना दिलासा