IND vs AFG : एक वादा विराट दादा… कोहलीचे पहिलेच शतक, भारताने उभारला धावांचा डोंगर

दुबई : विराट कोहली आज पुन्हा एकदा भन्नाट फॉर्मात दिसला. श्रीलंकेविरुद्धच्या सामन्यात तो शून्यावर बाद झाला होता. पण या सामन्यात त्याला पुन्हा एकदा लय सापडल्याचे पाहायला मिळाले. विराटने यावेळी अफगाणिस्तानच्या गोलंदाजीचा चांगलाचच समाचार घेतला. कोहलीने यावेळी आंतरराष्ट्रीय कारकिर्दीतील ७१वे शतक पूर्ण केले. कोहलीने ५३ चेंडूंत ११ चौकार आणि चार षटकारांसह १०० धावा पूर्ण केल्या. कोहलीचे हे ट्वेन्टी-२० क्रिकेटमधील पहिलेच शतक ठरले. कोहलीला यावेळी हंगामी कर्णधार लोकेश राहुलची सुयोग्य साथ मिळाली. राहुलने यावेळी ६२ धावांची खेळी साकारली. पण कोहलीने भारताकडून सर्वाधिक धावा केल्या आणि त्यामुळेच भारताला २१२ धावांचा डोंगर उभारता आला. कोहलीने यावेळी ६१ चेंडूूंत १२ चौकार आणि सहा षटाकरांच्या जोरावर नाबाद १२२ धावांची धडाकेबाज खेळी साकारली.

भारताच्या लोकेश राहुल आणि विराट कोहली यांनी यावेळी संघाला चांगली सुरुवात करून दिली. या दोघांनी सुरुवातीपासूनच अफगाणिस्तानच्या गोलंदाजीवर प्रहार करायला सुरुवात केली. स्थिरस्थावर झाल्यावर तर या दोघांनी चौफेर फटकेबाजी करायला सुरुवात केली. त्यामुळे पहिल्या पॉवर प्लेमध्ये अफगाणिस्तान भारताच्या फलंदाजीपुढे निष्प्रभ झाल्याचे पाहायला मिळाले. पण पहिल्या पॉवर प्ले पर्यंतच या दोघांनी दमदार फटकेबाजी केली असे नाही, तर त्यानंतरही या दोघांनी गोलंदाजीचा खरपूस समाचार घेतला. त्यामुळेच भारताला यावेळी शतक सलामी मिळाली.

लोकेश राहुल आणि विराट कोहली यांनी यावेळी भारताला ११९ धावांची सलामी दिली. ही सलामी म्हणजे भारताच्या विजयाचा पाया असल्याचे म्हटले जात होते. पण राहुल बाद झाला आणि ही जोडी फुटली. राहुलने यावेळी ४१ चेंडूंत ६ चौकार आणि दोन षटकारांच्या जोरावर ६२ धावांची खेळी साकारली. राहुल बाद झाल्यावर सूर्यकुमार यादव फलंदाजीला आला, पण त्याला मोठी खेळी साकारता आली नाही. या सामन्यात त्याला ६ धावांवर समाधान मानावे लागले. पण एका बाजूने कोहली दमदार फलंदाजी करत असल्याचे पाहायला मिळाले. कोहलीने आपले अर्धशतक झळकावले आणि त्यानंतर तो गोलंदाजीवर तुटून पडला. सूर्यकुमार बाद झाल्यावर त्याला रिषभ पंतची साथ मिळाली.

आजच्या सामन्यासाठी संघात मोठे बदल…
अफगाणिस्तानविरुद्धच्या सामन्यासाठी भारतीय संघात मोठे बदल करण्यात आले. रोहित शर्माला यावेळी संघाबाहेर करण्यात आले. त्यामुळे भारताचे कर्णधारपद कोण सांभाळणार हा मोठा प्रश्न होता. पण भारतीय संघाने या प्रश्नाचे उत्तर सोडवले आहे. भारतीय संघाचे कर्णधारपद या सामन्यासाठी लोकेश राहुलला देण्यात आले आहे. त्याचबरोबर भारतीय संघात अजून तीन बदल करण्यात आले आहेत. भारतीय संघात दिनेश कार्तिक, दीपक चहर आणि अक्षर पटेल यांना संधी देण्यात आली आहे. भारतीय संघातून रोहित शर्मा, हार्दिक पंड्या आणि युजवेंद्र चहल यांना विश्रांती देण्यात आली आहे.