औपचारिक सामन्यात मोठे बदल; रोहितनं घेतली विश्रांती, पाहा टीम इंडियाची प्लेईंग XI

दुबई, 8 सप्टेंबर: भारत आणि अफगाणिस्तान संघात आशिया चषकाच्या सुपर फोर फेरतला सामना दुबईच्या मैदानात होतोय. या सामन्यात टीम इंडियाचा नियमित कर्णधार रोहित शर्मानं विश्रांती घेतली असून लोकेश राहुल संघाचं नेतृत्व करेल. दरम्यानं अफगाणिस्तानचा कर्णधार मोहम्मद नबीनं नाणेफेक जिंकून भारताला पहिल्यांदा फलंदाजीचं आमंत्रण दिलं आहे. या सामन्यासाठी भारतीय संघात तीन मोठे बदल करण्यात आले आहेत. कर्णधार रोहित शर्मा, हार्दिक पंड्या आणि युजवेंद्र चहलला विश्रांती देण्यात आली आहे.

कार्तिक, चहर, पटेल संघात

या सामन्यासाठी दिनेश कार्तिकचं संघात पुनरागमन झालं आहे. कार्तिक पाकिस्तानविरुद्धचा पहिला सामना खेळला होता. त्यानंतर त्याच्या जागी पुन्हा रिषभ पंतला संघात स्थान देण्यात आलं होतं. पण आज कार्तिक आणि पंत हे दोघेही प्लेईंग इलेव्हनमध्ये खेळतील. दुसरीकडे जाडेजाच्या जागी संघात आलेल्या अक्षर पटेलला अखेर संघात संधी मिळाली. तर आवेश खानच्या जागी आलेला दीपक चहर प्लेईंग इलेव्हनमध्ये खेळणार आहे.

भारतीय संघ – लोकेश राहुल (कर्णधार), विराट, सूर्यकुमार, रिषभ पंत, दिनेश कार्तिक, रवीचंद्रन अश्विन, दीपक हुडा, अक्षर पटेल, भुवनेश्वर कुमार, दीपक चहर, अर्शदीप सिंग

Afghanistan win the toss and will bowl first

Rohit Sharma rested, KL Rahul will lead the Indian side #INDvAFG | #AsiaCup2022 | Scorecard: https://t.co/z8iw8dn85Q pic.twitter.com/uiCKki3G4c

— ICC (@ICC) September 8, 2022

दोन्ही संघ स्पर्धेतून आऊट

आशिया चषकातल्या सलग दोन पराभवांनंतर टीम इंडियाचं आशिया चषकातलं आव्हान आधीच संपुष्टात आलं आहे. काल पाकिस्ताननं अफगाणिस्तानचा पराभव केला आणि भारताच्या उरल्यासुरल्या आशाही संपल्या. त्यामुळे आशिया चषकातल्या सुपर फोर फेरीतला आजचा अफगाणिस्तान आणि भारताचा सामना हा औपचारिक स्वरुपाचा असेल. पण हा सामना जिंकून स्पर्धेची विजयी सांगता करण्याचा टीम इंडियाचा प्रयत्न राहील.