आणखी एका बॉलिवूड सिनेमात हिंदू देवतेचा अपमान? रीलिजआधीच अजय देवगण-सिद्धार्थ मल्होत्रा अडचणीत

मुंबई: अभिनेता अजय देवगण आणि सिद्धार्थ मल्होत्रा स्टारर ‘थँक गॉड’चा ट्रेलर नुकताच प्रदर्शित (Thank God Trailer) झाला. एकीकडे सिद्धार्थ- अजयच्या चाहत्यांना हा ट्रेलर आवडला आहे तर, ट्रोल आर्मीने या सिनेमालाही ट्रोल करण्यास सुरुवात केला आहे. थँक गॉडच्या ट्रेलरमध्ये देवाचा अपमान झाल्याचे म्हणत ट्विटरवर ‘बॉयकॉट थँक गॉड’ ट्रेंड करण्यास सुरुवात झाली. दरम्यान आता अजय देवगण, सिद्धार्थ मल्होत्रा यांच्यासह चित्रपटाचे दिग्दर्शक इंदर कुमार यांच्याविरोधात गुन्हा दाखल करण्यात आला आहे.

या तिघांवरही धार्मिक भावना दुखावल्याप्रकरणी गुन्हा दाखल करण्यात आला आहे. वकील हिमांशू श्रीवास्तव यांनी उत्तर प्रदेशातील जौनपूर न्यायालयात अजय, सिद्धार्थ आणि इंदर यांच्याविरोधात खटला दाखल केला आहे. याप्रकरणी हिमांशू यांचा जबाब १८ नोव्हेंबरला नोंदवला जाणार आहे.

हे वाचा-सिनेविश्वात धमाकेदार एण्ट्रीनंतर हृताने घेतला ब्रेक! एन्जॉय करतेय सेकंड हनीमून

‘थँक गॉड’ सिनेमामध्ये अजय देवगण चित्रगुप्त या भूमिकेत आहे. पापपुण्याचा हिशोब ठेवणारी ही देवता आहे. ट्रेलरमध्ये अजयच्या तोंडी आक्षेपार्ह डायलॉग दिल्याचा आरोप केला जात आहे. यामुळे सोशल मीडियावर नेटिझन्सचा संताप पाहायला मिळाला आणि ट्रेलरमध्ये देवाचा अपमान झाल्याच्या प्रतिक्रिया समोर येऊ लागल्या आहेत. हिंदू देवतांचा अपमान करण्याचा बॉलिवूडचा अजेंडा असल्याचा आरोप या सिनेमावर होत आहे. त्यातच आता गुन्हा दाखल झाल्याने अजय-सिद्धार्थसमोरील अडचणी चित्रपट रीलिज होण्यापूर्वीच वाढस्या आहेत.

हे वाचा-Brahmastra चा विजय तर बॉयकॉट करणाऱ्यांची हार! या पाच कारणांमुळे बॉक्स ऑफिसवर धमाका

याचिकाकर्त्याने न्यायालयात दाखल केलेल्या याचिकेत म्हटले आहे की या सिनेमात अजय देवगण चित्रगुप्ताची भूमिका केली आहे. एका दृश्यात तो विनोद करत आहे आणि आक्षेपार्ह भाषा वापरत आहे. याचिकाकर्त्याने म्हटले आहे की चित्रगुप्ताला कर्माची देवता मानले जाते आणि तो मनुष्याच्या चांगल्या-वाईट कर्मांचा हिशेब ठेवतो. पण ट्रेलरमध्ये दाखवण्यात आलेल्या दृश्यामुळे धार्मिक भावना दुखावल्या गेल्या आहेत. अजय देवगण आणि सिद्धार्थ मल्होत्रा व्यतिरिक्त ‘थँक गॉड’मध्ये नोरा फतेही, रकुल प्रीत सिंग देखील आहे. हा चित्रपट २४ ऑक्टोबरला रिलीज होणार आहे.