योगायोग… भारताला पहिला T 20 world cup जिंकवून देणाऱ्या मॅचविनरची आजच्या दिवशीच निवृत्ती

नवी दिल्ली : आजच्या दिवस साधत भारताला पहिला ट्वेन्टी-२० विश्वचषक जिंकवून देणाऱ्या खेळाडूने निवृत्ती घेतली आहे. आजच्या दिवशी भारताने २००७ साली झालेल्या विश्वचषकात पाकिस्तानवर विजय साकारला होता. हा सामना टाय झाला होता आणि बॉलआऊटपर्यंत गेला होता. या बॉल आऊटमध्ये भारताला मोलाचे योगदान देणाऱ्या खेळाडूने आजच्या दिवशीच निवृत्तीचा निर्णय जाहीर केला आहे.

दक्षिण आफ्रिकेत २००७ साली झालेल्या ट्वेन्टी-२० विश्वचषकात रॉबिन उथप्पाने नेत्रदीपक कामगिरी केली होती. या विश्वचषकात उथप्पाने दमदार फटकेबाजी तर केलीच होती. पण तो या विश्वचषकासाठी कायमचा लक्षात राहीला तो पाकिस्तानविरुद्ध झालेल्यया बॉलआऊटमुळे. भारताची पहिली मॅच पाकिस्तानविरुद्ध होती. धोनी प्रथमच टीम इंडियाचे नेतृत्व करत होता. अशात समोर पाकिस्तान सारखा कट्टर प्रतिस्पर्धी होता. दोन्ही संघातील ही मॅच टाय झाली आणि तेव्हाच्या नियमानुसार मॅचचा निकाल बॉल आउटद्वारे करण्याचा निर्णय झाला. भारताने प्रथम फलंदाजी करत १४१ धावा केल्या होत्या, उत्तरादाखल पाकिस्तानने देखील तितक्याच धावा केल्या. त्यानंतर झालेल्या बॉलआउटमध्ये भारताने ३-० असा विजय मिळवला. भारताकडून हरभजन सिंग, विरेंद्र सेहवाग आणि रॉबिन उथप्पा यांनी बरोबर विकेटवर चेंडू मारला.

एक सलामीवीर म्हणून उथप्पाची कारकिर्द ही चांगली बहरू शकली नाही. कारण त्यावेळी भारतीय संघाच चांगलीच स्पर्धा होती. पण मधल्या फळीत उथप्पाने चांगली कामगिरी केली होती. त्यचाबरोबर गेल्या वर्षापर्यंत त्याने आपला फिटनेस चांगला ठेवला होता आणि चेन्नई सुपर किंग्ससारख्या संघात त्याने आपले स्थान कायम ठेवले होते. उथप्पाची कारकिर्द ही २० वर्षांची ठरली. या २० वर्षांच्या कारकिर्दीतत बऱ्याच लक्षवेधी गोष्टी त्याच्याकडून पाहायला मिळाल्या. उथप्पाने फक्त फलंदाजीच केली नाही तर यष्टीरक्षणाची जबाबदारीही त्याने पेलली होती. त्यामुळे संघासाठी तो १२व्या खेळाडूचीही भूमिका बजावत होता. उथप्पाने ४६ वनडे सामन्यांमध्ये भारताचे प्रतिनिधीत्व केले, तर भारताकडून तो १३ ट्वेन्टी-२० सामने खेळला होता. पण सर्वात जास्त सामने तो आयपीएलमध्ये खेळला. आयपीएलमध्ये त्याने मुंबई इंडियन्स, आरसीबी, पुणे, राजस्थान, केकेआर आणि चेन्नई सुपर किंग्स अशा सहा संघांकडून त्याने प्रतिनिधीत्व केले होते. आयपीएलमध्ये या सहा संघांकडून उथप्पा हा एकूण २०५ सामने खेळला. उथप्पाने आता निवृत्ती घेतली आहे. पण तरीही तो जगभरातील सर्व लीगमध्ये खेळू शकतो. त्यामुळे आता उथ्पपा पुढच्या वर्षी कोणत्या संघाकडून खेळणार, याची उत्सुकता त्याच्या चाहत्यांना नक्कीच असेल.