त्याप्रकारची भूमिका साकारायला मी केव्हाही तयार आहे…अनुजा साठेनं व्यक्त केली इच्छा

पार्थ डोंगरे, वझे-केळकर कॉलेज

० ‘महाराणी २’ या वेब सीरिजमधील तुझ्या भूमिकेविषयी काय सांगशील?
– अनेक कंगोरे आणि छटांनी नटलेली अशी किर्ती सिंग ही भूमिका मी साकारली आहे. ही भूमिका फार वेगळी आहे. त्यामुळे प्रेक्षकांना मला त्या भूमिकेत बघून आश्चर्य वाटणार आहे हे मात्र नक्की.

० या सीरिजच्या चित्रीकरणादरम्यानची लक्षात राहिलेली एखादी आठवण?
– आम्हा कलाकारांपैकी कोणालाही सीरिजचा शेवट कसा होणार हे माहिती नव्हतं. दिग्दर्शकानं याबद्दल काहीच सांगितलं नव्हतं. त्यामुळे आमच्यातली उत्कंठा प्रचंड वाढली होती. दिग्दर्शक आम्हाला नेहमी शेवट कसा होईल, तुमच्या दृष्टीनं पुढे काय घडेल; असं विचारायचे. आमचे दृष्टिकोन समजून घ्यायचे. त्यामुळे अनेक शक्यता वर्तवल्या जाऊन आम्हा कलाकारांमध्ये सर्जनशील चर्चा घडली. आमच्या दिग्दर्शकांना हेच अपेक्षित होतं. त्यातूनच संपूर्ण टीममध्ये सुंदर नातं निर्माण झालं.

० राजकीय भूमिकेचा लहेजा आत्मसात करण्यासाठी काय अभ्यास केलास?
– सीरिजचे लेखक, दिग्दर्शक यांनी त्यांना माझी भूमिका कशी दिसते हे उत्तमप्रकारे सांगितलं होतं. मला माझ्या भाषेवर काम करण्यासाठी काही सत्रांमध्ये सहभागी व्हावं लागलं. एखादी ताकदीची भूमिका साकारण्यासाठी तितकीच चांगली तयारी करणं हा माझ्यासाठी नेहमीच आनंददायी अनुभव असतो.

० छोट्या पडद्याकडे वळण्याचा विचार आहे का?
– माझी इतर कामं सांभाळून काही करता येणार असेल तर मी नक्की करेन. माझी कारकीर्द मालिकेपासूनच सुरू झाली. पण मला एका कामात अडकून रहायचं नाहीय. छोट्या पडद्यावर काम करताना तेथील अपेक्षा वेगळ्या असतात. त्याला आवश्यक असणारा वेळ देऊन मला इतर कामं करता येणार असतील तर मी जरूर विचार करीन.
ज्यामुळे प्रसिद्ध झाले आता तेच सिनेमांत करण्याचा पंकज त्रिपाठींचा नकार, चाहत्यांचं मत काय?
० भडक भूमिका करताना त्याचा तुझ्यावर काही व्यक्तिगत परिणाम होतो का?
– अगदीच होतो. ‘एक थी बेगम’साठी आम्ही डान्स बारमध्ये चित्रीकरण करताना मी तिथे नृत्य करणाऱ्या मुलींना भेटले. त्या वातावरणात वावरताना माझ्या सुरक्षित आणि सुखी आयुष्याची प्रकर्षानं जाणीव झाली. तसंच आपल्याकडे नसलेल्या गोष्टींविषयी दुःख न करता आहे त्याचा आनंद मानायला हवा; हे मी त्यावेळी शिकले.
काय करू अन् काय नको! आलिया भट्टच्या डोहाळेजेवणाच्या तयारीत रंगल्या बाळाच्या दोन्ही आज्जी
० विनोदी भूमिका साकारायला आवडेल का?
– हो… मी कधीच विनोदी भूमिका केली नाहीय. विनोदी भूमिका साकारण्याचा प्रयत्न करायला मला नक्की आवडेल. अनेक गंभीर भूमिका केल्यावर त्याच्या विरुद्ध पठडीतली भूमिका साकारणं माझ्यातील कलावंतासाठी आव्हान असेल. ही वाटही चोखाळून पहायला मला आवडेल.

० तुझा ड्रीम रोल कोणता?
– पोलिस किंवा संरक्षण दलाच्या माध्यमातून देशसेवा करणाऱ्या स्त्रियांविषयी मला फार आकर्षण आहे. तशी भूमिका करायला मला आवडेल. तसंच मला क्रीडा क्षेत्रातील खेळाडूची भूमिका करण्याचीही फार इच्छा आहे. मला खेळात रस असल्यामुळे त्याप्रकारची भूमिका साकारायला मी केव्हाही तयार आहे.