Elizabeth II: राणी एलिझाबेथ द्वितीय यांनी कमल हसन यांची भेट घेतली, सीनही केलेला शूट पण…

मुंबई- इंग्लंडच्या दुसऱ्या राणी एलिझाबेथ यांचे वयाच्या ९६ व्या वर्षी निधन झाले. त्यांच्या निधनानंतर राणी एलिझाबेथ यांच्या आठवणींना उजाळा देण्यात येत आहे. यामध्ये दाक्षिणात्य सिनेसृष्टीतील अभिनेते कमल हसन यांच्या आयुष्यातही एक आठवण आहे. कमल यांच्या मरूधानयागम या सिनेमाच्या सेटवर राणी एलिझाबेथ या पाहुण्या म्हणून गेल्या होत्या. प्रचंड संघर्ष करून कमल हसन यांनी हा सिनेमा बनवला होता. सिनेमा जरी फारसा चालला नसला तरी राणी एलिझाबेथ यांच्या सेटवरील उपस्थितीने या सिनेमाची जोरदार चर्चा झाली होती.

राणी एलिझाबेथने दिलेल्या निमंत्रणाला बिग बींनी दिलेला नकार

बॉलिवूड असो किंवा टॉलिवूड, प्रत्येक कलाकाराला संघर्ष चुकलेला नाही. कमल हसन यांनी हिंदी आणि दाक्षिणात्य सिनेमासृष्टीत नाव कमावलं असलं तरी त्यांनी सुरूवातीच्या काळात मोठा संघर्ष केला आहे. त्याच काळातील त्यांच्या मरूधानयागम या सिनेमाचा उल्लेख आजही केला जातो.

१९९१ पासून मरूधानयागम या सिनेमाच्या स्क्रिप्टवर काम सुरू होतं, पण सिनेमाचं शूटिंग सुरू व्हायला १९९७ हे वर्ष उजाडलं. त्या काळात ८० कोटी बजेटचा हा सिनेमा सर्वात महागडा सिनेमा होता. इतकं बजेट लावूनही हा सिनेमा पूर्ण होऊ शकला नाही. पण या सिनेमाची आज २५ वर्षांनी पुन्हा चर्चेत आला तो राणी एलिझाबेथ यांच्या निधनानंतर. याच सिनेमाच्या सेटवर राणी एलिझाबेथ यांची उपस्थिती होती. इंग्लंडच्या राणीने या सिनेमाच्या सेटवर येऊन शूटिंग कसे चालते याचा अनुभव घेतला होता.

चेन्नईच्या एमजीआर फिल्म सिटीमध्ये या सिनेमाचं शूटिंग सुरू झालं होतं. १८ व्या शतकातील मोहम्मद युसूफ खान या योद्ध्यावर हा सिनेमा आधारीत होता. यादरम्यान राणी एलिझाबेथ या भारतदौऱ्यावर आल्या होत्या. त्यांनी मरूधानयागम सिनेमाच्या सेटवर २० मिनिटं भेट दिली. यावेळी त्यांच्यासोबत तत्कालीन मुख्यमंत्री करूणानिधीही होते. कमल हसन यांना राणी एलिझाबेथ यांच्या निधनाची बातमी ऐकल्यानंतर त्यांच्या भेटीची आठवण झाली.

कसं होतं महाराणी एलिथाबेथचं आयुष्य…? जाणून घ्यायचं असेल तर हे सिनेमे आणि सीरिज पाहाच

राणी एलिझाबेथ यांचे निधन झाल्यानंतर जगभरातून त्यांना श्रद्धांजली वाहण्यात येत आहे. सोशल मीडियावरही त्यांचे अनेक फोटो शेअर होत आहेत. यामध्ये कमल हसन यांच्या एका चाहत्याने मरूधानयागम हा सिनेमा पुन्हा प्रदर्शित करावा अशी मागणी केली आहे. बजेट आणि आर्थिक टंचाई यामुळे हा सिनेमा बंद करावा लागला होता, पण पुन्हा हा सिनेमा पडद्यावर आणण्याची इच्छा असल्याचं कमल हसन यांनी एका कार्यक्रमात बोलून दाखवलं होतं.