बायकोचा छळ, बलात्काराचा खोटा आरोप; मराठी कलाकारांची वादाची मालिका

दुसरी बाजू

सिनेसृष्टीत काम करणाऱ्या सेलिब्रिटींचं आयुष्य नेहमीच चर्चेचा विषय ठरतो. अलिशान घरं, महागड्या गाड्या, ब्रॅन्डेड कपडे हे सगळं त्यांच्या आयुष्याचा भाग असतातच पण त्यांचं आयुष्यही अतिशय खडतर असतं. बाहेरून जेवढं त्यांचं आयुष्य छान दिसतं, त्यांचं आनंदी, चकचकीत आयुष्य पाहून आपल्याला हेवा वाटतो. परंतु वास्तवात मात्र त्यांचं आयुष्य जेवढं दिसतं तेवढं सुखी नसतं. ते देखील अनेकदा वादात अडकतात. त्यांच्यावरही गंभीर आरोप करण्यात येतात.

जमिनीची बेकायदा विक्री

मुळशी तालुक्यातील डोंगरगाव येथील जमिनीची बेकायदा विक्री केल्याप्रकरणी प्रसिद्ध अभितेने विक्रम गोखले यांच्यासह तिघांवर फसवणुकीचा गुन्हा दाखल करण्यात आला होता. स्वत:च्या आर्थिक फायद्याकरिता ही जमीन विक्री करून १४ जणांची ९६ लाख ९९ हजार रुपयांची फसवणूक केल्याचं तक्रारीत नमूद करण्यात आलं होतं. तसंच काही महिन्यांपूर्वी ‘देशाला कोणाच्याही मदतीनं स्वातंत्र्य मिळालेलं नाही, तर ते भीक मागून मिळालं आहे,’असं वादग्रस्त वक्तव्य विक्रम गोखले यांनी केलं होतं.

बायकोचा मानसिक व शारीरिक छळ

काही महिन्यांपूर्वी अभिनेता अनिकेत विश्वासराव याच्याविरुद्ध त्याच्या पत्नीनं मानसिक व शारीरिक छळ केल्याची तक्रार अलंकार पोलिस ठाण्यात दिली आहे. त्यानुसार अनिकेत याच्यासह त्याच्या आई-वडिलांवर मारहाण, कौटुंबिक छळ, धमकाविणं अशा कलमांनुसार गुन्हा दाखल करण्यात आला आहे. पोलिसांनी दिलेल्या माहितीनुसार, करिअरमध्ये आपल्यापेक्षा पुढं जाऊन पत्नीचं नाव मोठे होईल, या भीतीनं तिला जीवे मारण्याची धमकी दिली. मारहाण केली. लोकांसमोर अपमानास्पद वागणूक देऊन छळ केला. स्नेहा यांच्या सासू, सासरे यांनी तक्रारदारांवर होणाऱ्या अत्याचाराला न रोखता मदत केली, असं तक्रारीत म्हटलं आहे.

लग्न, घटस्फोट आणि…

अभिनेत्री स्नेहा वाघ आणि अभिनेता अविष्कार दारव्हेकर यांचं खासगी आयुष्य आता पुन्हा एकदा चर्चेत आलं आहे. बिग बॉसमध्ये त्यांच्या पूर्वायुष्याबद्दल तिनं सांगितलेल्या घटनांची सोशल मीडिया प्रचंड चर्चा झाली.अविष्कारासोबतच्या लग्नाबद्दल सांगताना स्नेहा म्हणाली होती, ‘त्या आठवणी खूप दुःख देणाऱ्या आहेत. इतक्या वाईट आहेत की मला त्या आठवल्या तरी त्रास होतो. तो मला खूप मारायचा. माझा छळ करायचा. आणि महत्वाचं म्हणजे या गोष्टी सगळ्यांना माहीत होत्या. अगदी माझ्या मालिकेच्या सेटवरच्या लोकांनासुद्धा सगळं माहीत होतं. रोज सेटवर गेल्यावर माझ्या चेहऱ्यावर किंवा शरीरावर डाग असायचे. मी अर्धमेल्या अवस्थेत सेटवर जायचे. सेटवरचे सगळे मला समजून घ्यायचे. मला वेळ द्यायचे. ते माझ्यासाठी धावपळ करायचे.’

तसंच अविष्कारच्या दुसऱ्या पत्नीनंही त्याच्यावर गंभीर आरोप केले आहेत. तसंच आता त्यानं तिसऱ्यांदा संसारही थाटला आहे.

विनयभंगाची खोटी तक्रार

काही मालिकांमधून प्रेक्षकांच्या भेटीला आलेली अभिनेत्री सारा श्रवण एका वेगळ्याच कारणामुळं चर्चेत आली होती. चित्रपट अभिनेत्याविरुद्ध विनयभंगाची तक्रार देऊन खंडणी उकळल्याच्या आरोपावरून दाखल गुन्ह्यात अभिनेत्री सारा श्रवण उर्फ सारा गणेश सोनवणे (वय ३२, रा. दुबई, मूळ मुंबई) हिला पुणे पोलिसांच्या गुन्हे शाखेनं मुंबईतून दोन -तीन वर्षांपू्र्वी अटक केली होती. त्यानंतर सारा हिची कोर्टानं जामिनावर सुटका केली होती.

वादग्रस्त वक्तव्य

अहिंसा परमो धर्म: यामध्ये केवळ अर्धाच श्लोक आम्हाला शिकवला गेला. अहिंसा हा सर्वश्रेष्ठ धर्म आहे आणि या सर्वश्रेष्ठ धर्माच्या रक्षणासाठी हातात शस्त्र उचलणे हा त्याही पेक्षा मोठा धर्म आहे हे आम्हाला शिकवलं नाही. अहिंसेसारखे दुसरे शस्त्र नाही. अहिंसा परमो धर्म:चे एवढे डोस आम्हाला पाजले की हा हिंदू समाज अहिंसक होता होता नपुसंक कधी झाला हेच आम्हाला कळले नाही, असे परखड मत सावरकर अभ्यासक, अभिनेते शरद पोंक्षे यांनी काही दिवसांपूर्वी मांडलं होतं.