जोफ्रा आर्चर पुन्हा ठरला अनलकी, सलग दुसऱ्या टी20 वर्ल्ड कपमधून ‘आऊट’

मुंबई, २ सप्टेंबर: ऑस्ट्रेलियात होणारा टी20 विश्वचषक आता अवघ्या दीड महिन्यांवर आला आहे. याच पार्श्वभूमीवर ऑस्ट्रेलियापाठोपाठ इंग्लंडनही टी20 विश्वचषकाची मोर्चेबांधणी सुरु केली आहे. आज इंग्लंड क्रिकेट बोर्डानं विश्वचषकासाठी आपला 15 सदस्यीय संघ जाहीर केला. यष्टिरक्षक फलंदाज जोस बटलरकडे संघाची धुरा सोपवण्यात आली आहे. विश्वचषकासाटी ख्रिस वोक्स आणि मार्क वुडचं संघात पुनरागमन झालं आहे. तर इंग्लंडच्या दोन महत्वाच्या शिलेदारांना मात्र दुखापतीमुळे या विश्वचषकाला मुकावं लागणार आहे. त्यात 2019 साली इंग्लंडला वन डे विश्वचषक जिंकून देणाऱ्या जोफ्रा आर्चरचाही समावेश आहे.

आर्चर सलग दुसऱ्या टी20 विश्वचषकातून बाहेर

जोफ्रा आर्चरनं 2019 च्या वन डे विश्वचषकात इंग्लंडच्या विजयात मोठं योगदान दिलं होतं. अखेरची निर्णायक सुपर ओव्हर आर्चरनंच टाकली होती. आणि त्याच ओव्हरमध्ये इंग्लंडनं न्यूझीलंडच्या ताटातला विजयाचा घास हिरावून घेतला होता. आणि पहिल्यांदाच इंग्लंडचा संघ विश्वविजेता झाला. पण त्यानंतर मात्र दुखापतीनं आर्चरची पाठ पकडली.

आर्चरनं आपला शेवटचा आंतरराष्ट्रीय सामना मार्च 2021 मध्ये खेळला होता. तेव्हापासून गेले दीड वर्ष तो एल्बो इन्ज्युरीमुळे (कोपराला झालेली दुखापत) आंतरराष्ट्रीय क्रिकेटपासून दूर आहे. यादरम्यान त्याच्यावर दोन वेळा शस्त्रक्रिया करण्यात आली. पण अजूनही तो पुरेसा फिट नसल्यानं इंग्लंडनं त्याला आगामी विश्वचषकासाठी संघात स्थान दिलं नाही. त्यामुळे यूएईतल्या वर्ल्ड कपनंतर आर्चर आता ऑस्ट्रेलियातल्या वर्ल्ड कपलादेखील मुकणार आहे. आर्चरसह जेसन रॉय देखील विश्वचषक संघातून दुखापतीमुळे आऊट झालाय.

Squad 🙌 #T20WorldCup 🏏 🌏 🏆 pic.twitter.com/k539Gzd5Ka

— England Cricket (@englandcricket) September 2, 2022

हेही वाचा – Asia Cup 2022: सुट्टीच्या दिवशी रोहित अँड कंपनीची दुबईत मजा मस्ती, बीसीसीआयनं शेअर केला Video

इंग्लंडचा टी20 विश्वचषक संघ

जोस बटलर (कर्णधार), मोईन अली, जॉनी बेअरस्टो,  हॅरी ब्रुक, सॅम करन,  ख्रिस जॉर्डन, लियाम लिविंगस्टोन, डेविड मलान, आदिल रशिद,  फिलिप सॉल्ट, बेन स्टोक्स,  रीस टॉपली, डेव्हिड विली, ख्रिस वोक्स, मार्क वुड