MajhiNews Marathi News, Latest Marathi News, Marathi News Paper, Maharashtra Breaking News | मराठी ताज्या बातम्या
शैक्षणिक वर्ष २०२२-२३ मध्ये शिक्षण हक्क कायद्याअंतर्गत (RTE) दिल्या जाणाऱ्या २५ टक्के प्रवेशांसाठी राज्यात १ लाख १ हजार ९७७ जागा उपलब्ध होणार आहेत. या जागांसाठी राज्यभरात एकूण २ लाख ८२ हजार ७७८ अर्ज दाखल झाले आहेत. पुणे (Pune) जिल्ह्यात राज्यात सर्वाधिक अर्ज दाखल झाले असून जिल्ह्यातील १५ हजार १३१ जागांसाठी ६२ हजार ९५६ अर्ज दाखल झाले आहेत. त्यामुळे यंदा प्रवेशासाठी (RTE Admissions 2022) मोठी चुरस असल्याचे स्पष्ट झाले. येत्या सोमवारपासून पालकांसाठी आरटीई प्रवेशांची प्रक्रिया सुरू होणार आहे.
आरटीई प्रवेशांसाठीची या शैक्षणिक वर्षाची सोडत बुधवारी जाहीर करण्यात आली. प्राथमिक शिक्षण संचालनालयाचे संचालक दिनकर टेमकर यांनी ही सोडत जाहीर केली. यामध्ये या वर्षी एक लाख एक हजार ९७७ विद्यार्थ्यांना प्रवेश मिळणार असल्याचे जाहीर करण्यात आले. सोडतीत आपला क्रमांक लागला आहे की नाही, याचीही माहिती येत्या सोमवारपासून दिली जाणार आहे. सोडतीमध्ये प्रवेश निश्चित झालेल्या पालकांना त्यानंतर एसएमएसद्वारे सूचित करण्यात येणार आहे. मंगळवारपासून प्रवेश निश्चित झालेल्या पालकांना प्रवेश घेण्यासाठी पंधरा दिवसांची मुदत देण्यात येईल. या नंतर प्रतीक्षायादीतील विद्यार्थ्यांच्या प्रवेशाची प्रक्रिया सुरू होईल, असे प्राथमिक शिक्षण संचालक दिनकर टेमकर यांनी स्पष्ट केले. सप्टेंबर २०२२ पर्यंत आरटीई प्रवेशांची संपूर्ण प्रक्रिया पूर्ण करण्याचे नियोजन करण्यात आले असल्याचे त्यांनी सांगितले.
शैक्षणिक वर्ष २०२१-२२ या वर्षामध्ये आरटीई प्रवेशांसाठी दोन लाख २५ हजार अर्ज प्राप्त झाले होते. या वेळी ९६ हजार जागा प्रवेशासाठी उपलब्ध करण्यात आल्या होत्या. यंदा प्रवेशांच्या जागांमध्ये गेल्या वर्षाच्या तुलनेत जवळपास सात हजार जागांची वाढ झाली आहे. प्रवेशांसाठी आलेल्या अर्जांमध्ये साठ हजारांपेक्षा अधिक अर्जांची वाढ झाली आहे.
पोदार शाळेसाठी ३५०० अर्ज
पुण्यातील पोदार इंटरनॅशनल स्कूल (Podar International School, Pune) या शाळेमध्ये आरटीई प्रवेशांच्या ७४ जागा उपलब्ध आहेत. या जागांसाठी तब्बल ३५०० अर्ज दाखल झाल्याची माहिती प्राथमिक शिक्षण विभागाकडून देण्यात आली आहे. केवळ ७४ जागांसाठी तीन हजारांहून अधिक अर्ज आल्याने ही शाळा राज्यातील सर्वाधिक अर्ज प्राप्त करणारी शाळा ठरली आहे.
पालकांसाठी महत्त्वाचे
१. येत्या सोमवारी (४ एप्रिल) सायंकाळी चार वाजता सोडत प्रसिद्ध होणार.
२. मंगळवारपासून सोडतीमध्ये प्रवेश निश्चित झालेल्या पालकांना एसएमएस येण्यास सुरूवात.
३. सोडतीमध्ये प्रवेश निश्चित झालेल्या पालकांनी १५ दिवसांच्या आत प्रवेश घेणे बंधनकारक
४. पहिल्या फेरीतील प्रवेश प्रक्रिया पूर्ण झाल्यानंतर प्रतीक्षा यादीतील प्रवेश सुरू होणार.
५. प्रवेश निश्चित झालेल्या पालकांनी त्यांच्या शाळांमध्ये जाऊन कागदपत्रांची पडताळणी करणे आवश्यक
आरटीई प्रवेशांसाठीची सोडत बुधवारी जाहीर करण्यात आली आहे. सोमवारपासून प्रत्येक जिल्ह्यामध्ये प्रत्यक्ष प्रवेश प्रक्रिया सुरू होईल. ज्या विद्यार्थ्यांचे सोडतीमध्ये प्रवेश निश्चित झाले आहेत, अशा विद्यार्थ्यांच्या पालकांनी लवकरात लवकर आपले प्रवेश घ्यावेत.
– दिनकर टेमकर, संचालक, प्राथमिक शिक्षण विभाग
मुंबई महापालिका शाळेत सीबीएसई, आयसीएसई प्रवेश क्षमतेत वाढ
MHT CET 2022: कोणत्या अभ्यासक्रमाची सीईटी कधी? जाणून घ्या
