स्मृतीचं शतक हुकलं, टीम इंडियानं इंग्लंडला पहिल्या वन डेत धू धू धुतलं

होव-इंग्लंड, 18 सप्टेंबर: सलामीवीर स्मृती मानधनाच्या दमदार खेळीच्या जोरावर भारतीय महिला संघानं इंग्लंडचा पहिल्या वन डेत 7 विकेट्सनी धुव्वा उडवला. भारतानं या विजयासह तीन सामन्यांच्या मालिकेत 1-0 अशी आघाडी घेतली आहे. इंग्लंडनं या सामन्यात भारतासमोर 228 धावांचं आव्हान ठेवलं होतं. स्मृती मानधना, यास्तिका भाटिया आणि कर्णधार हरमनप्रीतच्या नाबाद अर्धशतकांच्या जोरावर भारतानं हे आव्हान 34 चेंडू आणि 7 विकेट्स राखून पार केलं.

स्मृतीचं शतक हुकलं

228 धावांचं आव्हान घेऊन मैदानात उतरलेल्या भारतीय संघाची सुरुवात खराब झाली. सलामीची शफाली वर्मा अवघ्या एका धावेवर बाद झाली. पण त्यानंतर स्मृतीनं यास्तिका भाटियाच्या साथीनं भारताच्या विजयाचा पाया रचला. त्या दोघींनी दुसऱ्या विकेटसाठी 96 धावांची भागीदारी केली. यास्तिका 50 धावा काढून माघारी परतली. मग स्मृतीनं कर्णधार हरमनसह तिसऱ्या विकेटसाठी 99 धावांची आणखी एक मोठी भागीदारी साकारली. मात्र 91 धावांवर असताना सोपा कॅच देऊन ती बाद झाली. स्मृतीचं शतक अवघ्या 9 धावांनी हुकलं. त्यानंतर हरमननं विजयाचे सोपस्कार पूर्ण केले. तिनं नाबाद 74 धावांची खेळी केली.

Smriti Mandhana falls nine short of a ton, but India edge closer to a win 💪🏻#ENGvIND | #IWC | Scorecard: https://t.co/h9adyFyBCC pic.twitter.com/6ouBp4UYOQ

— ICC (@ICC) September 18, 2022

हेही वाचा – IndW vs EngW:  जोडी तुझी माझी… गेल्या 20 वर्षात भारतीय महिला क्रिकेटमध्ये हे पहिल्यांदाच घडलं

भारताचा प्रभावी मारा

त्याआधी भारताच्या सर्वच गोलंदाजांनी अतिशय नियंत्रित मारा केला. त्यामुळे इंग्लंडला 50 ओव्हरमध्ये 7 बाद 227 धावाच करता आल्या. अखेरची मालिका खेळणाऱ्या झुलन गोस्वामीनं 10 ओव्हरमध्ये केवळ 20 धावा देताना एक विकेट घेतली. तर दिप्ती शर्मानं 33 धावात दोन विकेट्स घेतल्या. याशिवाय मेघना सिंग, हर्लिन देओल, स्नेह राणा आणि राजेश्वरी गायकवाडनं प्रत्येकी एक विकेट घेतली.

India win comprehensively to take a 1-0 lead in the ODI series 👏🏻#ENGvIND | #IWC | Scorecard: https://t.co/h9adyFyBCC pic.twitter.com/MfvRN4AZGS

— ICC (@ICC) September 18, 2022

सर्व काही झुलनसाठी  

99 चेंडूत नाबाद 91 धावा करणाऱ्या स्मृती मानधानाला सामनावीर पुरस्कार देण्यात आला. यावेळी स्मृतीनं ‘ही मालिका आम्ही झुलनसाठी खेळतोय. आम्ही या मालिकेत जे काही करतोय ते केवळ झुलनसाठी’ अशी भावना व्यक्त केली. भारतीय संघाची अनुभवी गोलंदाज झुलनची आंतरराष्ट्रीय कारकीर्दीतली ही अखेरची मालिका आहे. या मालिकेतल्या अखेरच्या लॉर्डस वन डेनंतर झुलन आंतरराष्ट्रीय क्रिकेटमधून निवृत्त होत आहे.

Published by:Siddhesh Kanase

First published: September 18, 2022, 23:29 IST