अजिंक्य राऊतवर कोसळला दुःखाचा डोंगर, तरीही हसऱ्या चेहऱ्यानं चाहत्यांना गेला सामोरा

मन उडू उडू झालं मालिकेतून घराघरात इंद्रा म्हणजेच अजिंक्य राऊत लोकप्रिय झाला आहे. काही दिवसांपूर्वी या मालिकेनं प्रेक्षकांचा निरोप घेतला. त्यानंतर अजिंक्यचा ‘टकाटक २’ हा सिनेमा प्रेक्षकांच्या भेटीला आला. त्यामुळे अजिंक्य अभिनयाच्या क्षेत्रामध्ये एक एक पाऊल पुढे जात आहे. त्याची लोकप्रियता देखील दिवसागणिक वाढत आहे. तरुणांमध्ये खास करून तरुणींमध्ये तो खूपच लोकप्रिय झाला आहे. अजिंक्यकडे काही प्रोजेक्ट असून त्यावर त्याचं कामही सुरू आहे. हे काम सुरू असताना अजिंक्यच्या आयुष्यात घडलेल्या एका दुःखद घटनेनं त्याला मोठा धक्का बसला. त्याच दिवशी अजिंक्यच्या आयुष्यात कलाकाराच्या दृष्टीनं चांगली घटनादेखील घडली. या दोन्ही घटना एकाच दिवशी घडल्याबद्दल भावुक करणारी पोस्ट अजिंक्यनं त्याच्या सोशल मीडियावर शेअर केली आहे.

हसऱ्या चेहऱ्याने सगळ्यांना सामोरं गेला

अनंत चतुर्दशीची सगळीकडे धामधूम सुरू होती. गणपती बाप्पाच्या विसर्जनाच्या तयारीला सगळे लागले होते. परंतु अजिंक्यच्या आयुष्यात मात्र एक दुःखद घटना घडली. काल सकाळी त्याच्या आजीचं निधन झालं. अजिंक्य आजी गेल्याच्या दुःखात होता. परंतु त्याचवेळी त्याला काम आणि त्या संदर्भात दिलेला शब्ददेखील खुणावत होता. आजी गेल्याचं दु:ख उरात ठेवत अजिंक्य संध्याकाळी हसऱ्या चेहऱ्यानं गणपती मंडळाला आणि तिथं असलेल्या चाहत्यांच्या भेटीला गेला. सर्वांशी हसून खेळून बोलला, चाहत्यांबरोबर फोटोही काढले.

सकाळी आजी गेली आणि संध्याकाळी कार्यक्रम होता

एकाच दिवशी आलेले हे दोन टोकच्या अनुभवांवर आधारीत एक भावुक करणारी पोस्ट अजिंक्यनं सोशल मीडियावर शेअर केली आहे. ही पोस्ट शेअर करत गणपती मंडळाला दिलेल्या भेटीचे फोटो त्यानं पोस्ट केले आहेत. अजिंक्यनं पोस्टमध्ये लिहिलं की, ‘काल सकाळी माझी आजी वारली आणि संध्याकाळी एका कार्यक्रमात जायचं होतं. खरं तर कार्यक्रमाला जाण्याची मनस्थिती नव्हती. दिवसभर मी खचून गेलो होतो. काल मला माझ्या जबाबादारीची जाणीव झाली. गणपती मंडळाची भेट मी रद्दही करू शकलो असतो आणि आजीच्या निधनावर शोक व्यक्त करू शकलो असतो. परंतु आई वडिलांनी मला स्पष्टपणे हसतमुख चेहऱ्यानं कार्यक्रमाला जा असं सांगितलं. माझं काम माझी जबाबदारी आहे आणि माझ्या आजीचीही इच्छा होती की मी अभिनेता व्हावं’.

आजीची सेवा करावी अशी इच्छा होती

अजिंक्यनं पोस्टमध्ये पुढं म्हटलं की,’शेवटच्या दिवसात आजीची सेवा करावी अशी माझी इच्छा होती. परंतु माझ्या कामामुळे ते शक्य झालं नाही. माझ्या कामानं मला कुटुंबापासून दूर ठेवलं आणि याचं मी काहीही करू शकलो नाही.’ पोस्टमध्ये अजिंक्य खूपच भावुक झालेला दिसतो. त्यानं लिहिलं की, ‘मी सगळ्यांना विनंती करतो. तुम्ही तुमचं प्रेम व्यक्त करा जेव्हा शक्य होईल तेव्हा व्यक्त व्हा.’

तिच्यासोबत राहू शकलो नाही

तुमच्या जवळच्या माणसांसाठी महत्त्वाच्या वेळी उपस्थित रहा. कारण आयुष्यातील ते नाजूक क्षण निघून गेले की ते कधीच परत आणता येत नाही. माणूस गेला की त्याला परत आणण्यासाठी आपण काहीही करू शकत नाही. बाप्पा माझ्या आजीच्या आत्म्याला शांती लाभो. नातू म्हणून मला खात्री आहे की मी तिच्यासोबत राहू शकलो नाही. तिला माझा कायम अभिमान होता ती नेहमी म्हणायची, माझा अजिंक्य कसा काम करतो, माझा नातू, माझा इठुराया.’

प्रेक्षकांशिवाय मी काहीच नाही

शेवटी अजिंक्यनं लिहिलं की, ‘प्रेक्षकांच्या प्रेमाशिवाय मी अभिनेता म्हणून काहीच नाही. माझ्या आणि माझ्या ऑनस्क्रीन पात्रांवर तुम्ही व्यक्त केलेल्या प्रेमाबद्दल धन्यवाद. अजून खूप लांबचा पल्ला गाठायचा आहे’, असंही अजिंक्य शेवटी म्हणाला. अजिंक्यच्या या पोस्टवर शिल्पा तुळसकरसह अनेक सेलिब्रिटींनी त्याच्या या पोस्टवर प्रतिक्रिया दिल्या आहेत. तसेच त्याच्या चाहत्यांनीही अजिंक्यला धीर दिला आहे.