उर्वशी रौताला पंतनंतर आता पाकिस्तानच्या नसीम शाहवर फिदा; व्हिडिओ शेअर केला खरा, पण…

दुबई : आशिया चषकात जेवढी रिषभ पंतची चर्चा झाली तेवढी बॉलीवूडच्या उर्वशी रौतालाची झाली. आपल्या अदांनी तर तिने सर्वांना घायाळ केलेच, पण आता ती रिषभ पंत नाही तर पाकिस्तानचा मॅचविनर नसीम शाहवर फिदा असल्याचे पाहायला मिळाले. उर्वशीने एक व्हिडिओ शेअर केला आहे, या व्हिडीओची चर्चा सध्याच्या घडीला क्रिकेट विश्वात चांगलीच रंगली आहे.

पाकिस्तान क्रिकेट संघाचा स्टार वेगवान गोलंदाज नसीम शाह सध्या त्याच्या गोलंदाजीपेक्षा फलंदाजीमुळे जास्त चर्चेत आहे. नसीमने आशिया चषकाच्या सुपर-४ फेरीत सलग दोन षटकार मारून संघाला अफगाणिस्तानविरुद्ध रोमहर्षक विजय मिळवून दिला होता. हा सामना पाकिस्तानी संघाने तर जिंकलाच पण त्यासोबतच भारतालाही अंतिम फेरीच्या शर्यतीतून बाहेर पडावे लागले. नसीमचा हा दमदार खेळ पाहून मिस इंडिया राहिलेली बॉलीवूड अभिनेत्री उर्वशी रौतेलाही तिची फॅन झाली आणि तिने इन्स्टाग्रामवर एक व्हिडिओ स्टोरीही शेअर केली. उर्वशी एका फ्रेममध्ये तर नसीम शाह दुसऱ्या फ्रेममध्ये होता.

उर्वशीच्या या इन्स्टाग्राम स्टोरीनंतर नसीम शाहच्या चर्चेचा बाजार चांगलाच तापला होता. मात्र, आता नसीमने उर्वशीबाबत असे विधान केले आहे, जे तिला नक्कीच शोभणार नाही. वास्तविक, नसीम शाह यांचा एक व्हिडिओ सोशल मीडियावर व्हायरल होत आहे, ज्यामध्ये ते म्हणतात की उर्वशी कोण आहे आणि तिने कोणता व्हिडीओ टाकला हे मला माहीत नाही.

या व्हिडिओमध्ये नसीम म्हणतो, ‘मला असं काही कळत नाही, मी मैदानात खेळतो. लोकं अशा प्रकारे हे सर्व व्हिडिओ पाठवत राहतात. जो कोणी येतो, तो स्टेडियमवर येऊन सामना पाहतो ही त्यांची मेहरबानी आहे. तुम्हाला जे आवडते ते माझ्यासाठी चांगली गोष्ट आहे. माझ्यासाठी कोणी आले तर मी कोणत्या दुसऱ्या जगातून आलो आहे? माझ्यात असं काही खास नाही.’ नसीम शाहने यावेळी उर्वशीच्या या व्हिडिओ पोस्टमधील हवाच काढून टाकली आहे. उर्वशीला त्याने एका सामान्यय चाहत्याप्रमाणेच वागणूक दिली आहे.