पाकिस्तान-अफगाणिस्तानच्या Live सामन्यात जोरदार राडा; खेळाडूने बॅट उगारली आणि…

ही गोष्ट घडली ती सामन्याच्या १९व्या षटकात. त्यावेळी पाकिस्तानचा संघ फलंदाजी करत होता आणि चेंडू अफगाणिस्तानचा वेगवान गोलंदाज फरिद अहमदच्या हातामध्ये होता. अहमदच्या गोलंदाजीचा सामना हा पाकिस्तानचा आसिफ अली करत होता. यावेळी अहमदने अलीला बाद केले. त्यानंतर अहमदने जोरदार सेलिब्रेशन केले. फरिदने जेव्हा सेलिब्रेशन केले त्यावेळी तेव्हा त्याच्यासमोर अली उभा होता. अलीला या गोष्टीचा राग आला आणि त्याने अहमदला ढकलले. त्यानंतर अलीचा पारा चढला आणि त्याने थेट त्याच्यावर बॅट उगारल्याचे पाहायला मिळाले. यावेळी पंचांनी आणि अफगाणिस्तानच्या खेळाडूंना हस्तक्षेप केला आणि त्यामुळेच या गोष्टीने रौद्ररुप धारण केले नाही. पण या गोष्टीचा व्हिडिओ चांगलाच व्हायरल झाला आणि यावेळी नेमकं काय घडलं ते या व्हिडिओमध्ये पाहायला मिळत आहे.

ही गोष्ट सामन्याच्या १९व्या षटाकत घडली. पण पाकिस्तानने अखेरच्या षटकात थरारक विजय साकारला. पहिल्याच षटकात पाकिस्तानला बाबर आझमच्या रुपात मोठा धक्का बसला. बाबरला यावेळी भोपळाही फोडता आला नाही. त्यावेळी पाकिस्तानची १ बाद १ धाव अशी अवस्था झाली होती. पण त्यानंतर पाकिस्तानला एकामागून एक धक्के बसत गेले आणि त्यामुळे पाकिस्तानचा डाव अडचणीत आला. पाकिस्तानने आपला अर्धा संघ ९७ धावांमध्ये बाद झाला. त्यानंतर १३ धावांमध्ये पाकिस्तानने अजून तीन विकेट्स गमावले आणि त्यांची ८ बाद ११० अशी अवस्था झाली होती. त्यामुळे हा सामना आता कोण जिंकणार, याची उत्सुकता वाढली होती. कारण पाकिस्तानला जिंकण्यासाठी यावेळी २० धावांची गरज होती, तर दोन विकेट्स मिळवत अफगाणिस्तानचा संघ विजयी ठरू शकत होता आणि या परिस्थितीवर भारताच्या आशा अवलंबून होत्या. त्यानंतर १९व्या षटकात पाकिस्तानला दुसरा धक्का बसला आणि त्यांची ९ बाद ११८ अशी अवस्था झाली होती. पाकिस्तानला विजयासाठी अखेरच्या षटकात ११ धावा हव्या होत्या. पाकिस्तानच्या नसीम शाहने २०व्या षटकाच्या पहिल्या दोन्ही चेंडूवर षटकार खेचले आणि संघाला थरारक विजय मिळवून दिला. त्यामुळए पाकिस्तानचा संघ आता अंतिम फेरीत पोहोचला आहे.