विराटने दिले जगातील आघाडीच्या १५ जणांना ओपन चॅलेंज; मी येतोय, वर्ल्डकपसाठी तयार रहा

दुबई: आशिया कप स्पर्धेनंतर आंतरराष्ट्रीय क्रिकेट परिषदेने ताजी क्रमवारी जाहीर केली आहे. भारतीय संघाला फायनलमध्ये पोहोचता आले नसले तरी या स्पर्धेत भारताच्या एका खेळाडूने दमदार कामगिरी केली आणि या कामगिरीच्या जोरावर क्रमवारीत मोठा फायदा झालाय.

आयसीसीच्या ताज्या क्रमवारीत भारताचा माजी कर्णधार विराट कोहली याला मोठा फायदा झालाय. कोहलीने अफगाणिस्तानविरुद्ध शतकी खेळी केली होती. या शतकाचा विराटला आयसीसी टी-२० क्रमवारीत १४ स्थानांचा फायदा झाला. ताज्या क्रमवारीत विराट १५व्या स्थानावर पोहोचला असून रोहित शर्मा आणि विराट हे दोनच भारतीय खेळाडू आहेत जे तिनही फॉर्मेटमध्ये पहिल्या १५ मध्ये आहेत.

वाचा- ७१व्या शतकानंतर विराटचा आणखी एक विक्रम; जगातील एकाही क्रिकेटपटूला असा रेकॉर्ड करता आला नाही

आशिया कपच्या आधी विराट कोहली टी-२० मध्ये ३३व्या स्थानावर होता. आता तो १५व्या स्थानावर पोहोचला आहे. विराट कोहलीने फॉर्ममध्ये परत येत क्रमवारीतील आघाडीच्या फलंदाजांना पुन्हा एकदा आव्हान दिले आहे.

विराट कोहलीने ३ वर्षानंतर आंतरराष्ट्रीय क्रिकेटमध्ये शतक झळकावले होते. आशिया कपमध्ये त्याने ५ सामन्यात २७६ धावा केल्या. यामुळेच त्याच्या क्रमवारीत देखील सुधारणा झाल्या.

वाचा- रोहित-द्रविड जोडीचे ‘ब्रह्मास्त्र’ अपयशी; भारताचा हा संघ वर्ल्डकप जिंकणार का?

वाचा- मुंबई इंडियन्समध्ये झाला मोठा बदल, आता झहीर खानवर नवी जबाबदारी तर महेला जयवर्धने…

क्रमवारीत पहिल्या स्थानावर पाकिस्तानचा मोहम्मद रिझवान आहे. तर कर्णधार बाबर आझमला दुसऱ्या स्थानावरून तिसऱ्या स्थानावर घसरला. द.आफ्रिकेचा एडम मार्क्रम दुसऱ्या स्थानावर आहे. चौथ्या स्थानावर भारताचा सूर्यकुमार यादव कायम आहे.