विराटचा आणखी एक विक्रम; जगातील एकाही क्रिकेटपटूला असा रेकॉर्ड करता आला नाही

नवी दिल्ली: भारताचा स्टार फलंदाज आणि माजी कर्णधार विराट कोहलीने एक नवा विक्रम स्वत:च्या नावावर केला आहे. नुकत्याच झालेल्या आशिया कप क्रिकेट स्पर्धेत विराट कोहलीने ७१वे आंतरराष्ट्रीय शतक झळकावले होते. या शतकानंतर विराटने असा एक विक्रम केला आहे जो जगभरातील एकाही क्रिकेटपटूला आजवर करता आला नाही.

भारताची रन मशीन अशी ओळख असलेल्या ३३ वर्षीय विराट कोहलीने सोशल मीडियावर एक नवा विक्रम केला आहे. ट्विटवर विराट कोहलीच्या फॉलोअर्सची संख्या ५० मिलियन म्हणजे ५ कोटींच्या पुढे गेली आहे. ५ कोटींपेक्षा अधिक फॉलोअर्स असलेला विराट हा जगातील पहिला क्रिकेटपटू ठरला आहे. इस्टाग्रामवर विराटचे २११ मिलियन (२१.१ कोटी) फॉलोअर्स आहेत.

वाचा- रोहित-द्रविड जोडीचे ‘ब्रह्मास्त्र’ अपयशी; भारताचा हा संघ वर्ल्डकप जिंकणार का?

फेसबुकवर विराटचे ४९ मिलियन (४.९० कोटी) हून अधिक फॉलोअर्स आहेत. या तिनही सोशल मीडियावर मिळून विराटचे एकूण फॉलोअर्स ३१० मिलियन म्हणजेच ३१ कोटी इतके आहेत.

क्रिकेटपटूंमध्ये विराट कोहलीनंतर मास्टर ब्लास्टर सचिन तेंडुलकरचा क्रमांक लागतो. सचिनच्या फॉलोअर्सची संख्या ३७.८ मिलियन (३.७८ कोटी) इतकी आहे. ट्विटवर सर्वाधिक फॉलोअर्स असलेल्या टॉप १०० लोकांच्यामध्ये फक्त विराट आणि सचिन हे दोनच क्रिकेटपटू आहेत.

वाचा- टी-२० वर्ल्डकपची तयारी करायची की नवा कोच शोधायचा; दक्षिण आफ्रिका संघाला मोठा…

भारतात विराट कोहलीच्या पुढे फक्त…

भारतात सर्वाधिक फॉलोअर्स असलेल्या लोकांमध्ये विराट कोहली तिसऱ्या स्थानावर आहे. अव्वल स्थानी पंतप्रधान नरेंद्र मोदी आहेत. त्यांच्या फॉलोअर्सची संख्या ८.२४ कोटी आहे तर पंतप्रधान कार्यालयाला ५.०५ कोटी लोक फॉलो करतात.

वाचा-

टी-२० वर्ल्डकपमध्ये भारताचे सलामीवीर बदलणार; रोहितसोबत पुन्हा प्रयोग होणार

क्रीडा विश्वातील लोकांचा विचार केल्यास इस्टाग्रामवर सर्वाधिक फॉलोअर्स असणाऱ्यांमध्ये विराट कोहली तिसऱ्या स्थानावर आहे. अव्वल स्थानी पोर्तुगालचा स्टार फुटबॉलपटू क्रिस्टियानो रोनाल्डो असून त्याचे ४५ कोटी फॉलोअर्स आहेत. दुसऱ्या स्थानावर अर्जेंटिनाचा लियोनेल मेसी असून त्याचे ३३.३ कोटी फॉलोअर्स आहेत.