शिक्षणाचे नियंत्रण पुण्यातूनच कशाला?-शिक्षणमंत्री चंद्रकांत पाटील

म. टा. प्रतिनिधी, नगर

‘पंतप्रधान नरेंद्र मोदी यांच्या दृष्टीकोनातून तयार झालेले राष्ट्रीय शिक्षण धोरण विद्यार्थ्यांना स्वाभिमानाने जगायला शिकविणारे आहे. त्यासाठी त्या त्या भागात आवश्यक असणारे अभ्यासक्रम तयार झाले पाहिजे. अशा परिस्थितीत शिक्षणाचे धोरण आणि नियंत्रण पुण्यातूनच कशाला हवे. पुण्याचे धोरण पुण्यातील लोकांनी ठरवावे. मात्र, बाहेरचे त्या भागातील लोकांना ठरविता येईल अशा पद्धतीने विकेंद्रीकरण झाले पाहिजे,’ अशी भूमिका उच्च व तंत्रशिक्षण मंत्री चंद्रकांत पाटील यांनी मांडली.

सावित्रीबाई फुले पुणे विद्यापीठाच्या नगर उपकेंद्राचे भूमिपूजन मंत्री पाटील यांच्या हस्ते मंगळवारी नगरजवळच्या बाबुर्डी बेंद या गावात झाले. त्या वेळी ते बोलत होते. महसूलमंत्री राधाकृष्ण विखे पाटील, विद्यापीठाचे प्र. कुलगुरू डॉ. संजीव सोनवणे, आमदार संग्राम जगताप, समन्वय समितीचे राजेश पांडे, डॉ. प्रफुल्ल पवार, डॉ. राजेंद्र विखे पाटील, नगर उपकेंद्राचे संचालक डॉ. नंदकुमार सोमवंशी, माजी आमदार शिवाजी कर्डिले, भाजपचे शहर जिल्हाध्यक्ष भय्या गंधे, गावच्या सरपंच नमिता पंचमुख, उपसरपंच तानाजी परभाणे उपस्थित होते.

पाटील म्हणाले, ‘माझ्या सामाजिक कामाची सुरुवात अखिल भारतीय विद्यार्थी परिषदेपासून झाली. त्या वेळी आम्ही ज्या मागण्या करीत होतो, त्या आता प्रत्यक्षात येताना पाहत आहोत. ब्रिटिशांनी तयार केलेली शिक्षणपद्धती ही कारकून घडविणारी होती, तर आपली गुरूकुल शिक्षण पद्धती होती. बेरोजगार भत्त्यावर जगण्यापेक्षा स्वाभिमानाने जगणारी पिढी घडविणारी व्यवस्था आपल्या नव्या शिक्षण धोरणातून मिळणार आहे. त्यामुळे आता परंपरागत शिक्षण नको, तर नवीन तंत्रज्ञान शिकून जगाच्या स्पर्धेत उतरविणारे शिक्षण हवे आहे. त्यामुळे शिक्षणातील प्रशासनाचेही विकेंद्रीकरण व्हायला हवे. ते काम अशा उपकेंद्रांच्या माध्यमातून होईल.’

मुंबई पोर्ट ट्रस्टमध्ये विविध पदांची भरती, मराठी तरुणांना नोकरीची संधी
NEET UG परीक्षेचा निकाल पाहण्याची ‘ही’ घ्या थेट लिंक
विखे पाटील म्हणाले, ‘शिक्षण संस्थांचा विस्तार पहाता आता प्रत्येक जिल्ह्यात स्वतंत्र विद्यापीठ होण्याची गरज आहे. शिक्षणाचे नियंत्रण फक्त पुण्यातूनच नको. पुण्याच्या बाहेरही जग आहे. शिक्षण क्षेत्रात ग्रामीण भागाचेही योगदान आहे. त्यामुळे शिक्षणावर पुणेकरांनी मक्तेदारी ठेवू नये. नवे तंत्रज्ञान आत्मसात करून विद्यापीठाने स्वत:च्या कार्यपद्धतीमध्ये आधी बदल करावेत, तरच हे बदल सर्वत्र स्वीकारले जातील.’
SBI Recruitment: स्टेट बँकेत बंपर भरती, तरुणांनो ‘येथे’ पाठवा अर्ज