Teachers Recruitment: पालिकेच्या शाळांमध्ये आऊटसोर्सिंग पद्धतीने शिक्षकभरती

म. टा. वृत्तसेवा, नवी मुंबई

नवी मुंबई महापालिकेच्या वतीने मराठी माध्यमासह इंग्रजी माध्यमाच्या आणि सीबीएसई बोर्डाच्या शाळाही चालवल्या जातात. मात्र या शाळांमध्ये शिक्षकांची संख्या कमी असल्याने विद्यार्थ्यांचे शैक्षणिक नुकसान होत आहे. शिवाय, कार्यरत असलेल्या शिक्षकांवरही अतिरिक्त ताण येत आहे. त्यामुळे या शाळांसाठी आऊटसोर्सिंग पद्धतीने शिक्षकभरती करण्याचा निर्णय नवी मुंबई महापालिकेच्या शिक्षण विभागाच्या वतीने घेण्यात आला आहे. यासाठी निविदाही मागवण्यात आल्या आहेत.

नवी मुंबई महापालिकेच्या वतीने पालिका हद्दीत पहिली ते दहावीपर्यंत मराठी माध्यमाच्या शाळा चालवल्या जातात. तिथे सुमारे ५० हजार विद्यार्थी शिक्षण घेत आहेत. तसेच, शहरात दोन सीबीएसई बोर्डाच्या तर तीन इंग्रजी माध्यमाच्या शाळा आहेत. सीबीएसई बोर्डाची शाळा सीवूड आणि कोपरखैरणे सेक्टर १२ येथे आहे. तर, इंग्रजी माध्यमाची शाळा नेरूळमधील कुकशेत गाव आणि ऐरोलीतील काचेच्या शाळेत भरते. यावर्षी म्हणजे २०२२-२३ या शैक्षणिक वर्षापासून तुर्भे येथेही इंग्रजी माध्यमाची शाळा सुरू करण्यात आली आहे.

ISRO मध्ये विविध पदांची भरती, सरकारी नोकरीसाठी ‘येथे’ करा अर्ज
मात्र या शाळेमध्ये सध्या शिक्षकांची कमतरता आहे. त्यामुळे विद्यार्थ्यांचे शैक्षणिक नुकसान होत आहे. एकाच शिक्षकावर दोन वर्गांची जबाबदारी येत आहे. त्यामुळे शिक्षकही योग्य पद्धतीने प्रत्येक वर्गाला न्याय देऊ शकत नाहीत. त्यामुळे शिक्षकांची भरती करण्याची मागणी पालकांकडून केली जात होती. थेट भरती प्रक्रिया राबवण्यात बराच वेळ जाणार आहे. त्यामुळे त्यासाठी न थांबता मानधनावर शिक्षकांची नेमणूक केली जाणार आहे. त्यामुळे विद्यार्थ्यांचे होणारे शैक्षणिक नुकसान टाळणे, हा मुख्य हेतू आहे, असे पालिकेने म्हटले आहे. त्यानुसार आता शिक्षण मंडळाने ही शिक्षक भरती करण्याचा निर्णय घेतला आहे.

इंग्रजी माध्यमातून बीएड, डीएड असलेल्या शिक्षकांची या माध्यमातून नेमणूक केली जाणार आहे. मात्र ही भरती थेट केली जाणार नसून आऊटसोर्सिंग पद्धतीने केली जाणार आहे. एका ट्रस्टच्या माध्यमातून एजन्सीद्वारे शिक्षकांची मानधनावर नेमणूक केली जाणार आहे. सरासरी १०० शिक्षकांची नेमणूक केली जाणार असल्याची प्रतिक्रिया शिक्षण विभाग उपायुक्त जयदीप पवार यांनी दिली .

शिक्षक हा काही कामगार नाही. एक पिढी घडवण्याचे काम तो करत असतो. त्यामुळे शाळेत शिक्षकांची भरती थेट महापालिकेच्या माध्यमातूनच व्हायला हवी. मानधनावर किंवा कुठल्याही संस्थेच्या माध्यमातून आऊटसोर्सिंग पद्धतीने शिक्षकांची भरतीप्रक्रिया करू नये आणि शिक्षक या पदाचा अपमानही करू नये अशी प्रतिक्रिया शिक्षक प्रतिनिधी सिद्दराम शिलवंत यांनी दिली.

BMC School Teacher: सरकारी उपक्रमाच्या नावाखाली शिक्षकांची अध्यापनाला दांडी
School Privatization: खासगी संस्थांच्या दावणीला शाळा?