Teachers Recruitment: जिल्हापरिषदेच्या शाळांत शिक्षकांची ४५० पदे रिक्त, जाणून घ्या तपशील

म. टा. वृत्तसेवा, भंडारा

ग्रामीण भागातील विद्यार्थ्यांना दर्जेदार शिक्षण देण्याची जबाबदारी असलेल्या जिल्हा परिषद शाळांमधील सुमारे ४५०हून अधिक शिक्षकांची पदे रिक्त आहेत. शिकविणारेच अपुरे असल्याने जिल्हा परिषदेच्या शाळा ओस पडू लागल्या आहेत. राज्य सरकारने शिक्षक भरती थांबविल्याने ग्रामीण भागातील शिक्षण व्यवस्था धोक्यात आली आहे.

ग्रामीण भागात विद्यार्थ्यांना शिक्षण देण्यासाठी जिल्हा परिषदेच्या प्राथमिक, माध्यमिक, उच्च माध्यमिक आणि महाविद्यालये अशी व्यवस्था उभारण्यात आली आहे. गत अनेक वर्षांपासून शिक्षक भरती घेण्यात आली नाही. भंडारा जिल्ह्यात शिक्षकांचा अनुशेष वाढू लागला आहे. शिक्षणासारख्या गंभीर विषयावर राज्य सरकार दुर्लक्ष करीत असल्याने पालकांच्या चिंता वाढल्या आहेत. समायोजनाच्या नावावर ग्रामीण भागातील विद्यार्थ्यांना प्रतीक्षेत ठेवण्यात आले आहे. ही परिस्थिती असतानाच गेल्या १८ वर्षांपासून घड्याळी तासिका शिक्षकांचे मानधन वाढविण्यात आले नाहीत. बीए बीएड, पदवीधर तथा अन्य घड्याळी तासिका शिक्षक म्हणून कार्य करीत आहेत. या शिक्षकांना तीन हजार रुपयांचे तुटपुंजे मानधन देण्यात येते. समाधानकारक मानधन देण्यात येत नसल्याने गावातील शिक्षित तरुण घड्याळी तासिका शिक्षक म्हणून काम करण्यास नकार देत आहेत.

जिल्हा परिषद शिक्षकांची पदे रिक्त असल्याने पहिली ते चौथीचे वर्ग एक किंवा दोन शिक्षक सांभाळतात. ही पोकळी भरून काढण्याची क्षमता घड्याळी तासिका शिक्षकांत आहे. राज्य शासनाने शिक्षक भरती थांबविली असली तरी घड्याळी तासिका शिक्षक भरतीकडे पाठ फिरविली आहे. विद्यार्थ्यांचा शैक्षणिक दर्जा व गुणवत्तापूर्ण शिक्षण देण्यासाठी प्रयत्न करणे, घड्याळी तासिका शिक्षकांचे मानधन वाढविणे गरजेचे असल्याचे मत शिक्षणतज्ज्ञांनी व्यक्त केले आहे.

BMC School: पालिका शाळांमध्ये व्यवसाय शिक्षण शिक्षकाविना
Professor Recruitment:राज्यातील प्राध्यापक भरतीसंदर्भात महाविद्यालयांना सूचना
‘एमपीएससी’ची धास्ती
आतापर्यंत शिक्षक बनण्यासाठी डीएड, बीएड व त्यानंतर टीईटी परीक्षा उत्तीर्ण होणे आवश्यक होते. परंतु, आता एमपीएससीमार्फत शिक्षकांची नियुक्ती करण्याबाबत शासनपातळीवर हालचाली सुरू आहेत. त्यामुळे शिक्षक बनण्याचे स्वप्न उराशी बाळगून असलेल्या राज्यातील हजारो तरुणांमध्ये धास्ती पसरली आहे. एमपीएससीचे दिव्य पार केल्यानंतरच पुढे शिक्षक होता येणार आहे.

School Nutrition Diet: शालेय पोषण आहाराचे १०२ कोटी थकले