T 20 world cup 2022साठी पाकिस्तानचा संघ जाहीर, भारताला नडणारा खेळाडू टीम बाहेर…

नवी दिल्ली : ICC T20 world 2022 साठी पाकिस्तानने १५ जणांचा संघ जाहीर केला आहे. पण या संघात भारतावर एकहाती विजय मिळवून देणाऱ्या खेळाडूलाच संधी देण्यात आलेली नाही. त्यामुळे क्रिकेट विश्वाला या संघ निवडीनंतर एक मोठा धक्का बसला आहे. या संघात वेगवान गोलंदाज शाहीन आफ्रिदी आणि डावखुरा फलंदाज शान मसूद यांचे पुनरागमन झाले आहे.

आयसीसी टी-२० विश्वचषक १६ ऑक्टोबर ते १३ नोव्हेंबर दरम्यान होणार आहे. या स्पर्धेतील पाकिस्तानी संघाचा पहिला सामना कट्टर प्रतिस्पर्धी भारतासोबत होणार आहे. आफ्रिदी आणि शान मसूद यांच्याशिवाय मोहम्मद वसीम ज्युनियरनेही पुनरागमन केले आहे. त्याचबरोबर चॅम्पियन्स ट्रॉफी स्पर्धेच्या अंतिम फेरीत भारतावर एकहाती विजय मिळवून देणारा स्फोटक फलंदाज फखर झमानला यावेळी १५ खेळाडूंच्या संघात स्थान देण्यात आलेले नाही. फखर जमानचा राखीव खेळाडूंमध्ये समावेश करण्यात आला आहे.

पाकिस्तानच्या निवड समितीचे अध्यक्ष मुहम्मद वसीम यांनी गुरुवारी लाहोरमधील पीसीबीच्या (पाकिस्तान क्रिकेट बोर्ड) मुख्यालयात विश्वचषकाशिवाय इंग्लंडविरुद्धच्या आगामी सात सामन्यांच्या घरच्या टी-20 मालिकेसाठी १८ सदस्यीय संघाची घोषणा केली. निवडकर्त्यांनी विश्वचषक संघात कोणताही प्रयोग टाळला आहे, परंतु इंग्लंड मालिकेसाठी अष्टपैलू अमीर जमाल आणि फिरकी गोलंदाज अबरार अहमद या दोन नवीन खेळाडूंचा समावेश केला आहे. याशिवाय राखीव यष्टिरक्षक फलंदाज म्हणून मोहम्मद हारिसचा संघात समावेश करण्यात आला आहे.

नुकत्याच पार पडलेल्या आशिया चषक स्पर्धेत संघाची मधली फळी अपयशी ठरली होती पण वसीम यांनी खेळाडूंवर विश्वास व्यक्त केला, “आम्ही त्याच खेळाडूंवर विश्वास ठेवला आहे ज्यांनी या फॉर्मेटमध्ये आम्हाला वारंवार सामने जिंकून दिले आहेत आणि आम्हाला असेही वाटते की या खेळाडूंनी आम्हाला अनेक सकारात्मक विजय मिळवून दिले आहेत. त्यामुळेच त्यांचा विश्वचषकाचा संघ निवडताना विचार केला गेला आणि त्यांची निवड करण्यात आली. आशिया चषकात पाकिस्तानने चांगली कामगिरी केली. त्यामुळे आता विश्वचषकातही ते चांगली कामगिरी करतील, अशी आम्हाला अपेक्षा आहे.”

ट्वेन्टी-२० विश्वचषक स्पर्धेसाठी पाकिस्तान संघ: बाबर आझम (कर्णधार), शादाब खान (उपकर्णधार), आसिफ अली, हैदर अली, हारिस रौफ, इफ्तिखार अहमद, खुशदिल शाह, मोहम्मद हसनैन, मोहम्मद नवाज, मोहम्मद रिझवान, मोहम्मद वसीम जूनियर, नसीम शाह, शाहीन शाह आफ्रिदी, शान मसूद आणि उस्मान कादिर.