T 20 world cup : भारत-पाकिस्तान सामन्यापूर्वी वाईट बातमी, चाहत्यांना सामना पाहता येणार नाही

नवी दिल्ली : भारत आणि पाकिस्तान यांच्यातील थरार आता ट्वेन्टी-२० विश्वचषकात पाहायला मिळणार आहे. हा सामना २३ ऑक्टोबरला मेलबर्नच्या मैदानात होणार आहे. पण हा सामना सुरु होण्यापूर्वीच आता एक वाईट बातमी समोर आली आहे. आयसीसीने याबाबत अपडेट दिली असून काही प्रेक्षकांना आता हा सामना पाहता येणार नाही, अशी माहिती समोर आली आहे.

भारत आणि पाकिस्तान यांच्यामध्ये बराच कालावधीनंतर दोन सामने आशिया चषक स्पर्धेत पाहायला मिळाले होते. त्यानंतर आता भारत आणि पाकिस्तान यांच्यातील सामना हा ट्वेन्टी-२० विश्वचषकात खेळवला जाणार आहे. पण हा सामना सुरु होण्यापूर्वी आता एक वाईट बातमी आंतरराष्ट्रीय क्रिकेट परिषदेने दिली आहे. कारण हा सामना आता काही प्रेक्षकांना पाहता येणार नाही, अशी माहिती समोर आली आहे.

भारत आणि पाकिस्तान यांच्यातील सामना मैदानात जाऊन पाहण्याची मजा काही औरच असते. त्यासाठी चाहते कितीही पैसे मोजायला तयार असतात. पण आता काही चाहत्यांची घोर निराशा झाली आहे. कारण भारत आणि पाकिस्तान यांच्यातील मेलबर्न येथे होणाऱ्या सामन्याची सर्व तिकिट विकली गेली आहे. मेलबर्न या मैदानाची आसन क्षमता ही १ लाख एवढी आहे. आयसीसीने सुरुवातीला काही तिकिटेच विक्रीला काढली होती. पण ही तिकिटं काही क्षणात विकली गेली. त्यानंतर आयसीसीने तिकिटांचा सर्व कोटा विक्रीसाठी काढला. या तिकीटीही हातोहात खपल्या. त्यामुळे आता भारत आणि पाकिस्तान यांच्याती सामना जर कोणाला मैदानात जाऊन पाहण्याची इच्छा असेल तर ती आता पूर्ण होणार नाही.

आशिया चषक स्पर्धेत भारत आणि पाकिस्तान यांच्यात दोन सामने खेळवले गेले. यामधील पहिला सामना भारताने सहज जिंकला होता. त्यानंतर दुसरा सामना हा सुपर -४ फेरीत खेळवला गेला. या सामन्यात पाकिस्तानने भारतावर विजय साकारला आणि त्यामुळेच भारतीय संघाला मोठा धक्का बसला. हा सामना भारताने जिंकला असता तर त्यांना अंतिम फेरीचा दरवाजा खुला झाला असता. पण हा सामना गमावल्यावर मात्र भारतीय संघ अंतिम फेरीच्या शर्यतीतून जवळपास बाहेर पडला होता. पाकिस्तानने हा विजय मोक्याच्या क्षणी साकारला होता. त्यामुळे आता या पराभवाचा बदला भारतीय संघ विश्वचषकात घेणार की नाही, याची उत्सुकता सर्वांनाच असेल. त्यामुळे या सामन्याला आता विशेष महत्व प्राप्त झालेले आहे.