महेशचा कॅन्सर आमच्यासाठी धक्कादायक होता पण… कठीण दिवसांच्या आठवणीत मेधा मांजरेकर भावुक

मुंबई: बिग बॉस मराठीचे चौथे पर्व (Bigg Boss Marathi 4) येत्या २ ऑक्टोबरपासून सुरुवात होणार आहे. या पर्वाच्या सूत्रसंचालनाची धुरा पुन्हा एकदा महेश मांजरेकर यांच्याकडेच आहे. महेश मांजरेकर गेल्यावर्षी कर्करोगासारख्या जीवघेण्या (Mahesh Manjrekar Cancer Fight) आजारातून बाहेर पडले आहेत. गेल्यावर्षी जेव्हा बिग बॉस मराठीच्या तिसऱ्या पर्वाच्या प्रोमो आणि टीझरचं चित्रीकरणावेळी महेश यांच्या शरीरात असंख्य वेदना होत होत्या तरी देखील त्यांनी हे चित्रीकरण पूर्ण केले होते. तो अनुभव महेश यांनी एका मुलाखतीमध्ये सांगितला होता.

महेश यांच्या या आजाराबद्दल आणि त्यांनी दिलेल्या कॅन्सरच्या लढ्याबद्दल त्यांच्या पत्नी मेधा मांजरेकर यांनीही काही अनुभव ‘बस बाई बस’ कार्यक्रमात सांगितले. हे अनुभव सांगताना मेधा खूपच भावुक झाल्या होत्या. मेधा यांनी यावेली महेश यांच्या स्वभावाचे वेगवेगळे पैलू देखील उलगडून दाखवले. त्यांनी सांगितलं की, महेश यांनी त्यांना लव्हलेटर लिहिलं होते. विशेष म्हणजे ते पत्र महेश यांनी स्वतःच्या रक्तानं लिहिलं होतं. हे पत्र आजही त्यांनी जपून ठेवलं आहे.

हे वाचा-Brahmastra चा विजय तर बॉयकॉट करणाऱ्यांची हार! या कारणांमुळे बॉक्स ऑफिसवर धमाका

बस बाई बस कार्यक्रमात मेधा यांनी महेश मांजरेकर यांचा एक रंजक किस्सा सांगितला. त्यांनी सांगितलं की, ‘ त्यावेळी महेश कोल्हापूरला होता. त्याच्या एका सहकलाकाराचा त्याच दिवशी मुंबईत संध्याकाळी नाटकाचा प्रयोग होता. परंतु त्याला मुंबईत पोहोचायला उशीर होणार होता. हे जेव्हा महेशला समजलं तेव्हा त्याने स्वतः गाडी चालवत त्याला मुंबईला पोहोचवण्याचा निर्णय घेतला. तुमचा कुणाचाही विश्वास बसणार नाही परंतु महेशने कोल्हापूर ते मुंबई हे अंतर अवघ्या पावणेचार तासांत पार केले. त्याच्याकडे उत्तम ड्रायव्हिंग स्किल आहे.’ हे सांगितल्यावर मेधा म्हणाल्या की कदाचित यामुळेच मला स्पाँडिलायसिस झाला असावा, असं म्हणत त्या मिश्किल हसल्या.

महेश यांचं आयुष्य खुल्या पुस्तकासारखं

महेश यांचा फोन तुम्ही तपासता का असा प्रश्न मेधा यांना विचारला असता त्या म्हणाल्या की, ‘महेशकडे लपवण्यासारखं काहीच नाही. त्यामुळे मी त्याचा फोन कधीही चेक करत नाही. इतकंच नाही तर महेश मांजरेकर यांचा फोनचा पासवर्ड सगळ्यांना माहिती आहे. महेश रोज काय करतात हे आम्हाला सगळ्यांना माहिती असते. त्यामुळे लपवण्यासारखं काहीच नाही.’

महेश सेटवर असतात खूपच कडक

महेश यांच्याबद्दल मेधा यांनी सांगितलं की, ‘महेशची इंडस्ट्रीमध्ये एक खास ओळख आहे. अनेकजण त्याला घाबरतात. मी देखील अनेकदा घाबरते. महेशला देखील मी अनेकदा सांगितलं आहे की, तुझ्यासोबत सिनेमात अभिनेत्री म्हणून काम करण्यापेक्षा मला तुझी बायको म्हणून वावरणं जास्त आवडतं. कारण तो सेटवर खूपच कठोर असतो.’

महेश यांचा कॅन्सरविरोधातला लढा

मेधा यांना जेव्हा महेश यांच्या कॅन्सरबद्दल विचारण्यात आलं तेव्हा त्या खूपच भावुक झाल्या. त्यांनी सांगितलं की,’महेशला जेव्हा कॅन्सरचं निदान झालं तेव्हा आम्हाला सर्वांना मोठा धक्का बसला. कारण तो कधीही आजारी पडला नव्हते. त्याला साधा तापही कधी आला नव्हता. पण महेशनेच आम्हाला धीर दिला आणि म्हणाला की चला आता याच्याविरोधात लढाई करू या. त्यानंतर त्याचं ११ तासांचं ऑपरेशन झालं, केमोथेरेपीची सेशन झाली. या सगळ्या प्रक्रियेमध्ये महेश खूप सकारात्मक होता. त्याच्याकडे पाहून आम्हाला धीर येत होता.’

हे वाचा-सिनेविश्वात धमाकेदार एण्ट्रीनंतर हृताने घेतला ब्रेक! एन्जॉय करतेय सेकंड हनीमून

त्या पुढे म्हणाल्या की, ‘आजाराबद्दल जेव्हा कळलं तेव्हा त्याने सांगितलं की या आजाराचा फार मोठा बाऊ करायाच नाही. त्याचवेळी तो अंतिम सिनेमाचं चित्रीकरण करत होता. कॅन्सरचं कळल्यानंतरही त्याने चित्रीकरण थांबवलं नाही. तो शूटिंगमध्ये सहभागी होत होता. कामात कितीही अडथळे आले तरी त्याने काम थांबवलं नाही. तो इथेही लढला आणि जिंकला. या अडचणींवर मात करत तो काम करतो. काम हे त्याचं पहिलं प्रेम आहे.’

आयुष्यात एकदा तरी अपयशाची चव घ्या

मेधा पुढं सांगतात की, ‘मी आमच्या मुलींना सई आणि गौरीला कायम सांगते की तुम्ही बाबांकडून शिका, त्यांच्यापासून प्रेरणा घ्या. महेशने आयुष्यात अनेक गोष्टींचे अनुभव घेतले आहेत. आमच्या दोन्ही मुली याच क्षेत्रात आहेत. त्यामुळे मी त्यांना नेहमीच सांगते इथं काम करताना संयम ठेवा. तसंच आयुष्यात यशस्वी व्हायचं असेल तर एकदा तरी अपयशाची चव चाखा.’