गॅरेज मेकॅनिकच्या मुलीचे नीट परीक्षेत घवघवीत यश

जालना, मटा प्रतिनिधी

गरीब घरात जन्माला आलेल्या पाल्यालाही त्याचे पालक चांगले शिक्षण देऊ शकतात तसेच चांगले संस्कारही देऊ शकतात, याचा प्रत्यय नुकताच नीट परीक्षेच्या निकालानंतर आला आहे. नीट परीक्षेचा निकाल जाहीर झाल्यानंतर यामध्ये उत्तीर्ण झालेल्या विद्यार्थ्यांचे कौतुक केले जात आहे. जालना शहरातील उर्दू हायस्कूल व जूनियर कॉलेज ची शिफा फिरदौस महम्मद युसुफ हिला ७०० पैकी ६५७ गुण मिळाले. त्यामुळे मेडिकलला जाण्याचे तिचे स्वप्न आता पुरे होणार आहे. शिफा ने अत्यंत गरीब परिस्थितीशी लढा देत,बिकट परिस्थितीवर मात करून यश संपादन केले आहे. त्यामुळे तिचे विशेष कौतुक होत आहे.

शिफाचे वडील युसुफ हे जालना शहरातील आमिर वस्ताद यांच्या गॅरेज वर मेकॅनिक म्हणून काम करतात,तर आई घरी टेलरिंग चे काम करत घर चालवते.या कुटुंबाने दिवसरात्र मेहनत करून मुलीच्या शिक्षणाला पाठबळ दिले. शिफा ला अजून ३ बहिणी त्यात शिफा सर्वात मोठी,पण तिच्या आईने आपल्याला मुलगा नाही हे भान राखत तुटपुंज्या उत्पन्नात मुलींचे पालन पोषण करण्यात कमतरता ठेवली नाही. त्याचाच परिणाम म्हणून शिफा अभ्यासात सातत्य ठेवू शकली.

घरातील सर्व कामे करून आईला घरकामात मदत करत अभ्यासात रममाण असणाऱ्या शिफाने सुरुवातीपासून अभ्यासात आपली चुणूक दाखवली. १० वीत ९४.८० टक्के गुण मिळवून ती शाळेत पहिली आली होती.त्यानंतर जालना शहरातील उर्दू हायस्कूल व जूनियर कॉलेज मध्ये शिकणाऱ्या शिफा ने ध्येय विचलित न होऊ देता नीट परीक्षेत घवघवीत यश मिळवले आहे.

NCERT Survey: ‘अभ्यास, परीक्षा आणि निकाल हे विद्यार्थ्यांच्या चिंतेचे सर्वात मोठे कारण’

‘पीएम श्री’साठी २७ हजार कोटी, शाळांच्या आधुनिकीकरणासाठी महत्वाचा निर्णय
मुलीच्या या यशामुळे सगळे कुटुंबीय आनंदित झाले असून आपल्या मेहनतीला फळं आल्याचे तिच्या आई वडिलांनी सांगितले. शिफाच्या आईला तर आनंदाश्रू अनावर झाले. प्रत्येक गोष्ट आपल्या स्वतःच्या घरावर अवलंबून असते,ज्याप्रमाणे आपण घरातील वातावरण मुलांना देऊ,त्याचप्रमाणे मुलांची कृती आणि भूमिका असतात असे शिफाचे आई वडील सांगतात.त्यामुळे मनाशी ध्येय असले तर गरिबी प्रगतीच्या आड येत नाही हे खरे.
धक्कादायक! मराठी माध्यमाच्या १७ टक्के विद्यार्थ्यांना अक्षरे वाचता येईना