फिल्मफेअर स्विकारताना हुंदके देत रडला रणवीर सिंग, Video पाहून मेव्हणीनेच उडवली खिल्ली

मुंबई : फिल्मफेअरचा सर्वोत्कृष्ट अभिनेत्याचा पुरस्कार रणवीर सिंगला (Ranveer Singh Filmfare Award 2022) मिळाला. हा पुरस्कार स्विकारताना रणवीर खूप भावुक झाला होता. पुरस्कार स्विकारताना त्यानं केलेल्या भाषणामध्ये यशाचं श्रेय त्यानं आई-वडील आणि बहिणीला दिलं आहे. इतकंच नाही तर त्यांना रणवीरनं देवाचा दर्जा दिला. त्यानं पुढं सांगितलं की, आयुष्यात त्यानं जे काही केलं ते करताना हे सर्वजण त्याच्यापाठीशी खंबीरपणं उभे होते. याविषयी बोलताना त्याच्या डोळ्यात पाणी आलं होतं.

रणवीर पुढे म्हणाला की, ‘माझ्या घरात लक्ष्मी आहे…’ यानंंतर त्याने त्याची पत्नी आणि अभिनेत्री दीपिकाचा हात धरुन तिला स्टेजवर आणलं. त्यानंतर स्टेजवर तो तिच्या गालाचं चुंबन घेतो. या दोघांचा व्हिडिओ सोशल मीडियावर खूपच व्हायरल झाला. हा व्हिडिओ पाहिल्यानंतर दीपिकाची बहिण अनिशा पादुकोण हिनं मात्र मजेशीर कमेंट केली आहे.

हे वाचा-टास्क, राडा अन् भांडणांची तारीख ठरली! वाचा कधीपासून सुरू होतंय बिग बॉस मराठी ४

दीपिकाला स्टेजवर ओढत घेऊन आला रणवीर

रणवीरनं शनिवारी त्याच्या इन्स्टाग्रामवर फिल्मफेअर पुरस्कारातील एक व्हिडिओ शेअर केला आहे. व्हिडिओ शेअर करता त्यानं लिहिली आहे की, ‘एका अर्थानं आपण सर्वजण एक स्वप्न जगत असतो.’ या व्हिडिओमध्ये रणवीर ८३ या सिनेमासाठी सर्वोत्तम अभिनेत्याचा पुरस्कार स्विकारताना दिसतो आहे. पुरस्कार स्विकारल्यानंतरचे रणवीरचे भाषण सोशल मीडियावर व्हायरल झाले आहे.

यावेळी भावुक होत अभिनेता म्हणाला की, ‘माझ्या आय़ुष्यात आता जे काही होत आहे त्याची मी कल्पना केली होती. परंतु कधी कधी माझा यावर विश्वास बसत नाही की मी खरंच इथं आहे. हे करत आहे आणि तुम्हा सर्वांसमोर मी इथं उभा आहे. आजही विश्वास बसत नाही की मी अभिनेता झालो आहे. हा एक चमत्कारच आहे.’

रणवीर सिंग हुंदके देत रडला

रणवीरनं त्याच्या कुटुंबाचे आभार मानले आहेत. यावेळी रणवीरनं प्रेक्षकांचेही आभार मानले आहेत. तो म्हणाला की,’ सगळ्यात मोठे आभार मानायचे आहेत ते प्रेक्षकांचे. त्यांच्याशिवाय माझा हा प्रवास शक्य नव्हता. तसंच माझ्या प्रवासात सहभागी होण्यासाठी आणि माझी स्वप्नं जगण्याची परवानगी दिल्याबद्दल आभार. आज मी जो काही तो आई-बाबांमुळे आणि ताईमुळे आहे. ते माझ्यासाठी देवासमान आहे. मी जे काही करतो ते माझ्या या देवांसाठी करतो. लक्ष्मी देवी माझ्या घरी आहे. माझ्या यशाचं रहस्य आहे दीपिका पादुकोण.’

हे वाचा-ब्रह्मास्त्र पाहताना तुमच्याही नजरेतून सुटली असेल ही गोष्ट, दीपिका आहे रणबीरची आई?

मात्र मेहुणीनं केली रणवीरची टिंगल

भर स्टेजवर रणवीरला रडताना पाहून दीपिकाची बहिण आणि गोल्फर अनिशा पादुकोण हिला त्याची मस्करी करण्याचा मोह काही आवरता आला नाही. तिनं कमेंटमध्ये म्हटलं आहे की, ‘कोण आहे बरं तिथं ज्यानं याच्याकडून कांदा चिरून घेतला.’ रणवीरच्या या पोस्टवर अनेक कलाकारांनी कमेंट करत त्याचे अभिनंदन केले आहे.

दरम्यान, रणवीरचा अलिकेडच जयेशभाई जोरदार सिनेमात दिसला होता. हा सिनेमा बॉक्स ऑफिसवर अयशस्वी ठरला. आता तो करण जोहरच्या रॉकी और रानी की प्रेम कहानी सिनेमात आलिया भट्ट बरोबर दिसणार आहे. त्याशिवाय त्याच्याकडे रोहित शेट्टीचा सर्कस हा सिनेमा देखील आहे. दरम्यान ब्रह्मास्त्र हा रणबीर कपूर-आलिया भट्टचा सिनेमा प्रदर्शित झाल्यानंतर, या सिनेमाच्या दुसऱ्या भागात रणवीर दीपिकासोबत दिसणार असल्याचा अंदाज चाहते बांधत आहेत. सोशल मीडियावर तशा पोस्टही व्हायरल होत आहेत.