सिनेमा तरी दिलेल्या तारखेला प्रदर्शित कराल का? चिरंजीवी आणि सलमान खानवर भडकले चाहते

मुंबई: दाक्षिणात्य सुपरस्टार चिरंजीवी आणि बॉलिवूड सुपरस्टार सलमान खान (Chiranjeevi Salman Khan) यांच्या गॉडफादर (Godfaher) सिनेमातील ‘थार मार’ हे गाणं प्रदर्शित झालं आहे. परंतु यामध्ये एक मोठा ट्विस्ट आला आहे. शुक्रवारी या गाण्याचं ऑडियो व्हर्जन रिलीज झालं. पण हे गाणं ऐकण्यासाठी मात्र चाहत्यांना काही काळ वाट बघावी लागणार आहे. कारण काही तांत्रिक कारणांमुळे दोन्ही सुपरस्टार्सचं गाणं चाहत्यांना ऐकता येणार नाही. गेल्या १३ सप्टेंबर रोजी या गाण्याचा ४४ सेकंदांचा व्हिडिओ टिझर प्रदर्शित झाला होता. त्याला चाहत्यांनी भरभरून प्रतिसाद दिला होता. चाहत्यांना चिरंजीवी आणि सलमान खान यांची जुगलबंदी बघण्यासाठी उत्सुक आहेत.

गॉडफादर सिनेमातील ‘थार मार टक्कर मार’ हे गाणं १५ सप्टेंबर २०२२ ला रिलीज होणार होतं. परंतु काही कारणामुळे ते गाणं प्रदर्शित झालं नाही. काही दिवसांनी हे गाणं प्रदर्शित झालं. परंतु गाण्याचा व्हिडिओ आला नाही तर केवळ ऑडियो आला. हे गाणं चाहत्यांना स्पोटिफाय ऐकता येईल. हे गाणं हिंदी आणि तेलुग अशा दोन्ही भाषांत प्रदर्शित झालं आहे. गाण्याच्या व्हिडिओ टीझरमध्ये सलमान खान आणि चिरंजीवी यांची दमदार एंट्री बघायला मिळत आहे. दोघांचा हुक स्टेप देखील जबरदस्त आहे. त्यामुळे चाहत्यांना गाण्याची प्रतीक्षा आहे.

हे वाचा-जेव्हा ‘पावनखिंड’च्या दिग्दर्शकाने मागितली अमोल कोल्हेंची माफी; नेमकं काय घडलं?

कसं आहे थार मार टक्कर मार गाणं

सलमान खान आणि चिरंजीवी याचं थार मार टक्कर मार (Thaar Maar Thakkar Maar) हे गाणं श्रेया घोषाल हिनं गायलं आहे. हे गाणं अनंथा श्रीराम (Anantha Sriram) यानं लिहिलं आहे . या गाण्याचं वैशिष्ट्य म्हणजे प्रसिद्ध डान्सर प्रभुदेवा यांनी नृत्यदिग्दर्शन केलं आहे. गॉडफादर सिनेमात चिरंजीवी आणि सलमान खान शिवाय नयनतारा, पुरी जग्गनाथ, सत्य देव सारखे कलाकार आहेत. हा सिनेमा मोहन राजा यांनी दिग्दर्शित केला आहे. मोहन यांनी डबल अटॅक २, जायम यांसारख्या सिनेमाचं दिग्दर्शन केलं आहे.

मैत्रीखातर सलमाननं केला गॉडफादर सिनेमा

गॉडफादर सिनेमाची जेव्हा घोषणा झाली तेव्हापासन तो चर्चेत होता. चिरंजीवी यांच्याबरोबर सलमान खाननं पहिल्यांदा काम केलं आहे. खासगी आयुष्यामध्ये हे दोघंजण एकमेकांचे खूप चांगले मित्र आहेत. याच मैत्रीखातर सलमाननं सिनेमात काम करायला होकार दिला. सलमान खाननं यासाठी एक रुपया देखील आकारलेला नाही. मीडियामध्ये आलेल्या बातम्यांनुसार सिनेमासाठी सलमानला कोट्यवधी रुपये मानधन ऑफर दिली होती. परंतु त्यानं याला नकार दिला.

हे वाचा-क्रिती सेनॉन-प्रभास रिलेशनशिपमध्ये? बी-टाऊनमध्ये ‘परमसुंदरी’ आणि ‘बाहुबली’चीच चर्चा!

ट्विटरवर चाहत्यांनी व्यक्त केली नाराजी

थार मार गाण्याच्या ऑडियो व्हिडिओ प्रदर्शित न झाल्यानं चाहते नाराज झाले. त्यांनी आपली नाराजी ट्विट करत व्यक्त केली. चाहत्यांनी नाराजी व्यक्त केल्यानंतर निर्मात्यांनी त्याचा खुलासा करत तांत्रिक कारणामुळे गाणं प्रदर्शित होण्यासाठी उशीर होत असल्याचं जाहीर केलं. ५ ऑक्टोबर रोजी येणारा सिनेमा तरी वेळेत प्रदर्शित होईल का अशी विचारणा चाहत्यांनी केली आहे. निर्मात्यांनी गाण्याबाबत खुलासा केल्यानंतरही चाहत्यांनी सोशल मीडियावर त्यांची नाराजी व्यक्त केली आहे.