सुशांतसिंह राजपूतबाबत आमिर खानचा भाऊ फैसलचा खळबळजनक आरोप, म्हणाला…

मुंबई: बॉलिवूड अभिनेता आमिर खान याचा भाऊ फैसल खान (Faisal Khan) सिनेमांपासून दूर आहे. परंतु अधूनमधून तो मुलाखती देत त्यातून काही खळबळजनक खुलासे करत असल्यानं तो अनेकदा चर्चेत येत असतो. आता देखील फैसलनं सुशांत सिंह राजपूत (Sushant Singh Rajput) याच्या मृत्यूसंदर्भात एक नवीन दावा मुलाखतीमध्ये काल आहे. फैसलनं दिलेल्या एका मुलाखतीमध्ये त्यानं सांगितलं की, सुशांतनं आत्महत्या नाही तर त्याची हत्याच झाली आहे. परंतु अशा घटनांमागचं सत्य कधीच समोर येत नाही. त्याला कायम लपवलंच जातं. सुशांत सिंह राजपूतचा १४ जून २०२० मध्ये मुंबईतील त्याच्या घरी मृतदेह आढळून आला होता.

काय म्हणाला फैसल?

टाइम्स नाऊ नवभारत चॅनलला दिलेल्या मुलाखतीमध्ये फैसल खाननं सांगितलं की, ‘मला पक्कं माहिती आहे की, सुशांतनं आत्महत्या नाही तर त्याची हत्याच झाली आहे. त्या घटनेमागचं कटू वास्तव कधी पुढं येईल की नाही माहिती नाही. ते येणारा काळच ठरवू शकेल. याप्रकरणाचा तपास अनेक तपासयंत्रणा करत आहेत. हा तपास अजूनही सुरू आहे. काही घटना आणि त्यामागचं वास्तव कधीच समोर येत नाही.’ फैसलनं याच मुलाखतीत बॉलिवूडमधील नेपोटिझमवरील आरोपांना दुजोरा दिला आहे. इतकंच नाही तर इथं गटबाजी असल्याचंही त्यानं सांगितलं.

हे वाचा-क्रिती-प्रभास रिलेशनशिपमध्ये? बी-टाऊनमध्ये ‘परमसुंदरी’ आणि ‘बाहुबली’चीच चर्चा!

सीबीआयकडे सोपवला होता तपास

दरम्यान, मुंबई पोलिसांनी सुशांतचा मृत्यू ही आत्महत्या असल्याचं सांगितलं होतं. त्यानंतर सुशांतच्या वडिलांनी पटणामध्ये रिया चक्रवर्ती आणि अन्य काही जणांच्याविरोधात सुशांतला आत्महत्या करण्यासाठी प्रवृत्त केल्याचा आरोप करत त्यांच्याविरोधात गुन्हा नोंदवला होता. याप्रकरणी सर्वोच्च न्यायालयात सुनावणी होऊन याप्रकरणाचा तपास सीबीआयकडे देण्याचे आदेश दिले होते. याप्रकरणी सीबीआयचा अद्याप तपास सुरू असून कोणताही निष्कर्ष अद्याप त्यांनी जाहीर केलेला नाही.

एनसीबीनं केली रिया चक्रवर्तीला अटक

सुशांत सिंह राजपूतच्या मृत्यूप्रकरणाचा तपास सीबीआयप्रमाणे सक्तवसुली संचलनालय (ईडी), नार्कोटिक्स कंट्रोल ब्युरो (एनसीबी) या तपासयंत्रणा देखील करत आहेत. याप्रकरणी ड्रग्जचा वापर आणि सेवन झाल्यानं एनसीबीनं सुशांतची गर्लफ्रेंड रिया चक्रवर्ती हिच्यासह काहीजणांना अटक केली होती. या सर्वांनी सुशांतसाठी ड्रग्ज विकत घेतल्याचा आरोप ठेवण्यात आला आहे.

हे वाचा-वडिलांचं निधन आणि उद्ध्वस्त झालं कुटुंब; १९८४ च्या दंगलीत अभिनेत्रीने गमावलं सर्वकाही!

आमिरवरही केले होते फैसलनं आरोप

फैसल खानबाबत सांगायचं तर तो आमिर खानबरोबर २००० मध्ये प्रदर्शित झालेल्या मेला सिनेमात दिसला होता. त्यानंतर तो इंडस्ट्रीमधून गायब झाला. त्यानंतर गेल्यावर्षी तो अचानक समोर आला आणि त्यानं भाऊ आमिर खान आणि त्याच्या घरातील अन्य काही सदस्यांवर आरोप केले होते. तो म्हणाला होता की या सगळ्यांनी मिळून त्याला घरात कैद करून ठेवलं होतं. आमिरनं तो मानसिकदृष्ट्या आजारी असल्याची खोटी बातमी पसरवली होती,असा आरोपही फैसलनं केला होता.