BMW कार ऑफर केलेली, पण…; नोरा फतेहीने चौकशीत पर्सनल चॅटचं दाखवलं

Nora Fatehi Questioning: अभिनेत्री नोरा फतेही २०० कोटी रुपयांच्या मनी लॉन्ड्रिंग केसप्रकरणी चौकशीसाठी दिल्ली पोलिसांच्या इकोनॉमिक ऑफेंसेस विंग (EOW) कार्यालयात पोहोचली होती. नोराची अडीच तास चौकशी झाली. नोराची ही पाचव्या वेळी चौकशी झाली. रिपोर्ट्सनुसार, EOW टीम जॅकलिन आणि नोरानंतर इतर चार अभिनेत्री सोफिया सिंह, चाहत खन्ना, निकिता तांबोळी आणि अरुषा पाटीलचीही चौकशी करू शकते. या चार अभिनेत्रींनी तिहार जेलमध्ये सुकेशची भेट घेतली होती. ईडीच्या तपासात सापडलेले पुरावे आणि आपल्या स्वत:च्या तपासातून मिळालेले पुरावे पाहिल्यानंतर दिल्ली पोलिसांच्या आर्थिक गुन्हे शाखेने नोरा फतेहीला एका खास इव्हेंटबाबत या चौकशीत प्रश्न विचारले. डिसेंबर २०२० मध्ये नोरा या इव्हेंटचा भाग होती. हा कार्यक्रम चेन्नईत झाला होता. २ सप्टेंबर रोजी नोराची पोलिसांनी चौकशी केली होती. यादरम्यान त्यांच्या चॅट्सबाबत माहिती विचारण्यात आली होती.

जॅकलिननंतर नोराची चौकशी

दिल्ली पोलिसांच्या आर्थिक गुन्हे शाखेकडून सुकेश चंद्रशेखरच्या मनी लॉन्ड्रिंग (Money Laundering) संबंधित प्रकरणाचा तपास सुरू आहे. बुधवारी बॉलिवूड अभिनेत्री जॅकलीन फर्नांडिजची (Jacqueline Fernandez) चौकशी झाल्यानंतर गुरुवारी १५ सप्टेंबर रोजी अभिनेत्री नोरा फतेहीची चौकशी झाली. या संपूर्ण प्रकरणातील महत्त्वाचा दुवा असलेली ५३ वर्षीय पिंकी ईराणीही या चौकशीत नोरासोबत होती. या चौकशीत नोराला सुकेशची पत्नी लीना मारिया पॉलने आयोजित केलेल्या एका इव्हेंटबाबत सवाल करण्यात आले.

सुकेशची पत्नी लीनाशी भेट झाली

सुकेशच्या पत्नीने आयोजित केलेल्या इव्हेंटबाबतच्या प्रश्नांसह नोराकडे सुकेशकडून मिळालेल्या गिफ्ट्सबाबतही चौकशी करण्यात आली. नोराने इव्हेंटबाबत उत्तर देताना सांगितलं, की या इव्हेंटचं बुकिंग त्यांची एजेन्सी एक्सीड एंटरटेनमेंट प्रायव्हेट लिमिटेडद्वारा करण्यात आली होती. चेन्नईतील एका फाइव्ह स्टार हॉटेलमध्ये डिसेंबर २०२० मध्ये हा इव्हेंट पार पडला होता. चौकशीत नोराने अधिकाऱ्यांना सांगितलं, की इव्हेंट चांगला झाला. सुकेशची पत्नी लीनाशी माझी भेट झाली. त्यावेळी तिने मला गूची ब्रँडची एक बॅग आणि आयफोन गिफ्ट केला होता.

बीएमडब्ल्यू कार गिफ्ट देण्याचं इथे सांगितलं…

लीनाने मला, तिचा पती माझा चाहता असल्याचं सांगितलं, पण कधीही त्याची भेट झाली नसल्याचंही ती म्हणाली. तु त्याच्याशी फोनवर बोल असं म्हणत तिने कॉल स्पीकरवर टाकला. कॉलनंतर सुकेशने धन्यवाद मानले आणि तो आणि त्याची पत्नी माझे चाहते असल्याचंही तो म्हणाला असं नोराने चौकशीत (Nora Fatehi) सांगितलं. त्यानंतर सुकेशची (Sukesh Chandrasekhar Wife) पत्नी लीनाने मला बीएमडब्ल्यू कार गिफ्ट करणार असल्याचं सांगितलं.

बीएमडब्ल्यूची गरज नसल्याचं सांगितलं, पण…

नोराने सांगितलं, की एका फोन नंबरवरुन शेखर नावाच्या व्यक्तीचा कॉल आला. त्यानंतर माझ्या बहिणीच्या पतीचा बॉबीचा नंबर पुढील डिटेल्ससाठी त्या व्यक्तीला दिला. त्यावेळी बॉबीने शेखर नावाच्या व्यक्तीला नोराकडे आधीच एक बीएमडब्ल्यू असल्याने तिला दुसऱ्या बीएमडब्ल्यूची गरज नसल्याचं सांगितलं होतं. त्यानंतर शेखरने बॉबीच्या नावाने बीएमडब्ल्यू ५ सीरिजची गाडी बुक केली, या सर्व डिटेल्ससह नोराने सुकेशसह आपल्या फोनवरील चॅट्सच्या स्क्रिनशॉट्सची कॉपी एजेन्सीकडे जमा केली.

जॅकलिनचीही झाली चौकशी

अभिनेत्री जॅकलिन फर्नाडिजची याप्रकरणी काल बुधवारी १४ सप्टेंबरला ८ तास चौकशी झाली होती. जॅकलिनला यावेळी सुकेशकडून मिळालेल्या गिफ्ट्सबाबत आणि इतर काही मुद्द्यांवर सवाल करण्यात आल्याची माहिती पोलिसांनी दिली. जॅकलिन आणि सुकेशची ओळख करुन देणाऱ्या पिंकी ईराणीलाही यावेळी चौकशीसाठी बोलवण्यात आलं होतं. पिंकी आणि जॅकलिनचा जबाब वेगवेगळा घेण्यात आला. त्यानंतर दोघींना समोरासमोर बसवून चौकशी करण्यात आली. चौकशीदरम्यान जॅकलीनने काही प्रश्नांची उत्तर देण्याचं टाळलं, तर काही प्रसंगी ती अस्वस्थ झाल्याचंही पोलिसांनी सांगितलं.