आलिया-करण नव्हे तर रणबीर ठरणार ‘ब्रह्मास्त्र’ आपटण्याचं कारण? ४ कारणांमुळे ट्रोल आर्मीच्या निशाण्यावर

Brahmastra Movie Released: रणबीर कपूर आणि आलिया भट्ट स्टारर ‘ब्रह्मास्त्र’ ९ सप्टेंबर रोजी रिलीज झाला आहे. बॉलिवूडसाठी टर्निंग पॉइंट असं या सिनेमाचं प्रमोशन करण्यात आलं आहे. गेल्या काही महिन्यांपासून आपटणारे बॉलिवूड चित्रपट पाहता हा चित्रपट चालणं इंडस्ट्रीसाठी महत्त्वाचे झाले आहे. रणबीर-आलियाच्या करिअरसोबतच इंडस्ट्रीसाठी हा सिनेमा ‘लार्जर दॅन लाइफ’ ठरेल असे म्हटले जातेय. मात्र यापूर्वी प्रदर्शित झालेल्या अनेक बॉलिवूड चित्रपटांवर बहिष्काराची मागणी झाली, ब्रह्मास्त्रसोबतही तसेच घडते आहे. ‘BoycottBrahmastra’चा ट्रेंड सोशल मीडियावर व्हायरल होत आहे. पण सिनेमाच्या प्रीबुकिंगचे आकडे लक्षात घेता सिनेमा चांगली कमाई करेल असाही सूर पाहायला मिळतो आहे. त्यामुळे हा सिनेमा पहिल्याच दिवशी ३० ते ४० कोटींचा व्यवसाय करेल अशी अपेक्षा सार्थ ठरल्यास सिनेमाला ब्लॉकबस्टर होण्यापासून कोणीही रोखू शकत नाही.

रणबीर ट्रोलर्सच्या निशाण्यावर

पण सुरुवातीपासून ट्रोलर्सच्या निशाण्यावर असणाऱ्या या सिनेमाकडे ट्रोल आर्मीचे लक्ष आहे. छोटीशी चूकही या ट्रोलर्सच्या नजरेतून सुटत नाही आहे. त्यात करण जोहरचा नेपोटिझमचा मुद्दा, आलियाच्या कुटुंबावरुन तिचं होणारं ट्रोलिंग हे सर्व मुद्दे लक्षात ठेवले जात आहेत. पण सिनेमा बॉयकॉट होण्याची बरीचशी कारणं रणबीरशी निगडीत आहेत. रणबीरबाबत अनेक वादग्रस्त गोष्टी समोर आल्या, ज्यामुळे त्याचा चित्रपट अडचणीत येऊ शकतो. असे एक-दोनदा नाही तर अनेकदा घडले आहे, जेव्हा रणबीर ट्रोलच्या निशाण्यावर आला आहे.

​महाकाल मंदिरातून दर्शन न घेताच परतले आलिया-रणबीर

ब्रह्मास्त्रच्या रीलिजआधी सिनेमाचा दिग्दर्शक अयान मुखर्जी, आलिया आणि रणबीर यांनी उज्जैनच्या महाकाल मंदिरात जाण्याचा निर्णय घेतलेला, मात्र त्यानंतर मोठा गदारोळ माजला. त्यांना मोठ्या विरोधाचा सामना करावा लागला. याचा परिणाम असा झाला की रणबीर आणि आलियाला महाकाल मंदिरात पाऊलही ठेवता आले नाही. त्यामुळे अयानने एकट्यानेच महाकाल मंदिरात जाऊन दर्शन घेतले. अभिनेत्याच्या ‘मला बीफ आवडते’ या जुन्या वक्तव्यामुळे त्याला मंदिरात प्रवेश करण्यासाठी विरोध झाल्याचे समोर आले होते. या वादावर प्रतिक्रिया देताना मध्य प्रदेशचे गृहमंत्री नरोत्तम मिश्रा म्हणाले की, रणबीर आणि आलिया यांना कोणीही थांबवले नव्हते. बजरंग दलाचे कार्यकर्ते वेगळ्याच कारणासाठी आंदोलन करत होते.

​रणबीर कपूरचा पाकिस्तानी अभिनेत्रीसोबत स्मोकिंग करतानाचा फोटो

२०१७ मध्ये, रणबीरची मोठ्या प्रमाणात चर्चा झाली, जेव्हा त्याचा पाकिस्तानी अभिनेत्री माहिरा खान (Ranbir Kapoor Photo with Mahira Khan) हिच्यासोबतचा फोटो व्हायरल झाला होता. ते दोघे एकत्र स्मोकिंग करताना दिसले होते. न्यूयॉर्क शहरातील हा फोटो सोशल मीडियावर वादंग निर्माण करणारा ठरला.यापूर्वी माहिरा आणि रणबीर दुबईमध्ये एकत्र दिसले होते आणि तेव्हापासून ते रिलेशनशिपमध्ये असल्याच्या अफवाही पसरल्या होत्या.

​रणबीर कपूरवर रिलेशनशिपमध्ये फसवल्याचा आरोप

रणबीरचे आलियासोबत लग्न होण्याआधी त्याचे नाव विविध अभिनेत्रींसोबत जोडले गेले होते. धक्कादायक बाब म्हणते त्याने एकदा रिलेशनशिपमध्ये फसवणूक केल्याची कबुली दिली होती. २००९ मध्ये जेव्हा रणबीर आणि दीपिका पादुकोण वेगळे झाले, तेव्हा आरके त्याच्या ‘राजनीती’ सिनेमातील सह-कलाकार कतरिना कैफला डेट करत असल्याच्या चर्चा सुरू झाल्या. त्यांचे एकत्र काही फोटोही समोर आले होते. त्या नात्यात फसवणूक केल्याची कबुली अभिनेत्याने दिली होती.

​आलिया भट्टसोबतच बॉडी शेमिंग

दरम्यान रणबीरने त्याची पत्नी आलियासोबत केलेले वर्तनही अनेक चाहत्यांना आवडले नव्हते, त्यामुळे ब्रह्मास्त्र रीलिजच्या काही दिवसआधी तो ट्रोल झाला होता. त्याने प्रेग्नेंट आलिया ‘फैलोड’ झाल्याचे म्हटले होते. अनेकांनी त्याची ही प्रतिक्रिया बॉडी शेमिंग करणारी असल्याचे म्हटले होते. याबद्दल माफी मागताना रणबीर म्हणाला होता, ‘माझ्या पत्नीवर माझे प्रेम आहे. मला वाटते की हा एक विनोद होता जो मजेशीर ठरला नाही. जर मी कोणाचे मन दुखावले असेल तर मला खरोखर माफी मागायची आहे. तो माझा हेतू नव्हता. त्यामुळे ज्यांना राग आला किंवा भडकावले त्यांना मी सॉरी म्हणू इच्छितो.’