वर्ल्ड कपसाठी पाकिस्ताननं केली टीमची घोषणा, भारताविरुद्ध शतक केलेला खेळाडू ‘आऊट’

मुंबई, 15 सप्टेंबर: आगामी टी20 वर्ल्डकपसाठी जवळपास सगळ्या संघांनी 15 सदस्यीय टीम घोषित केली आहे. भारताचा पारंपरिक प्रतिस्पर्धी असलेल्या पाकिस्ताननंही आज वर्ल्ड कपसाठीचा संघ जाहीर केला. बाबर आझमच्या नेतृत्वात हा संघ ऑस्ट्रेलियातल्या विश्वचषक मोहिमेसाठी सज्ज झाला आहे. पण पाकिस्ताननं निवडलेल्या या संघात एका धडाकेबाज फलंदाजाचा समावेश करण्यात आलेला नाही. टी20 आंतरराष्ट्रीय सामन्यातल्या खराब कामगिरीमुळे त्याला संघाबाहेर करण्यात आलं आहे. पण हाच खेळाडू पाच वर्षांपूर्वी टीम इंडियासाठी डोकेदुखी ठरला होता.

फखर झमान संघाबाहेर

पाकिस्तानचा डावखुरा फलंदाज फखऱ झमान गेल्या काही सामन्यात सपशेल अपयशी ठरला. आशिया कपमध्येही त्याला फारसा प्रभाव पाडता आला नाही. त्यामुळे वर्ल्ड कपसाठीच्या संघातून त्याला वगळून स्टँड बाय खेळाडूंमध्ये ठेवण्यात आलं आहे. याच फखर झमाननं 2017 सालच्या चॅम्पियन्स ट्रॉफी फायनलमध्ये भारताविरुद्ध शतक झळकावलं होतं. त्यामुळे टीम इंडियाच्या हातून चॅम्पियन्स ट्रॉफी जिंकण्याची संधी निसटली होती.

शाहीन आफ्रिदीचं कमबॅक, नसीमला लॉटरी

पाकिस्तानच्या या संघात वेगवान गोलंदाज शाहीन शाह आफ्रिदीनं कमबॅक केलं आहे. आशिया कपमध्ये शाहीन आफ्रिदी गुडघ्याच्या दुखापतीमुळे संघाबाहेर होता. पण आता तो फिट झाला असून वर्ल्ड कपसाठीच्या संघात आफ्रिदीची निवड करण्यात आली आहे. दुसरीकडे पाकिस्तानचा युवा गोलंदाज नसीम शाहला लॉटरी लागली आहे. आशिया कपमधल्या दमदार प्रदर्शनामुळे नसीमला चक्क ऑस्ट्रेलियाचं तिकीट मिळालं आहे. नसीम शाहनं केवळ गोलंदाजीतच नाही तर आशिया कपमध्ये बॅटनही कमाल दाखवली होती. अफगाणिस्तानविरुद्धच्या सामन्यात त्यानं शेवटच्या ओव्हरमध्ये सलग दोन षटकार खेचून सामना जिंकून दिला होता.

Introducing our squad 🙌

🗒️ https://t.co/JnHpDOvXsS#T20WorldCup | #BackTheBoysInGreen pic.twitter.com/BbmTdtBfhk

— Pakistan Cricket (@TheRealPCB) September 15, 2022

पाकिस्तानचा वर्ल्ड कप संघ – बाबर आझम (कर्णधार), शादाब खान, असिफ अली, हैदर अली, हॅऱिस रौफ, इफ्तिकार अहमद, खुशदिल शाह, मोहम्मद हसनैन, मोहम्मद नवाज, मोहम्मद रिझवान, मोहम्मज वसीम, नसीम शाह, शाहीन आफ्रिदी, शान मसूद, उस्मान कादिर

स्टँड बाय खेळाडू – फखर झमान, मोहम्मद हॅरिस, शाहनवाज दहानी