वर्ल्ड कपआधी टीम इंडियानं बदललं प्लॅनिंग, रोहितचा ‘रोल’ बदलणार?

दुबई, 8 सप्टेंबर: टीम इंडियाचं आशिया चषकातलं आव्हान आधीच संपुष्टात आलंं आहे. त्यामुळे अफगाणिस्तान आणि भारतीय संघातला सामना औपचारिक ठरला. पण भारतीय संघव्यवस्थापनानं मात्र अफगाणिस्तानविरुद्धच्या लढतीत भारतीय संघात काही बदल केले. हे बदल म्हणजे आगामी टी20 वर्ल्ड कपआधीचं काही प्लॅनिंग आहे का? असा प्रश्न उपस्थित होतोय.

रोहितचा रोल बदलणार?

अफगाणिस्ताविरुद्धच्या सामन्यात कर्णधार रोहित शर्मानं विश्रांती घेतली. रोहितच्या जागी उपकर्णधार लोकेश राहुल नाणेफेकीसाठी मैदानात आला आणि त्यानं रोहित शर्मानं विश्रांती घेतल्याचं सांगितलं. अफगाणिस्तानविरुद्धच्या सामन्यात रोहितसह हार्दिक पंड्या आणि युजवेंद्र चहललाही विश्रांती देण्यात आली. दरम्यानं रोहितनं विश्रांती घेतल्यामुळे सलामीला रोहितच्या जागी विराटला बढती मिळाली. या संधीचा विराटनं पुरेपूर फायदा उठवला आणि त्यानं शतक ठोकलं. इतकंच नव्हे तर लोकेश राहुलसह 119 धावांची सलामीही दिली. त्यामुळे आगामी विश्वचषकाच्या पार्श्वभूमीवर टीम इंडियानं केलेली ही चाचपणी असण्याची आणि रोहित शर्मा सलामीला येण्याऐवजी मधल्या फळीत खेळणार असल्याची  चर्चा सुरु झाली आहे.

A good start in the Powerplay from India’s openers 💪#INDvAFG | #AsiaCup2022 | Scorecard: https://t.co/z8iw8dn85Q pic.twitter.com/xScSuMUa0C

— ICC (@ICC) September 8, 2022

विश्वचषकाआधी विराट फॉर्मात

येत्या ऑक्टोबर नोव्हेंबरमध्ये ऑस्ट्रेलियात टी20 वर्ल्ड कप खेळवला जाणार आहे. आशिया चषकात भारताचं आव्हान संपुष्टात आलं असलं तरी विश्वचषकाआधी विराट कोहलीचं फॉर्मात येणं टीम इंडियाच्या दृष्टीनं समाधानाची बाब आहे. विराटनं या स्पर्धेत 4 सामन्यात एक शतक आणि 2 अर्धशतकांसह 254 धावा केल्या आहेत.