अचानक असं काय झालं की लाडाची बॉस आता नव्या वेळेत भेटणार, हे आहे कारण

मुंबई- गेल्या काही दिवसात अनेक मालिका बंद होत असून नव्या मालिकांच्या प्रोमोंनी प्रेक्षकांचे लक्ष वेधले आहे. काही मालिका निरोप घेणार असून काही मालिकांच्या वेळेत बदल करण्याचा निर्णय वाहिनी घेत आहे. यामध्ये सध्या चर्चा आहे ती एका मालिकेच्या वेळेतील बदलाची. बॉस माझी लाडाची ही मालिका आता प्रेक्षकांना रात्री साडेआठ ऐवजी दुपारी साडेचार वाजता पहायला मिळणार आहे. प्राइमटाइमऐवजी दुपारी मालिका दिसल्याने आता प्रेक्षकांना कसा प्रतिसाद मिळतो याकडे कलाकाराचे लक्ष लागले आहे.

देख रहा है बिनोद, शाहरुखला ब्रह्मास्त्रमध्ये पाहून आपटला डोकं

१० फेब्रुवारी २०२२ ला बॉस माझी लाडाची या मालिकेचा पहिला भाग प्रसारीत झाला होता. अवघ्या सात महिन्यात या मालिकेच्या वेळेत बदल करावा लागला आहे. खरं तर मालिकेला सुरूवातीला चांगला प्रतिसाद मिळाला, मात्र त्यानंतर मालिकेत काहीच घडामोड न दिसल्याने टीआरपी कमी झाला होता. काही दिवसांपूर्वी ही मालिका बंद होणार असल्याचीही बातमी आली. मात्र आता मालिकेची वेळ बदलून ही मालिका सुरू ठेवण्याचा निर्णय झाला आहे.

राजेश्वरी आणि मिहीर यांच्यातील प्रेमावर ही मालिका आधारीत होती. आर्किटेक्ट कंपनीत राजेश्वरी ही बॉस आहे आणि मिहीर तिचा असिस्टंट आहे. मात्र घरात राजेश्वरी आणि मिहिर नवराबायको आहेत. त्यामुळे घरात बायको आणि ऑफीसमध्ये बॉस असलेल्या जोडप्याच्या आयुष्यात काय घडू शकते हे या मालिकेत दाखवण्यात आलं आहे. गेल्याच महिन्यात या मालिकेत अभिनेता तेजस बर्वे याची एन्ट्री झाली होती. मालिकेचा टीआरपी कमी झाल्याने तेजस साकारत असलेलं पात्र मालिकेत आणूनही काही फरक पडला नसल्याचं चित्र आहे.

‘बायकॉट’चा धसका, क्रिती सेनन आणि शाहिद कपूरला मोठा फटका बसण्याची शक्यता

रोहिणी हट्टंगडी, गिरीश ओक, सोनल पवार, शलाका पवार असे गाजलेले कलाकार या मालिकेत आहेत. तर भाग्यश्री लिमये आणि आयुष संजीव यांची जोडी या मालिकेत दिसत आहे. भाग्यश्रीने यापूर्वी घाडगे अँड सून या मालिकेत प्रमुख भूमिका साकारली होती तर आयुष याची ही मुख्य भूमिकेतील पहिलीच मालिका आहे. सुंदरा मनामध्ये भरली आणि तुमची मुलगी काय करते या मालिकांची निर्माती मनवा नाईक हिने या मालिकेची निर्मिती केली आहे.

सोनी मराठीवर रात्री साडे आठ वाजता या मालिकेला प्राइम टाइम मिळाला होता, मात्र अपेक्षित असा प्रतिसाद न मिळाल्याने मालिकेतील लाडाची बॉस आता नव्या वेळेत येणार आहे. दुपारी साडेचार ही मालिका पाहणाऱ्या प्रेक्षकांसाठी सोयीची वेळ आहे की नाही हे आता या मालिकेला कसा प्रतिसाद मिळतो यावर ठरेल.

कितीही सिनेमे होऊ देत फ्लाॅप,अक्षय कुमारचं कधीच होणार नाही नुकसान, एकूण संपत्तीबद्दल इथे वाचा

यापूर्वी मुलगी झाली हो या मालिकेची रात्रीची वेळ बदलून दुपारी २ वाजता करण्यात आली आहे. तर मुरांबा ही शशांक केतकर प्रमुख भूमिकेत असलेली मालिकाही दुपारी २ वाजता दाखवली जाते. दुपारच्या वेळेत मालिका दाखवण्याचा ट्रेंड काही दिवसांपूर्वी सुरू झाला आहे. त्याचा फायदा आता बॉस माझी लाडाची या मालिकेला मिळणार की नाही हे पाहण्यासाठी कलाकारांना थोडा धीर धरावा लागणार आहे.