Stop Homework: ‘गृहपाठ बंदीमुळे विद्यार्थ्यांच्या होणाऱ्या नुकसानास सरकार जबाबदार’

म. टा. प्रतिनिधी, पुणे

करोनाकाळात ऑनलाइन शिक्षणामुळे आकडेमोडीपासून ते लेखन-वाचन विसरणाऱ्या विद्यार्थ्यांची आता गृहपाठापासून सुटका करण्याचा शिंदे-फडणवीस सरकार विचार करीत आहे. त्या प्रस्तावाला आतापासूनच हिंदू महासंघाने विरोध दर्शविला आहे. गृहपाठ बंद झाल्यास विद्यार्थ्यांचे नुकसान झाल्यास त्याला सर्वस्वी सरकार जबाबदार असेल, असाही इशारा त्यांनी दिला आहे.

शालेय शिक्षणमंत्री दीपक केसरकर यांनी प्राथमिक शाळेच्या विद्यार्थ्यांचा गृहपाठ बंद करण्याचा विचार सुरू असल्याचे नुकतेच जाहीर केले. त्यावर आता पालकांच्या तीव्र प्रतिक्रिया उमटू लागल्या आहेत. त्याबाबत हिंदू महासंघाच्या पालक आघाडीने पत्रकार परिषदेत भूमिका मांडली. त्या वेळी ‘डिसी’ संस्थेच्या अध्यक्षा अर्चना मराठे; तसेच आसावरी दिवाण, प्रा. भूपेश शुक्ला यांनी भूमिका स्पष्ट केली. तृप्ती तारे, विद्या घटवाई, प्रिया भोंडवे आदी उपस्थित होते. या संदर्भात पालक सभा लवकरच शालेय शिक्षणमंत्र्यांची भेट घेऊन त्यांना निवेदन देणार आहे.

‘प्राथमिक शिक्षण हे संपूर्ण शिक्षणाचा पाया समजला जातो. दोन वर्षांत करोनाच्या संकाटामुळे विद्यार्थ्यांचे शैक्षणिक नुकसान झाले आहे. त्यात गृहपाठबंदीचा निर्णय़ भर टाकणारा आहे. शाळेत अभ्यासक्रम पूर्ण होत नाही, तर सरकारने गृहपाठ बंद केल्यास कसे होईल,’ असा सवाल या वेळी उपस्थित करण्यात आला. ‘शाळेत संपूर्ण शिकवून झाले असते, तर मुलांसाठी पालकांना क्लास लावायची वेळ आली नसती. या निर्णयामुळे विद्यार्थ्यांचे नुकसान होणार आहे. याची सर्वस्वी जबाबदारी राज्य सरकारची असेल,’ असा इशाराही पालक सभेने दिला आहे.

गृहपाठ बंदीचा निर्णय घेताना खासगी शाळेत मोफत शिक्षणाचा निर्णय घ्या. ज्यामुळे कोणताही विद्यार्थी शिक्षणापासून वंचित राहणार नाही, याकडे पालकसभेने लक्ष वेधले. सराव होण्यासाठी गृहपाठ आवश्यक आहे. करोनाकाळात लिखाणाची मोडलेली सवय पूर्ववत होणे गरजेचे आहे. अभ्यासाठी बैठकही कमी झालेली आहे. गृहपाठामुळे शिकवलेले सरावात आले, तर पाया भक्कम होतो. घरी अभ्यास न करण्याची सवय पुढे उच्चशिक्षणावेळी घातक ठरू शकणार आहे, असा धोकाही त्यांनी बोलून दाखविला.

No Homework: विद्यार्थ्यांसाठी आनंदाची बातमी, राज्य सरकार गृहपाठ बंद करण्याचा निर्णय घेण्याच्या तयारीत
‘गृहपाठ बंद करण्याचा घातकी निर्णय घेण्याचे सल्ले कोणते तज्ज्ञ देतात?’
होमवर्क बंद होण्याची शक्यता
विद्यार्थी आणि पालकांसाठी अत्यंत महत्वाची बातमी आहे. विद्यार्थ्यांना शाळेतून मिळणार होमवर्क आता बंद होण्याची शक्यता आहे. शालेय शिक्षणमंत्री दिपक केसरकर यांनी यासंदर्भात माहिती दिली आहे. लवकरच तज्ञांशी चर्चा करुन याबद्दल अंतिम निर्णय घेणार असल्याचे त्यांनी माध्यमांशी बोलताना सांगितले.

गृहपाठ बंद करण्याचा राज्य सरकार विचार करत आहे. पहिली ते चौथीच्या विद्यार्थ्यांचा होमवर्क घेणे हे पालकांसाठी जिकरीचे असते. अशावेळी होमवर्क बंद झाल्यास पालकांचा ताण कमी होऊ शकतो असे म्हटले जात आहे. येत्या शैक्षणिक वर्षापासून या निर्णयाची अंमलबजावणी केली जाऊ शकते.

विद्यार्थ्यांना झोपायला वेळ मिळणार, शिक्षण विभाग प्राथमिक शाळांच्या वेळा बदलण्याच्या तयारीत