श्रेयस तळपदेचा आलियाला सल्ला, प्रेक्षक प्रेयसीप्रमाणे असतात त्यांना सोडायचं नसतं तर मनवायचं असतं

सध्या बॉलिवूड एका विचित्र वळणावर आलं आहे. सेलिब्रिटी कलाकार कधी कधी असं काही बोलून जातात ज्यामुळे समाजात वाद निर्माण होतो. सिनेमा रिलीज होणार असेल तेव्हा प्रेक्षकांना जवळ करतात आणि इतरवेळी त्यांच्याकडे बघतही नाहीत. देशाविषयी चुकीची विधानं करतात, सिनेमांमधून विशिष्ट धर्माविरोधात संदेश देतात. यावरुनच सध्या बॉलिवूडमध्ये बॉयकॉट ट्रेंड जोर धरू लागला. आमिर खान, अर्जुन कपूर, रणबीर कपूर, आलिया भट्ट यांच्याभोवती सध्या बॉयकॉटचा विळखा पडला आहे. लाल सिंह चड्ढाला बॉयकॉटचा फटका बसला तर आता ब्रह्मास्त्र सिनेमाबाबतही बॉयकॉट ट्रेंडने सोशल मीडियावर धुमाकूळ घातला आहे. या प्रकरणावर अभिनेता श्रेयस तळपदे याने जाहीर प्रतिक्रिया दिली.

प्रेयसीची प्रेमाने समजूत काढायची असते

पुष्पा सिनेमाचं हिंदी व्हर्जन पुष्पराज या पात्राला आवाज दिल्याने लोकप्रिय झालेल्या श्रेयस तळपदे याने नुकतीच एक मुलाखत दिली. यामध्ये त्याला बॉयकॉट प्रकरणी प्रश्न विचारल्यानंतर त्याने आपलं मत दिलं. सिनेमा म्हणजे प्रेम असेल तर प्रेक्षक हे कलाकारांसाठी प्रेमिका आहेत. जर प्रेमिका रुसली तर तिला सोडून जायचं नसतं तर तिची प्रेमाने समजूत काढायची असते. आजचे सेलिब्रिटी कलाकार नेमकी हीच गोष्ट विसरत आहेत असं श्रेयस म्हणाला.

आलिया- अर्जुनचं घेतलं स्पष्ट नाव

सध्या जोरदार चर्चा सुरू असलेल्या बॉयकॉटप्रकरणी श्रेयसने त्याचं मत मांडून लक्ष वेधून घेतलं आहे. तो म्हणाला, ‘कलाकारांनी भान ठेवून जाहीर व्यक्तव्यं केली पाहिजेत.’ गेल्या काही दिवसांत वादग्रस्त विधानं करणाऱ्या कलाकारांवर त्याने आक्षेप घेतला. ‘जर प्रेक्षकांनाच दुखावलं तर आपले सिनेमे कोण बघणार याचा विचार कलाकारांनी केला पाहिजे.’ यामध्ये श्रेयसने आलिया भट्ट आणि अर्जुन कपूर यांची नावं घेऊन त्यांनी केलेल्या वादग्रस्त विधानांचा संदर्भही दिला. कलाकार सध्या जे बोलत आहेत ते चुकीचं असल्याचंही त्यानं स्पष्ट केलं.

आपण काम कुणासाठी करतो हे लक्षात घेतलं पाहिजे

श्रेयस म्हणाला, ‘आपण काम कुणासाठी करतो तर प्रेक्षकांसाठी. त्यांच्यावर आपलं पहिलं प्रेम असलं पाहिजे. प्रेक्षकांकडे गर्लफ्रेंड म्हणून बघा, ते नाराज झाले तर माफी मागून त्यांचा राग दूर करा. ते नाराज झाले तर त्यांची समजूत काढणं हे कलाकारांचं कर्तव्य आहे. त्यांना असं म्हणा, आमची चूक झाली असेल तर माफ करा.’

संपूर्ण बॉलिवूडला जबाबदार धरू नका

एकीकडे श्रेयसने कलाकारांच्या वागण्यावर भाष्य केलं आहे तर दुसरीकडे प्रेक्षकांशीही संवाद साधला. प्रेक्षकांना तो असं सांगत आहे की, काही कलाकार वादग्रस्त विधानं करतात त्याचा फटका बॉलिवूडला देऊ नका. एका सिनेमासाठी खूप लोक राबत असतात. कलाकारांचं काम बघा. तुम्ही जर काम पाहिलं नाही तर कलाकार म्हणून आमचं काहीच आस्तित्व नाही. श्रेयसने व्यक्त केलेल्या या मताची सध्या जोरदार चर्चा सुरू आहे.

आपडी पापडीमधून नव्याने भेटणार श्रेयस

इकबाल, कौन प्रवीण तांबे, ओम शांती ओम या सिनेमातून दमदार अभिनय करत बॉलिवूडमध्ये मराठमोळया श्रेयसने स्थान निर्माण केलं आहे. लवकरच श्रेयस इमर्जन्सी या सिनेमात अटलबिहारी वाजपेयी यांच्या भूमिकेत दिसणार आहे. माझी तुझी रेशीमगाठ या मालिकेतील त्याची यश चौधरी ही भूमिकाही गाजली. आपडी पापडी हा त्याचा सिनेमाही प्रदर्शनाच्या मार्गावर आहे.