धक्कादायक! मराठी माध्यमाच्या १७ टक्के विद्यार्थ्यांना अक्षरे वाचता येईना

म. टा. विशेष प्रतिनिधी, मुंबई

राज्यातील सुमारे ४५ टक्के विद्यार्थ्यांना तीन आकडी बेरीज येत नाही. तर सुमारे ६३ टक्के विद्यार्थ्यांना वजाबाकी जमत नाही. सुमारे १७ टक्के विद्यार्थ्यांची मराठी अक्षरे वाचताना बोबडी वळत असल्याचे समोर आले आहे. अर्थात इतर राज्यांच्या तुलनेत ही टक्केवारी समाधानकारक असली तरी राज्यात गणित या विषयात अधिक प्रगतीची अपेक्षा व्यक्त होत आहे.

राज्यातील शैक्षणिक दर्जा उंचावण्यासाठी गेल्या अनेक वर्षांपासून विविध प्रयत्न सुरू आहेत. हा दर्जा तपासण्यासाठी सातत्याने विविध स्तरांवर सर्वेक्षण केले जाते. ‘राष्ट्रीय शैक्षणिक धोरण २०२०’मध्ये पायाभूत साक्षरता आणि संख्याज्ञान यावर भर देण्यात आला आहे. यासाठी केंद्र सरकारतर्फे ‘निपुण भारत’ हे अभियान राबविण्यात येत आहे. याअंतर्गत शैक्षणिक वर्ष २०२६-२७पर्यंत इयत्ता तिसरीच्या प्रत्येक विद्यार्थ्याने पायाभूत साक्षरता व संख्याज्ञान आत्मसात करण्याचे लक्ष्य ठेवण्यात आले आहे.

या अनुषंगाने केंद्रीय शिक्षण मंत्रालयाने ‘पायाभूत अध्ययन अभ्यास’ प्रसिद्ध केला आहे. यासाठी राज्यातील ५७८ शाळांमधील ५० हजार ३०८ विद्यार्थ्यांचे सर्वेक्षण करण्यात आले. यामध्ये मराठी माध्यमाच्या ११३ शाळा आणि ९९४ विद्यार्थ्यांचा समावेश होता. यात मराठी माध्यमाच्या १७ टक्के विद्यार्थ्यांना अक्षरे वाचता येत नसल्याचे समोर आले. इंग्रजी माध्यमाच्या १४० शाळांमधील १४१८ विद्यार्थ्यांचे सर्वेक्षण करण्यात आले. यामध्ये १२ टक्के विद्यार्थ्यांना प्राथमिक इंग्रजी अक्षरे वाचता येत नसल्याचे समोर आले आहे.

१२पैकी १० विद्यार्थ्यांना मराठीचे शब्दोच्चार योग्य प्रकारे येतात. तर इंग्रजीच्या शब्दोच्चार चाचणीमध्ये १२पैकी ११ विद्यार्थी उत्तीर्ण झाले आहेत. चित्र जुळवा या चाचणीत मराठीत १७ टक्के तर इंग्रजीत १४ टक्के विद्यार्थी अपयशी ठरले आहेत. देशाच्या सरासरीच्या तुलनेत ही आकडेवारी समाधानकारक असली तरी यामध्ये अधिक प्रगती होण्याची आशा व्यक्त केली जात आहे.

संख्याज्ञान विषयासाठी करण्यात आलेल्या चाचणीमध्ये ६० टक्के विद्यार्थ्यांनाच चार आकडी संख्या वाचता आली, तर ४५ टक्के विद्यार्थ्यांना तीन आकडी बेरीज करता आली नाही. ६३ टक्के विद्यार्थ्यांना तीन आकडी, ३३ टक्के विद्यार्थ्यांना दोन आकडी तर १२ टक्के विद्यार्थ्यांना एक आकडी वजाबाकी येत नसल्याचेही यामध्ये समोर आले आहे.

आईच होणार मुलांची शिक्षिका, महापालिका आणि जिल्हा परिषदेच्या शाळांमध्ये अभियान
Teacher Recruitment: सरकारी शाळांमध्ये शिक्षकांची ३१ हजार पदे रिक्त
सर्वेक्षणातील इतर निरीक्षणे
– ३९ टक्के विद्यार्थ्यांना तारीख, वार, महिना ओळखता येत नाही.

– ७१ टक्के विद्यार्थ्यांना गुणाकार कसा करायचा हे समजते.

– १९ टक्के विद्यार्थी हाताच्या बोटांवर गणित करतात.

– ७३ टक्के विद्यार्थी कागद पेन्सिलचा वापर करूनच गणित सोडवू शकतात.

– ८ टक्के विद्यार्थी बुद्धिमत्तेच्या आधारे गणित सोडवितात.

NCERT Survey: ‘अभ्यास, परीक्षा आणि निकाल हे विद्यार्थ्यांच्या चिंतेचे सर्वात मोठे कारण’