अभिमान! ऋतुजा बागवेनं वाढदिवशी स्वतःसाठीच घेतली अमूल्य भेट! आई-बाबाचंही स्वप्न केलं साकार

मुंबई : मराठी मनोरंजन विश्वामध्ये अभिनेत्री ऋतुजा बागवे हिनं आपल्या सहसुंदर अभिनयाच्या जोरावर स्वतःची अशी वेगळी ओळख निर्माण केली आहे. सोशल मीडियावर ती तिच्या कामासंदर्भातील अपडेट चाहत्यांना देत असते. चाहत्यांशी सोशल मीडियावरूनही संवाद साधत असते. ऋतुजाचा काल (९ सप्टेंबर) वाढदिवस झाला. वाढदिवसाच्या दिवशी ऋतुजानं स्वतःला एक छानसं गिफ्ट दिलं आहे. त्याची माहिती तिनं चाहत्यांना पोस्टद्वारे दिली आहे. ही पोस्ट शेअर करताना ऋतुजानं काही फोटो देखील पोस्ट केले आहेत. ऋतुजाची ही पोस्ट पाहून तिच्या चाहत्यांबरोबरच अनेक कलाकारांनी तिच्यावर अभिनंदनाचा वर्षाव केला आहे.

मनोरंजन विश्वात ऋतुजा यशस्वी आहे. आता व्यक्तिगत आयुष्यातही ऋतुजानं एक महत्त्वाचा टप्पा गाठला आहे. हा टप्पा म्हणजे स्वकष्टानं घेतलेलं घर! बरोब्बर ऋतुजा बागेवनं स्वतःचं घर घेतलं आहे. घराचे फोटो आणि त्यासोबत छानशी पोस्ट ऋतुजानं सोशल मीडियावर शेअर केली आहे. या पोस्टमधून ऋतुजा खूपच भावुक झालेली दिसत आहे. ही पोस्ट शेअर करताना ऋतुजानं तिच्या आयुष्यातील अत्यंत दोन महत्त्वाच्या व्यक्तींचे मनापासून आभार मानले आहेत. या दोन व्यक्ती म्हणजे तिचे आई-बाबा.

सिनेमात न घेण्यासाठी सई ताम्हणकरला दिलं होतं विचित्र कारण

ऋतुजाची पोस्ट

ऋतुजानं तिच्या घराचे आणि घरात आई-बाबांबरोबरचे हसरे फोटो शेअर केले आहेत. हे फोटो शेअर करताना तिनं लिहिलं आहे की, ‘स्वतः चं घर, जेव्हा लोक विचारतात की वय झालं आहे, लग्न कधी करणार? तेव्हा माझ्या आईनं सांगितलं,’वय झालं म्हणून नाही पण तुला जेव्हा करावसं वाटेल तेव्हा लग्न कर. पण त्याआधी स्वावलंबी हो. स्वतःचं घर घे. आई थँक्यू सो मच! हे स्वप्नं तू दाखवलसं. बाबा तुमच्याशिवाय हे शक्य झालं नसतं. आईनं स्वप्न दाखवलं पण तुम्ही पाठीशी होतात म्हणून उडी घेतली.’

ऋतुजानं पोस्टमध्ये पुढं लिहिलं आहे की, ‘भौतीक गोष्टींत मी कधीच सक्सेस मानत नाही ना समाधान शोधत. पण तुमचं स्वप्न पूर्ण करू शकले याचा आनंद खूप आहे जो मी शब्दांत नाही मांडू शकत. तुमच्या चेहेऱ्यावरचा आनंद आणि अभिमानानं पाणावलेले डोळे मला अजून कष्ट करण्याची उमेद देतात.’

श्रेयस तळपदेचा आलियाला सल्ला, ‘प्रेक्षक प्रेयसीप्रमाणे असतात’

ऋतुजाची ही पोस्ट पाहून तिच्या चाहत्यांनी आणि सहकलाकारांनी शुभेच्छांचा वर्षाव केला आहे. ज्या कलाकारांनी ऋतुजाला शुभेच्छा दिल्या त्यामध्ये अंजली पाटील, सुबोध बावे, अश्विनी कासार, सायली संजीव,मयुरी देशमुख, प्रसाद ओक,आशुतोष गोखले,तेजस्वीनी पंडित, सुयश टिळक,श्रुती मराठे, सुकन्या मोने, भाग्यश्री लिमये, आस्ताद काळे, प्रसाद कांबळी,तितीक्षा तावडे, नंदिता पाटकर अशा अनेक कलाकारांचा समावेश आहे.

दरम्यान, ऋतुजानं २००८ मध्ये या गोजिरवाण्या घरात मालिकेतून छोट्या पडद्यावर पदार्पण केलं होतं. त्यानंतर तिनं स्वामिनी, मंगळसूत्र, एका लग्नाची तिसरी गोष्ट, तू माझा सांगाती या मालिकांमध्ये काम केलं होतं. ऋतुजाला खऱ्या अर्थानं लोकप्रियता मिळाली ती ‘नांदा सौख्य भरे’ या मालिकेमुळे. त्यानंतर तिने मागे वळून पाहिलं नाही. ‘अनन्या’ या नाटकातील भूमिकेसाठी देखील तिचं सर्वत्र कौतुक झालं. अलिकडेच तिनं सुबोध भावेबरोबर चंद्र आहे साक्षीला या मालिकेतून छोट्या पडद्यावर कमबॅक केलं होतं.