या एका कारणाने आलेला आशा भोसले आणि लता मंगेशकर यांच्या नात्यात दुरावा

बॉलिवूडची मेलडी क्वीन आशा भोसले आज (Asha Bhosle Birthday) त्यांचा ८९ वर्षांच्या झाल्या आहेत. ‘गोल्डन आशा’ या नावाने प्रसिद्ध असलेल्या आशा भोसले यांनी आतापर्यंत १६ हजारांहून अधिक गाणी गायली. आशा ताईंच्या व्यावसायिक जीवनात जेवढे चढ-उतार आले, तेवढेच त्यांचे वैयक्तिक आयुष्यही अनेक खाचखळग्यातून गेलं. त्यांची मोठी बहीण आणि गानकोकीळा लता मंगेशकर यांचं त्यांच्या आयुष्यात फार महत्त्वाचं स्थान होतं. दोन्ही बहिणींच्या रुणानुबंधाची कहाणी कोणत्याही सिनेमापेक्षा कमी नाही. एकमेकांपासून काही काळ दूर राहिल्या तरी एकमेकांसाठीचं प्रेम आणि काळजी तसूभरही कमी झाली नाही. आज आपण या दोन बहिणींच्या आयुष्यातील अशा घटनांवर प्रकाश टाकणाह आहोत ज्याने त्यांचं नातं किती सुंदर होतं याची जाणीव होईल.

लता दीदींना हवं होतं गांभीर्य

लता मंगेशकर यांनी वयाच्या १४ व्या वर्षापासून काम करायला सुरुवात केली होती. वडिलांच्या अकाली निधनामुळे कुटुंबाचा उदरनिर्वाह करण्याची जबाबदारी त्यांच्यावर आली. कुटुंबातील मोठी मुलगी असल्याने लतादीदींनीही ही जबाबदारी चोखपणे पार पाडली. आशा मोठी झाल्यावर लता यांना त्यांच्याकडूनही तितकीच जबाबदारी आणि गांभीर्य अपेक्षित होते.

नियमांचं बंधन कधीच आवडलं नाही

लहानपणापासूनच आशा ताई या इतर भावंडांपेक्षा वेगळ्या होत्या. कोणत्याही प्रकारच्या नियमांचं बंधन त्यांना कधीच आवडलं नाही. वयाच्या १६ व्या वर्षी आशा ताईंचा विवाह गणपतराव भोसले यांच्याशी झाला. त्यावेळी गणपतराव ३१ वर्षांचे होते. तेव्हा गणपत राव हे लता मंगेशकर यांचे सचिव (सेक्रेटरी) असायचे हे फार कमी लोकांना माहीत असेल.

याचमुळे आला दुरावा

आशा आणि गणपत यांचे नाते लता मंगेशकर यांना कधीच मान्य नव्हतं, असं आशा ताईंनी स्वतः एका मुलाखतीत सांगितलेलं. यानंतर दोघांमध्ये बरेच वाद झाले आणि एकप्रकारचा दुरावा आला. बरीच वर्ष दोघी एकमेकांशी बोलल्या नाहीत. कुटुंबाने त्यावेळी आशा भोसले यांच्याशी सर्व संबंध तोडले होते. तरीही आपल्या निर्णयावर ठाम राहत आशा ताईंनी लग्न केलं आणि आपल्या वैवाहिक आयुष्याला सुरुवात केली.

लता दीदींचा संशय खरा ठरला

लता मंगेशकर यांनीही मुलाखतींमध्ये असे सांगितले आहे की, हे नातं त्यांच्या धाकट्या बहिणीसाठी चांगलं नाही असं त्यांना नेहमीच वाटायचं आणि तसंच झालं. आशा भोसले आणि गणपतराव यांना तीन मुलं झाली, परंतु त्यांचं लग्न अत्यंत वाईट पद्धतीने तुटलं. दोघे वेगळे झाले. असं असलं तरी लता मंगेशकर आणि आशा भोसले यांच्यातील अंतर यानंतरही कमी झालं नाही.

आरडी बर्मन यांच्याशी जोडलं नातं

यानंतर आशा भोसले यांनी आरडी बर्मन यांच्याशी लग्न केले. आरडी बर्मन हे देखील आधीच विवाहित होते आणि त्यांनी त्यांची पहिली पत्नी रीता पटेलपासून घटस्फोट घेतला होता. संगीतावरील प्रेमाने दोघं एकमेकांच्या जवळ आली आणि सहा वर्षांनी लहान असलेल्या आरडी बर्मन यांनी आशा ताईंना लग्नासाठी विचारलं. या प्रस्तावानंतर आशा ताईंनी त्यांच्याशी लग्न करण्यास होकार दिला आणि १९८० मध्ये दोघांनी लग्न केलं.

नेहमीच खंबीर राहिल्या आशा ताई

मात्र, या लग्नातही काही वर्षांनी अडचणी येऊ लागल्या. तरीही दोघांनी एकमेकांची साथ कधी सोडली नाही आणि ते मनाने नेहमीच एकमेकांशी जोडले गेले. पण बर्मन यांनी जगाचा निरोप घेतला. आयुष्यातील अनेक चढ- उतार पाहिल्यानंतरही आशा ताईंनी प्रत्येक वेळी अधिक खंबीर होऊन यशाची नवीन उंची गाठली. संगीताच्या माध्यमातून हा प्रवास अजूनही सुरू आहे.