लता मंगेशकर महाविद्यालयाला जागा उपलब्ध करुन देण्याचा निर्णय

म. टा. प्रतिनिधी, मुंबई

भारतरत्न लता दीनानाथ मंगेशकर आंतरराष्ट्रीय संगीत महाविद्यालय आणि भारतरत्न लता दीनानाथ मंगेशकर संग्रहालय स्थापन करण्यासाठी सांताक्रूझच्या कालिना परिसरातील राज्य मध्यवर्ती ग्रंथालयाची सुमारे सात हजार चौरस मीटर जागा उपलब्ध करून देण्याचा निर्णय राज्य सरकारने घेतला आहे.

दिवंगत गानसम्राज्ञी लता मंगेशकर यांच्या सन्मानार्थ मुंबईत संगीतक्षेत्रातील संस्था निर्माण करण्याची घोषणा राज्य सरकारने यापूर्वी केली होती. राज्य मंत्रीमंडळाच्या बैठकीत नऊ फेब्रुवारी २०२२ रोजी याबाबत निर्णय झाला होता. त्यानुसार राज्य सरकारच्या उच्च व तंत्र शिक्षण विभागाने १६ मार्च २०२२ रोजी निर्णय घेतला. संगीताचा शास्त्रशुद्ध अभ्यास, विकास, प्रसार व प्रचार व्हावा यासाठी सुसज्ज व अत्याधुनिक सोयीसुविधांनी युक्त भारतरत्न लता दीनानाथ मंगेशकर आंतरराष्ट्रीय संगीत महाविद्यालय या नावाने शासकीय संगीत महाविद्यालय स्थापन करण्यात येणार आहे. भारतरत्न लता दीनानाथ मंगेशकर संग्रहालय स्थापन करण्यास मान्यता देण्यात आली.

या दोन संस्थांच्या प्रयोजनासाठी ग्रंथालय संचालनालयाच्या नियंत्रणाखालील मुंबईच्या पश्चिम उपनगरातील सांताक्रूझ कालिना संकुलातील १६ हजार १८८ चौरस मीटर जागेपैकी सात हजार चौरस मीटरच्या भूखंडाची खुली जागा या संस्थांसाठी देण्यात आली आहे. हा भूखंड महसूल व वन विभागाने मुंबईतील महाराष्ट्र राज्य कला संचालकांकडे हस्तांतरित करावा, असे उच्च व तंत्र शिक्षण विभागाने प्रसारित केलेल्या शासन निर्णयात म्हटले आहे.

मुंबई पोर्ट ट्रस्टमध्ये विविध पदांची भरती, मराठी तरुणांना नोकरीची संधी
NEP: देशात लवकरच बहुपर्यायी शिक्षण पद्धतीचा पर्याय विद्यार्थ्यांसाठी खुला
ग्रंथालय संचालकांनी सात हजार चौरस मीटर भूखंडाच्या जागेचा ताबा वांद्रे येथील मुंबई उपनगर जिल्हाधिकारी यांच्याकडे द्यावा, जिल्हाधिकाऱ्यांनी ती जागा महाराष्ट्र राज्याच्या कला संचालकांना देण्यासाठी महसूल व वन विभागाला प्रस्ताव सादर करावा, असे यासंबंधीच्या शासन निर्णयात नमूद आहे.
SBI Recruitment: स्टेट बँकेत बंपर भरती, तरुणांनो ‘येथे’ पाठवा अर्ज