ज्यामुळे प्रसिद्ध झाले आता तेच सिनेमांत करण्याचा पंकज त्रिपाठींचा नकार, चाहत्यांचं मत काय?

मुंबई : बॉलिवूडमध्ये उत्तम अभिनेत्यांमध्ये पंकज त्रिपाठी यांचा समावेश होते. पंकज त्रिपाठी यांनी आतापर्यंत वेगवेगळ्या व्यक्तिरेखा साकारल्या आहेत. त्या सगळ्या व्यक्तिरेखा प्रेक्षकांना आवडल्या आहेत. पंकज यांनी अनेक सिनेमांमध्ये आणि वेब सीरिजमध्ये नकारात्मक भूमिका साकारल्या आहेत. निगेटिव्ह भूमिका करताना त्यांनी अनेकदा आक्षेपार्ह भाषा, शिव्या आणि अश्लिल भाषेचा वापर केला आहे. अर्थात भूमिकेची गरज असल्यानं या गोष्टी त्यांनी केल्या. परंतु आता अशा पद्धतीचे संवाद न बोलण्याचा निर्णय पंकज यांनी घेतला आहे.

‘प्रिन्स’ सूरज पवारला होऊ शकते अटक, शिर्डीत केली फसवणुक

काय म्हणाले पंकज त्रिपाठी?

एका मुलाखतीमध्ये पंकज यांनी विचारण्यात आलं की सिनेमात शिव्या असलेले संवाद ते म्हणणार की नाही. त्यावर त्यांनी सांगितलं की,’मी आता असं ठरवलं आहे की, जी भूमिका मला साकारायची आहे त्यात अत्यंत गरजेचं असेल तर ती अधिक क्रिएटिव्ह करून दाखवेन.’ अर्थात २०१२ मध्ये प्रदर्शित झालेल्या गँग्ज ऑफ वासेपूर मधील सुलतान खान आणि वेब सीरिजमधील मिर्जापूर मधील कालीन भैय्या या भूमिकांमुळे पंकज खूप लोकप्रिय झालेत. या दोन्ही व्यक्तिरेखा नकारात्मक असल्यानं त्यातील संवादांमध्ये खूप शिव्या आणि अश्लिल भाषेतील संवाद होते.

याआधीही देखील या मुद्द्यावर व्यक्त केलं होतं मत

काही वर्षांपूर्वी एका वृत्तपत्राला दिलेल्या मुलाखतीमध्ये पंकज यांनी पडद्यावर शिव्या, अश्लिल भाषा असलेल्या संवादावर त्यांचं मत व्यक्त केलं होतं. ते म्हणाले होते की, ‘जेव्हा एखादा अभिनेता पडद्यावर शिव्या देतो तेव्हा एखादा खास अंदाज दाखवण्यासाठी दिल्या जातात. विनाकारण शिव्या देणं मला आवडत नाही आणि मी त्याचं कधीही समर्थनदेखील करू शकत नाही. इतकंच नाही तर माझ्यावर चित्रीत करण्यात येणाऱ्या प्रसंगांतही गरज नसेल तर अशा पद्धतीची भाषा वापरणं मी टाळतो. यातून मी स्वतःला महान अथवा नैतिक दाखवण्याचा प्रयत्न करत नाही तर एक कलाकार म्हणून मी त्याकडे बघतो आणि स्वतःला जबाबदार मानतो.’

या सिनेमांमधून पंकज झालेत लोकप्रिय

पंकज त्रिपाठी यांनी २००४ मध्ये बॉलिवूडमध्ये लहान-मोठ्या भूमिका करायला सुरुवात केली. त्यांनी रेन, ओमकारा या सिनेमांमध्ये लहान भूमिका केल्या होत्या. त्यानंतर गँग्स ऑफ वासेपूर, फुकरे, बरेली की बर्फी, न्यूटन, लूडो, स्त्री आणि मिमी सारख्या सिनेमांतून त्यांना लोकप्रियता मिळाली. त्याशिवाय मिर्जापूर आणि क्रिमिनल जस्टिस या वेबसीरिजमध्येही प्रमुख भूमिका साकारल्या असून त्याही लोकप्रिय झाल्या आहेत.