ITI Admission:’आयटीआय’ प्रवेशाची शेवटची संधी

म. टा. प्रतिनिधी, पुणे

राज्य मंडळातर्फे घेण्यात आलेल्या दहावीच्या फेरपरीक्षेत उत्तीर्ण विद्यार्थी; तसेच आतापर्यंत अर्ज सादर न केलेल्या विद्यार्थ्यांना औद्योगिक प्रशिक्षण संस्थेच्या (आयटीआय) प्रवेशप्रक्रियेत सहभागी करून घेण्यासाठी व्यवसाय शिक्षण आणि प्रशिक्षण संचालनालयाने (डीव्हीईटी) वेळापत्रक जाहीर केले. त्यानुसार विद्यार्थ्यांना सात ते ११ सप्टेंबर या कालावधीत admission.dvet.gov.in या विद्यार्थ्यांमधून अर्ज भरता येणार आहे, अशी माहिती ‘डीव्हीईटी’कडून देण्यात आली आहे.

यंदा राज्यात सरकारी आणि खासगी आयटीआय मिळून प्रवेशांसाठी एक लाख ५० हजार ११६ जागा उपलब्ध आहेत. त्यापैकी एक लाख पाच हजार ६७२ जागांवर आतापर्यंत प्रवेश झाले आहेत. राज्य मंडळाने जाहीर केलेल्या पुरवणी परीक्षेच्या निकालातील उत्तीर्ण विद्यार्थी आणि आतापर्यंत अर्ज न केलेल्या विद्यार्थ्यांना ‘आयटीआय’ प्रवेशाची संधी दिली जाणार आहे. त्यासाठी पुरवणी वेळापत्रक जाहीर करण्यात आले.

त्यानुसार विद्यार्थ्यांनी अर्ज भरणे, अर्जात दुरुस्ती करणे, प्रवेश अर्ज शुल्क भरण्यासाठी सात ते ११ सप्टेंबरची मुदत आहे. सरकारी आणि खासगी ‘आयटीआय’मधील जागा समुपदेशन फेरीद्वारे भरण्यासाठी उपलब्ध राहतील. त्यानंतर ११ सप्टेंबरला प्रवेश फेरीसाठीच्या उपलब्ध जागांचा तपशील जाहीर करण्यात येईल. सध्या सुरू असलेल्या प्रवेशप्रक्रियेतून आतापर्यंत ७०.३९ टक्के प्रवेश पूर्ण झाले आहेत.

SBI Recruitment: स्टेट बँकेत बंपर भरती, तरुणांनो ‘येथे’ पाठवा अर्ज
परराज्यात शिक्षण घेणाऱ्या ‘ओबीसीं’ची शिष्यवृत्ती बंद

प्रवेश यादी १२ सप्टेंबरला
‘आयटीआय’ची प्रवेश यादी १२ सप्टेंबरला जाहीर करण्यात येईल. प्रवेश घेऊ इच्छिणारे विद्यार्थी आणि नोंदणीकृत विद्यार्थ्यांनी १३ ते १७ सप्टेंबर या कालावधीत औद्योगिक प्रशिक्षण संस्थेत समुपदेशन फेरीला उपस्थित राहणे आवश्यक आहे. या विद्यार्थ्यांतून संस्थास्तरावर गुणवत्ता यादी १३ ते १७ सप्टेंबर या कालावधीत जाहीर करण्यात येईल. याच कालावधीत विद्यार्थ्यांना समुपदेशासाठी बोलावून प्रवेशाच्या जागांचे वाटप करण्यात येईल, असे स्पष्ट करण्यात आले.

मुंबई पोर्ट ट्रस्टमध्ये विविध पदांची भरती, मराठी तरुणांना नोकरीची संधी