तू चकणी आहेस! जेव्हा सिनेमात न घेण्यासाठी सई ताम्हणकरला दिलं होतं विचित्र कारण

अभिनय क्षेत्रात संघर्ष करत असताना कलाकारांना अनेकदा नकार पचवावे लागतात. प्रत्येक कलाकाराला हा अनुभव एकदा तरी येतोच, पण नकार पचवून प्रयत्न करत राहण्यासाठी कलाकार पायाला भिंगरी बांधतात. यशाच्या शिखरावर पोहोचलेल्या कलाकारांना त्यांच्या संघर्षकाळातील हे दिवस विसरणं शक्यच नसतं. यंदाच्या आयफा आणि फिल्म फेअर पुरस्कारांवर नाव कोरणाऱ्या मराठमोळ्या सई ताम्हणकर ला पहिल्या सिनेमातून शूटिंग सुरू होण्याआधीच डच्चू देण्यात आला होता. सईला सिनेमातून काढून टाकताना जे कारण त्या निर्मात्यांनी सांगितलं ते ऐकून त्यावेळी तिला खूप वाईट वाटलं. बस बाई बस या शोमध्ये सईने हा किस्सा शेअर केला. बस बाई बस या शोमधील बसमध्ये अभिनेत्री सई ताम्हणकर हिने सुबोध भावे याच्यासोबत तिच्या कारकीर्दीचा प्रवास उलगडला.

ध्येयवेड्या सईने करून दाखवलं

सई ताम्हणकर हे मराठीच नव्हे तर आता बॉलिवूडमध्येही एक गाजलेलं नाव झालं आहे. मिमी या सिनेमासाठी सईला सर्वोत्कृष्ट सहाय्यक अभिनेत्रीचा आयफा अॅवार्ड आणि फिल्मफेअर अॅवार्ड मिळाला. १५ वर्षापूर्वी सईने अभिनय क्षेत्रात मालिकेतून सुरुवात केली. त्यानंतर सिनेमा, वेब सीरिज या माध्यमामध्ये सईने तिचा ठसा उमटवला. सईने आपल्या अथक परिश्रमाने आणि प्रामाणिक प्रयत्नांनी स्वतःची ओळख निर्माण केली. तिच्यासाठी स्ट्रगलचा काळ नक्कीच सोप्पा नव्हता. पण ध्येयवेड्या अभिनेत्रीने तो सकारात्मकतेने पार पाडला.

पहिल्याच अनुभवाने धक्का दिला

सई ताम्हणकर जेव्हा सांगलीहून मुंबईत अभिनय करण्यासाठी गेली तेव्हा तिने भूमिका मिळवण्यासाठी खूप संघर्ष केला. तिच्या पहिल्या सिनेमाची आठवण आजही तिच्या मनावर कोरली आहे. बस बाई बस या शोमध्ये जेव्हा सुबोधने तिच्या पहिल्या सिनेमाविषयी विचारलं तेव्हा सई म्हणाली, मला पहिला सिनेमा मिळाला तेव्हा मला खूप आनंद झाला. मला ऑफर देण्यात आली. सगळं ठरलं. शूटिंगच्या तारखा मला पाठवण्यात आल्या.

चकणी म्हणून दिलं गेलं कारण

अचानक शूटिंग सुरू होणार त्याच्या आदल्या दिवशी मला निरोप आला की मी त्या सिनेमात काम करणार नाहीय. मला धक्का बसला. पण जेव्हा मी कारण विचारलं तेव्हा मला असं सांगण्यात आलं की मी चकणी आहे. सईने हा किस्सा सांगितला आणि ती स्वत:च हसायला लागली. सुबोध म्हणाला की त्याला चिकनी म्हणायचे असेल पण तो चुकून चकणी म्हणाला असेल. यावरही बस बाई बस शोच्या सेटवर हशा पिकला. सई म्हणाली कदाचित तो चकणा असेल त्यामुळे मी त्याला त्याच्यासारखीच दिसले असेन.

अनुभवातून शिकली सई

माझ्या हातून पहिला सिनेमा तर गेला पण तो पहिला अनुभव मला खूप काही शिकवून गेला. मी त्यानंतर इतकी जिद्दी बनले की माझ्या दिसण्यापेक्षा माझ्यातील अभिनयाच्या जोरावर मला ऑफर मिळाल्या पाहिजेत असा मी निर्धारच केला. सई ताम्हणकर हिच्या आयुष्यातील हा किस्सा ऐकून चाहत्यांनी तिच्यावर कौतुकाचा वर्षाव केला. तसेच नवोदित कलाकारांनाही आपलं स्वप्न साकार करण्यासाठी कशापद्धतीने मेहनत घ्यावी याचं एक उदाहरणच सईने तिच्या करिअरमधून दिलं.