शिक्षकांच्या बदल्यांसंदर्भात नवे धोरण येणार? शिक्षणमंत्र्यांनी दिले संकेत

म. टा. प्रतिनिधी, पुणे

‘नोकरीत बदल्या करणे ही ब्रिटिशांची संकल्पना आहे. सरकारी नोकरदारांची नागरिकांशी बांधिलकी तयार होऊ नये, हे त्यांना अभिप्रेत होते. त्यामुळे दर दोन वर्षांनंतर शिक्षकांच्या बदल्यांची आवश्यकता नाही,’ असे मत राज्याचे उच्च व तंत्र शिक्षण मंत्री चंद्रकांत पाटील यांनी व्यक्त केले. त्यामुळे दर तीन वर्षांनी शिक्षकांसह सरकारी नोकरदारांच्या बदल्या होणार की त्याबाबतचे नवे धोरण येणार यावर चर्चा सुरू झाली आहे.

जिल्हा परिषदेकडून बुधवारी उत्कृष्ट शिक्षक आणि अध्यक्ष चषक पुरस्कार वितरण त्यांच्या हस्ते झाले. त्या वेळी ते बोलत होते. माजी राज्यमंत्री बाळासाहेब भेगडे, जिल्हा परिषदेचे मुख्य कार्यकारी अधिकारी आयुष प्रसाद, उपमुख्य कार्यकारी अधिकारी कमलाकर रणदिवे, शिक्षणाधिकारी (प्राथमिक) संध्या गायकवाड, जिल्हा परिषदेचे माजी अध्यक्ष प्रदीप कंद, भाजपचे माजी गटनेते शरद बुट्टे-पाटील, आशा बुचके आदी या वेळी उपस्थित होते.

पाटील म्हणाले, ‘केंद्राने राष्ट्रीय शैक्षणिक धोरण आणले आहे. ब्रिटिशांनी या देशामध्ये त्यांच्या स्वार्थासाठी शिक्षण आणले. त्यांना राज्य चालवायचे होते. राज्य वर्षानुवर्षे चालेल अशा यंत्रणा ब्रिटिशांनी तयार केल्या आहेत. बदल्या ही ब्रिटिशांची संकल्पना आहे. सरकारी नोकरदाराची नागरिकांशी बांधिलकी तयार होणार नाही, हे त्यांना अभिप्रेत होते. त्यामुळे दर दोन वर्षांनंतर बदल्यांची आवश्यकता नाही.’

Teachers Recruitment: शिक्षकांच्या ५० टक्के जागा भरणार, शिक्षणमंत्र्यांचे आश्वासन
‘शाळांमध्ये व्यवस्थापन समिती स्थापन करा’
‘वैद्यकीय आणि शिक्षण या दोन क्षेत्रांत ‘मिशन’ म्हणून काम करण्याची गरज आहे. शिक्षकांनी त्याकडे केवळ नोकरी म्हणून न पाहता आपले काम म्हणून पाहिल्यास शिक्षणाचा मूळ आत्मा विद्यार्थ्यांमध्ये ते उतरवू शकतात. शिक्षकांनी उत्कृष्टतेचा आग्रह धरावा. विद्यार्थ्यांमध्ये शिक्षणाचा आत्मा ओतला पाहिजे; तरच चांगली पिढी निर्माण होईल. राज्य सरकार शिक्षकांच्या पगारावर दर वर्षी सुमारे ७४ हजार कोटी खर्च करते. त्यामुळे शिक्षकांनी विद्यार्थ्यांवर कष्ट घेतले पाहिजेत,’ असेही पाटील यांनी सांगितले. मुख्य कार्यकारी अधिकारी आयुष प्रसाद यांनी प्रास्तविक केले. जिल्हा परिषदेच्या शिक्षण विभागामार्फत राबविण्यात येत असलेल्या विविध उपक्रमांबाबत माहिती दिली.

शिक्षणाचे नियंत्रण पुण्यातूनच कशाला?-शिक्षणमंत्री चंद्रकांत पाटील