श्रीलंकेला T 20 World Cup 2022 स्पर्धेत खेळण्यासाठी काय करावं लागेल, जाणून घ्या समीकरण

नवी दिल्ली : श्रीलंकेने आशिया चषक जिंकला पण अजूनही ते T 20 World Cup 2022साठी पात्र ठरू शकलेले नाहीत. त्यामुळे श्रीलंकेचा संघ ट्वेन्टी-२० विश्वचषकात खेळणार की नाही, हे अजूनही स्पष्ट झालेले नाही. पण जर श्रीलंकेला ट्वेन्टी-२० विश्वचषकात खेळायचे असेल तर त्यासाठी त्यांना काय करावं लागेल, ही माहिती आता समोर आली आहे.

आशिया चषक स्पर्धेत श्रीलंकेने भारत, पाकिस्तान, अफगाणिस्तान या तिन्ही संघांना पराभूत केले. पण भारत, पाकिस्तान, अफगाणिस्तान हे तिन्ही संघ ट्वेन्टी-२० विश्वचषकासाठी पात्र ठरले आहेत. पण श्रीलंकेचा संघ आशिया चषक जिंकवूनही अजून ट्वेन्टी-२० विश्वचषकासाठी पात्र ठरलेला नाही. श्रीलंकेने आशिया चषक जिंकल्यावर जेव्हा ही माहिती समोर आली तेव्हा सर्वांनाच मोठा धक्का बसला होता. यावर काही चाहत्यांचा विश्वास बसला नव्हता. पण ही गोष्ट खरी आहे.

श्रीलंकेला ट्वेन्टी-२० विश्वचषकात खेळण्यासाठी काय करावं लागेल, पाहा…
ऑस्ट्रेलियातील ट्वेन्टी-२० विश्वचषकासाठी श्रीलंकेला जर पात्र ठरायचे असेल तर त्यांना आता एक गोष्ट करावी लागणार आहे. ट्वेन्टी-२० विश्वचषकापूर्वी पात्रता फेरीचे सामने खेळवण्यात येणार आहेत. श्रीलंकेला पात्रता फेरीत तीन सामने खेळावे लागणार आहेत. श्रीलंकेचा यावेळी पात्रता फेरीतील पहिला सामना हा नामिबियाबरोबर १६ ऑक्टोबरला होणार आहे, त्यानंतर श्रीलंकेचा दुसरा सामना हा १८ ऑक्टोबरला युएईच्या संघाबरोबर होणार आहे आणि तिसरा सामना हा २० ऑक्टोबरला नेदरलँड्सबरोबर होणार आहे. या पात्रता फेरीत जर श्रीलंकेने विजय मिळवले तरच त्यांना ट्वेन्टी-२० विश्वचषकात खेळता येणार आहे. त्यामुळे या पात्रता फेरीसाठी आज श्रीलंकेचा संघ जाहीर करण्यात आला आहे. हा संघ पात्रता फेरीत खेळणार आहे आणि जर ते पात्र ठरले तर विश्वचषकासाठी हाच संघ कायम राहील. श्रीलंकेचा सध्याचा फॉर्म पाहिला तर ते कोणत्याही दिग्गज संघाला पराभूत करू शकतात. त्यामुळे नामिबिया, युएई आणि नेदरलँड्स या संघांचे मोठे आव्हान श्रीलंकेच्या संघापुढे नसेल, असे म्हटले जात आहे. त्यामुळे श्रीलंकेचा संघ हे तिन्ही सामने जिंकत सहजपणे ट्वेन्टी-२० विश्वचषकात दाखल होईल, असे संकेत मिळत आहे. त्यामुळे आता या पात्रता फेरीत श्रीलंकेचा संघ कशी कामगिरी करतो आणि ते ट्वेन्टी-२० विश्वचषकासाठी पात्र ठरतात की नाही, याकडे सर्वांचे लक्ष असेल. ट्वेन्टी-२० विश्वचषकाला सुरुवात होण्यापूर्वीच हे पात्रता फेरीचे सामने खेळवण्यात येणार आहेत.