प्रिया बापट बारावीत असतानाच पडलेली उमेश कामतच्या प्रेमात; लव्ह स्टोरीमध्ये ९ आणि १८ तारखा खास

मुंबई: मराठी मनोरंजन इंडस्ट्री गाजवून आता हिंदीतही नाव कमावणारी लोकप्रिय अभिनेत्री प्रिया बापट १८ सप्टेंबर (Priya Bapat Birthday) रोजी तिचा वाढदिवस साजरा करते आहे. आज केवळ वाढदिवस म्हणून तिच्यासाठी १८ हा आकडा महत्त्वाचा नाही आहे, तर त्यामागे आणखी एक कारण आहे. २०११ साली दसऱ्यादिवशी उमेश कामत आणि प्रिया या (Umesh Kamat and Priya Bapat Love Story) जोडीने लग्न केलं. पण त्याआधी अनेक वर्ष ते रिलेशनशिपमध्ये होते. कॉलेजमध्ये असताना प्रियाने प्रपोज केल्यानंतर उमेश कामतने तिला होकार देण्यासाठी खूप वाट बघायला लावली होती. आता यामध्ये ०९ आणि १८ हे आकडे महत्त्वाचे कसे, असं तुम्हाला वाटेल. तर या दोघांनी एका कार्यक्रमातच याविषयी सांगितले होते.

हे वाचा-क्रिती-प्रभास रिलेशनशिपमध्ये? बी-टाऊनमध्ये ‘परमसुंदरी’ आणि ‘बाहुबली’चीच चर्चा!

प्रिया-उमेशची लव्हस्टोरी

‘दोन स्पेशल’ या कलर्स मराठीवरील कार्यक्रमात बोलताना या दोघांनी त्यांच्या प्रेम कहाणीविषयी दिलखुलास गप्पा मारल्या होत्या. ‘चॉकलेट बॉय’ असणाऱ्या उमेशवर कॉलेजपासूनच अनेक मुली फिदा होत्या. स्वत: प्रियानेही या गोष्टीला दुजोरा दिला. प्रिया आणि उमेशमध्ये ८ वर्षांचं अंतर आहे. यावेळी बोलताना तिने सांगितलं होतं की ती बारावीत असतानाच त्याच्या प्रेमात पडली होती. शाळेत असताना ती त्याची फॅन असल्याचा उल्लेख प्रिया करते.

त्यांच्या लव्ह स्टोरीविषयी पुढे बोलताना उमेश म्हणला की तो खूप वेळ घेऊन निर्णय घेणाऱ्यांपैकी आहे. निर्णय नात्याबाबत असेल तर तो त्याकरताही प्रचंड वेळ घेतो. उमेश सांगतो की, त्यांना दोघांबाबतही प्रेम वाटत होतं पण तरीही तो यामध्ये काहीसा बॅकफूटवर होतो. प्रिया सांगते की ती अठरा वर्षांची असताना त्या दोघांनाही वाटत होतं की हे नातं कोणत्यातरी दिशेला जात आहे, पण आता काही बोलूया नको. ती लहान असल्यामुळे त्या दोघांनाही याबाबत काय होईल याची कल्पना नव्हती, घरुनही काहीसा विरोध झाला.

हे वाचा-कोल्हापूरकरांचा नादच खुळा! गृहिणी घरी नेणार KBC14 चा पहिला कोट्यवधींचा चेक

तारखांना काय आहे महत्त्व?

ते दोघे ५-६ महिने एकमेकांना वेळ देत होते. या काळातच प्रियाने न राहवून त्याला या प्रेमाविषयी विचारलच! उमेश सांगतो की, ‘ त्यावेळी रात्री ०९ ते ०९ असं कॉलिंग फ्री असायचं, त्याचा आम्ही पुरेपूर वापर केला. ०९ ऑगस्ट रोजी एका दिवशी न राहवून तिने मला विचारलं की आता मला काही राहवत नाही, मला इंटरेस्ट आहे तर तुझं काय म्हणणं आहे. तर यावेळी मी उत्तर दिलं नाही. मी म्हटलं मला वेळ घेऊ दे, मी विचार करुन सांगतो. १८ सप्टेंबर रोजी तिच्या वाढदिवशी मी तिला हो म्हटलं.’ त्यामुळे ०९ आणि १८ या तारखा आवर्जुन लक्षात असल्याचे उमेश सांगतो.

उमेश सांगतो की त्याला यावरुन अनेकांनी बोल लावले होते, की अरे तू का थांबलास इतके दिवस. ती निघून गेली असती तर. पण उमेशला विश्वास होता की ती कुठेही जाणार नाही. आज ही जोडी एक दशकाहून अधिक काळ एकत्र आहे. त्यांनी एकत्र येऊनही प्रेक्षकांचं मनोरंजन केलं आहे. याशिवाय त्यांच्या सोशल मीडिया पोस्टही कपल गोल्स देणाऱ्या आहेत.