‘नॅशनल टेस्टिंग एजन्सी’मार्फत (एनटीए) डिसेंबर २०२२ च्या ‘नॅशनल इलिजिबिलिटी टेस्ट’साठी (नेट) अर्ज प्रक्रिया सुरू करण्यात आली असून, १७ जानेवारीपर्यंत यासाठी अर्ज दाखल करता येणार आहेत. २१ फेब्रुवारी ते १० मार्चदरम्यान देशभरात ही परीक्षा घेतली जाणार असल्याचे ‘एनटीए’मार्फत स्पष्ट करण्यात आले आहे.
देशभरातील महाविद्यालयांमध्ये सहयोगी अधिव्याख्याता म्हणून रुजू होण्यास पात्र ठरण्यासाठी ‘नेट’ उत्तीर्ण बंधनकारक असते. वर्षभरात दोन वेळा ही परीक्षा घेतली जाते. डिसेंबर २०२२ साठीची परीक्षा ‘एनटीए’मार्फत नुकतची जाहीर झाली असून १२ फेब्रुवारी ते १० मार्चदरम्यान देशभरात ही परीक्षा होणार आहे. यासाठी २९ डिसेंबरपासून ऑनलाइन अर्ज पक्रिया सुरू करण्यात आली.
१७ जानेवारीला सायंकाळी ५ वाजेपर्यंत विद्यार्थ्यांना अर्ज दाखल करता येणार आहेत. तसेच १८ जानेवारीपर्यंत शुल्क भरण्याची सुविधा उपलब्ध करून देण्यात आली आहे. अर्जामध्ये काही बदल असल्यास विद्यार्थ्यांना १९ ते २० जानेवारीदरम्यान दुरुस्ती करता येणार आहे.
परीक्षा केंद्रांची माहिती पुढील महिन्यात
देशभरातील कोणत्या शहरांमध्ये ‘नेट’ची परीक्षा होणार हे फेब्रुवारीच्या पहिल्या आठवड्यामध्ये जाहीर केले जाणार आहे. दुसऱ्या आठवड्यामध्ये हॉल तिकिटे उपलब्ध करून दिली जाणार आहेत. हॉल तिकिटे उपलब्ध झाल्यानंतरच विद्यार्थ्यांना परीक्षेचे केंद्र, तारीख व शिफ्ट समजू शकेल. ‘नेट’बाबतची सविस्तर माहिती ‘एनटीए’च्या अधिकृत वेबसाइटवर उपलब्ध करून देण्यात आली आहे. ८३ विषयांसाठी कॉम्प्युटर बेसड् पद्धतीने ही परीक्षा घेतली जाणार आहे.
दहावी-बारावीशी संबंधीत प्रक्रिया चालू महिन्यात पूर्ण करण्याच्या सूचना
केंद्रीय माध्यमिक शिक्षण मंडळाच्यावतीने दहावी आणि बारावीच्या प्रात्यक्षिक परीक्षा चालू जानेवारी महिन्यात घेण्यात येणार आहेत. शाळांनी आपापल्या व्यवस्थेनुसार या परीक्षा पूर्ण कराव्यात, अशा सूचना सीबीएसईने दिल्या आहेत.
सीबीएसईच्या दहावी आणि बारावी या वर्गांच्या प्रात्यक्षिक परीक्षांचे आयोजन जानेवारी महिन्यात करण्यात येणार आहे. त्यासाठी सीबीएसईने शाळांना सूचना दिल्या आहेत. त्यानुसार, १ ते ३१ जानेवारीदरम्यान या परीक्षा घ्याव्यात, असे शाळांना कळविण्यात आले आहेत. नागपुरातील शाळांच्या प्रात्यक्षिक परीक्षा अद्याप सुरू झालेल्या नाहीत. मात्र, त्यादृष्टीने शाळांनी नियोजनास प्रारंभ केला आहे. या प्रात्यक्षिक परीक्षा कोणत्या तारखांना घ्यावयाच्या याचा निर्णय शाळांना घ्यावयाचा आहे. बाह्य परीक्षकांच्या आणि शाळेच्या सोयीच्या तारखांनुसार या परीक्षा ३१ जानेवारीपूर्वी पूर्ण केल्या जाव्या, असे सीबीएसईने कळविले आहे.
प्रात्यक्षिक परीक्षांच्या तारखा शाळांना ठरवायच्या असल्यामुळे त्यासंदर्भात विद्यार्थ्यांना शाळांशी संपर्क करावा लागेल. याच काळात जेईई मेन्सच्या परीक्षादेखील घेण्यात येणार आहेत. या परीक्षा आणि प्रात्यक्षिक परीक्षा यांच्या तारखा एकाचवेळी येऊ नयेत, याची खबरदारी शाळांनी घ्यावी. त्यादृष्टीने, प्रात्यक्षिक परीक्षांचे वेळापत्रक ठरवावे. या परीक्षा घेताना सीबीएसईने ठरवून दिलेल्या सर्व नियम आणि सूचनांचे पालन करावे, असेही सीबीएसईने शाळांना कळविले आहे.