शेतकरी वडिलांचे अर्धवट स्वप्न केले पूर्ण; शुभमन गिलच्या शिक्षण, करिअरबद्दल जाणून घ्या

शुभमन गिलची वयाच्या अवघ्या ११ व्या वर्षी अंडर-१६ पंजाब क्रिकेट संघात जिल्हा स्तरावर खेळण्यासाठी निवड झाली. आपल्या पहिल्याच मालिकेत त्याने पाच सामन्यात ३३० धावा करून विक्रम केला. २०१७ मध्ये, त्याची भारताच्या अंडर १९ क्रिकेट संघासाठी निवड झाली. १९ वर्षाखालील क्रिकेट विश्वचषक २०१८ साठी उपकर्णधार म्हणूनही त्याची निवड झाली. अलीकडेच वेस्ट इंडिज आणि झिम्बाब्वेविरुद्धच्या मालिकेदरम्यान शुभमन गिल मैदान आणि सोशल मीडियावर चर्चेत दिसला.

शुभमन गिल सचिन तेंडुलकर, राहुल द्रविड आणि व्हीव्हीएस लक्ष्मण यांना टीव्हीवर पाहत मोठा झाला. ज्यामुळे त्याच्या मनात क्रिकेटर बनण्याची इच्छा निर्माण झाली. शुभमनच्या शेतकरी असलेल्या वडिलांनीही कधीकाळी क्रिकेटर व्हायचे स्वप्न पाहिले होते. पण कौटुंबिक परिस्थितीमुळे ते त्यांचे स्वप्न पूर्ण करू शकले नाहीत. पण त्यांनी शुभमनची प्रतिभा ओळखली होती. त्याचा क्रिकेटकडे असलेला कल पाहून त्याच्या पालकांनी त्याला फाजिल्काहून मोहालीला नेले. तेथे त्याने पंजाब क्रिकेट असोसिएशन आयएस बिंद्रा स्टेडियमजवळ भाड्याने घर घेतले होते.

शुभमन गिल आणि त्याची बहीण शाहनील गिल यांच्यात खूप चांगले बॉंडींग आहे. तो आपल्या बहिणीसोबतचे अनेक फोटो सोशल मीडियावर शेअर करत असतो. शुभमन गिलने आपले सुरुवातीचे शिक्षण मानव मंगल स्मार्ट स्कूल, मोहाली, पंजाब येथून केले. शुभमनने वयाच्या तिसऱ्या वर्षापासून क्रिकेट खेळण्यास सुरुवात केली आणि वयाच्या आठव्या वर्षापासून व्यावसायिक क्रिकेट प्रशिक्षण घेण्यास सुरुवात केली.