गोदामात होतेय बारावीची परीक्षा; परीक्षा केंद्रातच मसाला निर्मिती कारखाना

माध्यमिक व उच्च माध्यमिक शिक्षण मंडळातर्फे दहावी, बारावीची परीक्षा सुरू आहे. चार मार्चपासून बारावीची तर, १५ मार्चपासून दहावीची परीक्षा सुरू आहे. दहावी, बारावी परीक्षेत रोज धक्कादायक प्रकार समोर येत आहेत. मंडपात परीक्षा घेण्याचा प्रकार ताजा असतानाच आणखी एक धक्कादायक प्रकार समोर आला. औरंगाबादच्या विभागीय शिक्षण मंडळाच्या काही किलोमीटरवर असलेल्या पैठण रोडवरील गेवराई तांडा परिसरातील स्वप्नपूर्ती आर्ट, सायन्स व कॉमर्स कनिष्ठ महाविद्यालयाची परीक्षा चक्क गोदामात घेतली जात आहे. मोठे गोदाम असल्याने वर्ग खोल्या असा प्रकार नाही. जाळीदार पडदा टाकत दोन, तीन विभाग करण्यात आले आणि त्याचा परीक्षा कक्ष करत बैठक क्रमांक देण्यात आले आहेत. याच गोदामातच मसाला निर्मितीचा कारखाना आहे. कारखान्यात मसाला निर्मितीसाठी लागणारा कच्चा माल तसाच पडून आहे. तिखट, हळद, मिरचीची पोते पडलेली आहेत. त्याच्याच बाजूला असलेल्या जागेत विद्यार्थी बारावीची परीक्षा देत आहेत. कारखान्यात पसरलेली मिरची, मसाला अशाच वातावरणात परीक्षा देत असून विद्यार्थ्यांचा आरोग्याचाही विचारही करण्यात आलेला नाही. करोना पार्श्वभूमीवर परीक्षेसाठी यंदा होम सेंटर देण्यात आले. मंडळाने घेतलेल्या हमीपत्रात अनेक शाळा, कॉलेजांनी भौतिक सुविधा असल्याचे म्हटले. प्रत्यक्षात अनेक केंद्रावर भौतिक सुविधाच उपलब्ध नसल्याचे समोर आले आहे.

पथकाने दिला अहवाल

परीक्षा केंद्राबाबत मंडळाच्या भरारी पथकाने भेट दिली. जीवशास्त्राच्या पेपरवेळी केंद्रावर बहुतांशी विद्यार्थ्यांच्या प्रश्नपत्रिकेवर पेन्सिलने उत्तरे लिहिलेली आढळून आल्याचे भरारी पथकाच्या लक्षात आले होते. पथक आल्यानंतर काही विद्यार्थ्यांनी आपल्या प्रश्नपत्रिकेवरील उत्तरे मिटविल्याचेही समोर आले. भरारी पथकाने उत्तरे लिहिलेल्या प्रश्नपत्रिका ताब्यात घेतल्या. त्यासह विभागीय मंडळाला याबाबत अहवालही दिला आहे, परंतु याबाबत अद्याप मंडळाने कारवाईची प्रक्रिया केलेली नाही.

परीक्षेपुरतेच वर्ग

स्वप्नपूर्ती कनिष्ठ महाविद्यालयाची परीक्षा गोदामात आहे तर, महाविद्यालय कोठे भरते असा प्रश्न उपस्थित केला जात आहे. परीक्षेपुरतेच महाविद्यालय भरवले जाते का, असा संशयही व्यक्त केला जात आहे. मंडळातील अधिकारी सूत्रांनी दिलेल्या माहितीनुसार महाविद्यालयाचे प्राचार्य एस. एस. क्षीरसागर आहेत. कॉलेजच्या रस्त्यावर पाटी असून यात आर्ट, सायन्स व कॉमर्सचा सर्व शाखांना प्रवेश असा फलक लावला आहे. स्वयं अर्थसहाय्यीत कनिष्ठ महाविद्यालय असून एचएससी व्होकेशनल कोर्सेसलाही प्रवेश देणे सुरू असल्याचे म्हटले आहे. प्रवेशासाठी गणेश हरणे, पंकज कराळे यांची नावे फलकावर आहेत. मंडळाकडे प्राचार्यांचे नाव दुसरेच आहे. फलकावर कार्यालय असल्याचेही नमूद करण्यात आले. त्यामुळे कनिष्ठ महाविद्यालयाचे वर्ग, शिक्षकांच्या नियुक्ती याबाबत चर्चा सुरु आहेत.

परीक्षा केंद्र अशा ठिकाणी असेल याची मंडळाला कल्पना नव्हती. संबंधितांनी मंडळाची फसवणूक केली आहे. बारावी परीक्षेचे हे उपकेंद्र आहे. आवश्यक भौतिक सुविधांबाबत त्यांनी हमीपत्र दिलेले आहे. त्याचा आढावा घेतला जात असून संबंधित परीक्षा केंद्रावर मंडळाकडून योग्य ती कारवाई करण्यात येईल.

आर. पी. पाटील, विभागीय सचिव, माध्यमिक व उच्च माध्यमिक शिक्षण मंडळ.

JEE मेन मुळे ICSE बारावी परीक्षेच्या वेळापत्रकात बदल

ICAI कडून CA फाउंडेशन परीक्षेच्या तारखांमध्ये बदल