कांगारुंकडून धावांचा मोठा डोंगर सर, मोहालीत टीम इंडिया पराभूत

मोहाली, 20 सप्टेंबर: मोहाली टी20त 208 धावांचा डोंगर उभारल्यानंतरही रोहित शर्माच्या टीम इंडियाला पराभव स्वीकारावा लागला. कॅमेरुन ग्रीन आणि इतर ऑस्ट्रेलियन फलंदाजांच्या फटकेबाजीमुळे ऑस्ट्रेलियानं सामना 4 विकेट्स राखून जिंकला. ग्रीननं 30 बॉलमध्ये 61 धावांची खेळी करुन ऑस्ट्रेलियाच्या विजयाचा पाया रचला. त्यानंतर स्टीव्ह स्मिथ, मॅथ्यू वेड, टीम डेव्हिडनं छोट्या छोट्या खेळी करुन ऑस्ट्रेलियाला विजयाच्या दिशेनं नेलं. या विजयासह ऑस्ट्रेलियानं तीन सामन्यांच्या या मालिकेत 1-0 अशी आघाडी घेतली आहे.

राहुल, पंड्या, सूर्यकुमारची फटकेबाजी

त्याआधी लोकेश राहुल, हार्दिक पंड्या आणि सूर्यकुमारच्या फटकेबाजीमुळे भारतानं 20 ओव्हर्समध्ये 6 बाद 208 धावा फटकावल्या होत्या. हार्दिक पंड्यानं ऑस्ट्रेलियन गोलंदाजीची पिसं काढताना चौफेर फटकेबाजी केली. त्याच्या फलंदाजीसमोर कांगारुंच्या बॉलर्सनी अक्षरश: लोटांगण घातलं. हार्दिकनं आपल्या नाबाद 71 धावांच्या खेळीत तब्बल 7 फोर आणि पाच षटकार ठोकले. टीम इंडियाचा सलामीवीर लोकेश राहुलनं आशिया कपमधला आपला फॉर्म कायम राखला. राहुलनं आशिया कपमध्ये अफगाणिस्तानविरुद्धच्या शेवटच्या सामन्यात 62 धावा फटकावल्या होत्या. त्यानंतर आज पुन्हा एकदा राहुलच्या बॅटमधून मोठी खेळी आली. त्यानंत 35 बॉलमध्ये 55 धावा फटकावल्या. त्यात 4 फोर आणि 3 सिक्सर्सचा समावेश होता. राहुलचं आंतरराष्ट्रीय टी20तलं हे आजवरचं 18वं अर्धशतक ठरलं. सूर्यकुमारनंही धावांच्या वाहत्या गंगेत हात धुवून घेताना 25 बॉलमध्ये 46 धावा फटकावल्या.

मराठी बातम्या, ब्रेकिंग न्यूज मराठीत सर्वात आधी News18 लोकमतवर.
आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.

Tags: Cricket, Sports