FYJC Admission: अकरावीच्या प्रवेशासाठी आज अखेरची संधी

म. टा. प्रतिनिधी, नाशिक

नाशिक महापालिका क्षेत्रात इयत्ता अकरावीच्‍या प्रवेशासाठी विद्यार्थ्यांना अखेरची संधी मिळणार आहे. शिक्षण विभागातर्फे तिसऱ्या विशेष फेरीचे वेळापत्रक जाहीर केले असून, ही अखेरची प्रवेश फेरी असणार आहे. प्रवेशासाठी विद्यार्थ्यांना नोंदणीची आज (दि. २१) अंतिम मुदत असणार आहे. फेरीची निवड यादी शुक्रवारी (दि. २३) जाहीर केली जाईल.

शिक्षण विभागातर्फे नाशिकसह राज्‍यातील प्रमुख महापालिका क्षेत्रातील कनिष्ठ महाविद्यालयांमध्ये अकरावी प्रवेशासाठी ऑनलाइन केंद्रिभूत प्रवेश प्रक्रिया राबविली जाते आहे. याअंतर्गत नाशिक महापालिका क्षेत्र प्रवेशासाठी तीन नियमित फेऱ्या आणि दोन विशेष प्रवेश फेऱ्या झालेल्‍या आहेत. नुकतेच शिक्षण विभागाने तिसऱ्या विशेष फेरीचे वेळापत्रक जाहीर केले आहे.

या फेरीत दहावी उत्तीर्ण विद्यार्थ्यांसोबत पुरवणी परीक्षेत उत्तीर्ण विद्यार्थी व एटीकेटी तत्त्‍वानुसार पात्रताधारक विद्यार्थी सहभागी होऊ शकतील. तिसऱ्या प्रवेश फेरीत नोंदणी, अर्जाचा भाग दोन लॉक करण्यासाठी आज (दि. २१) रात्री दहा वाजेपर्यंत मुदत असेल. निवड यादी शुक्रवारी (दि. २३) प्रसिद्ध केली जाईल. तर प्रवेशासाठी शनिवार (दि. २४) पर्यंत मुदत असेल. ही अंतिम प्रवेश फेरी असून, प्रथम येणाऱ्यास प्राधान्‍य तत्त्‍वानुसार प्रवेश दिले जाणार नसल्‍याचे शिक्षण विभागाने स्‍पष्ट केलेले आहे.

युक्रेनहून परतलेल्या विद्यार्थ्यांच्या पदरी निराशाच, प्रवेशासाठी शोधावा लागणार दुसरा देश
…अशी आहे प्रवेशाची स्‍थिती-

– एकूण उपलब्‍ध जागा : २६ हजार ४८०

– कॅप राउंडमधून उपलब्‍ध जागा : २३ हजार ५०६

– कोट्यातील उपलब्‍ध जागा : २ हजार ९७४

– कॅप राउंडमधील प्रवेश : १५ हजार ८३१

– कोट्यातून झालेले प्रवेश : १ हजार ७३५

– कॅप राउंडसाठी रिक्‍त जागा : ७ हजार ६७५

– कोट्यांतर्गत रिक्‍त जागा : १ हजार २३९

FYJC Admission: अकरावीला ६,७३७ विद्यार्थ्यांना प्रवेश
RTE Admission: आरटीई प्रवेशप्रक्रियेमध्ये असमन्वय, पालकांसह अधिकारीही संभ्रमात